Salomo ma hungire notjiwaṋa
(1Ozo 8:12-21)1 Salomo wa kumba a tja: “Muhona, ove we ritoororera okukara movikamba na monḓorera. 2 Nambano ami mbe ku tungire ondjuwo ondjapuke mu mo tura nga aruhe.”
3 Otjiwaṋa atjihe tjOvaisrael tja kurama mbo. Nombara Salomo wa tanauka okutara ku tjo ne tji ningirire ondaya ya Ndjambi. 4 Eye wa tja: “Nga tangwe Muhona, Ndjambi wa Israel! Eye wa yenenisa omakwizikiro, nga tjita ku tate David, indu tja tja: 5 ‘Okuza keyuva, ndi mba pitisa otjiwaṋa tjandje mOengipte, ami hi toororere otjihuro ngamwa mehi arihe ra Israel mu mwa sokutungwa ondjuwo ondjapuke mu me kumbirwa; nami hi toororere omurumendu ngamwa auhe okuhongorera otjiwaṋa tjandje Israel.’ ” 6 Nungwari nambano ami mba toorora Jerusalem okurira poṋa pu me kumbirwa, na ove, David, okurira ombara yotjiwaṋa tjandje Israel. 7 Salomo wa hungira komurungu a tja: “Tate David wa vanga okutungira Muhona, Ndjambi wa Israel, ondjuwo ondjapuke. 8 Nungwari Muhona wa tja nai ku tate David: ‘Ami mbi nohange na ove kutja wa vanga okundjitungira ondjuwo ondjapuke. 9 Nungwari kaove, David, ngu mo ndji tungire ondjuwo ndji; ma rire omuzandu woye ongu me ndji tungire ondjuwo ndji.’ ” 10 “Nambano Muhona wa yenenisa omakwizikiro we nga tjita. Ami mba pingena tate David okurira ombara ya Israel, nu mba tungira Muhona, Ndjambi wa Israel, ondjuwo ondjapuke ndji. 11 Mondjuwo ndji ami mba twa mo Otjipwikiro tjOmerikutiropamwe mu mu novitjangero vivari vyomawe vyomerikutiropamwe Muhona nga tjita puna Ovaisrael.”
Ongumbiro ya Salomo
(1Ozo 8:22-53)12 Otjiwaṋa atjihe ngunda atji ri mbo, Salomo wa kakurama komurungu wotjipunguhiro tja Muhona na yere omaoko we ama kumbu. 13 Salomo wa ungurire otjitongameno tjongoporo ne tji twa mokati korupanda. Otjo tja ri nozometa mbari koure na kouparanga, nometa imwe nohinga koutonga. Eye wa ronda kotjitongameno hi na kawora ozongoro poṋa puya sora okumunika ku ngamwa auhe, na yere omaoko keyuru. 14 Eye wa kumba a tja: “Muhona, Ndjambi wa Israel, kapena mukuru ngu ri otja ove, meyuru poo kombanda yehi. Ove oove omuṱakame komerikutiropamwe woye, nu u raisa orusuvero rwoye orukarerere kotjiwaṋa tjoye tji tji nonḓuviro kove nomutima watjo auhe. 15 Ove wa ṱakamisa omakwizikiro ngu wa tjita ku tate David, omukarere woye; nu ndinondi wa yenenisa imbi mbi wa kwizika.
16 “Nambano, Muhona, Ndjambi wa Israel, ami me kumbu kutja ove u ṱakamise omakwizikiro nga omakwao ngu wa tjita ku tate David, indu tji we mu raera nai: ‘Ami aruhe me ku pe ondekurona, ndji mai ku pingene okurira ombara ya Israel, indu ozondekurona zoye tji maze kara nonḓuviro ku ami tjimuna ove tji wa kara na yo ku ami.’ 17 Nu komuhingo mbwi otji me kumbu, Muhona, Ndjambi wa Israel, kutja ove u yenenise omakwizikiro nga ngu wa tjita ku tate David, omukarere woye.
18 “Ndjambi, tjiri, hapo mape ya ove o tura mokati kovandu kombanda yehi? Nandarire eyuru arihe kari oruveze ndwa yenene kove, nu ondjuwo ndji ndji mba tunga mai yenene vi kove? 19 Arikana, ndji zuvira ongumbiro yandje nomeriyarikaṋeno wandje, Muhona, Ndjambi wandje, ndji zuvira ondjuriro nongumbiro yandje, ndji me kumbu kove. 20 Tjevera ondjuwo ndji omutenya nouṱuku; poṋa mba ove pu wa toorora okukumbirwa po. Ndji zuvira tji me kumbire mondjuwo ndji. 21 Zuvira ozongumbiro zandje nozotjiwaṋa tjoye Israel, aruhe tji matji tara kondjuwo ndji ama tji kumbu kove. Moyoye meyuru tu zuvira nu tu isira.
22 “Omundu tji ma kumininwa kutja wa tjiti ouvi komukwao, na etwa kotjipunguhiro tjoye mondjuwo ndji a yane kutja ke nondjo, 23 Muhona, zuva meyuru, nu pangura ovakarere voye. Vera ingwi omunandjo pu pa yenene, nu u kuture ingwi omuhinandjo.
24 “Otjiwaṋa tjoye tji tja haverwa i ovanavita na tjo mena rokutja tja tura ondjo komurungu woye, nu tjazumba otjo atji ritanaurire kove natji ku yozike natji ningire ondjesiro mondjuwo ndji, 25 tji zuvira meyuru. Isira otjiwaṋa tjoye Israel omauvi watjo, nu u tji yarure kehi, ndi wa yandja ku wo na kooihe mukururume.
26 “Otjiwaṋa tjoye tji tja tura ondjo komurungu woye, nove tji we tji vere nokuhinokutjipa ombura, nu tjazumba otjo atji ritanaura natji tara kondjuwo ndji natji kumbu nokukutanga, 27 tji zuvira meyuru. Isira ourunde wovakarere voye, ihi otjiwaṋa tjoye Israel. Ve honga ondjira osemba mu mave sokuryanga, nu tjazumba u rokise ombura mehi roye, ndi wa yandja kotjiwaṋa tjoye ri rire ouini watjo oukarerere.
28 “Tji mu nourumbu mehi poo omutjise omuzeu poo ovikunwa tji vya nyonwa i ombepo ombyu poo i omutjise wovikokotwa poo i ehapu rozombahu poo otjiwaṋa tjoye tji tja rwisiwa i ovanavita na tjo poo tji mu na omutjise poo ouvere mokati katjo, 29 tji zuvira ozongumbiro zatjo. Tji pe novandu motjiwaṋa tjoye Israel mbe noruhoze momitima nave roporora omaoko wawo mongumbiro kondjuwo ndji, 30 ve zuvira ongumbiro yawo. Ve zuvira moyoye meyuru, u ve isire nu u tjite ku auhe otja pa pu pokutjitwa, ove tjinga au tjiwa omeripura wovandu avehe. 31 Ovandu voye otji mave ku tira nave kara nonḓuviro kove, oruveze aruhe ngunda ava tura mehi, ndi wa yandja kootate mukururume.
32 “Owozonganda ngu tura kehi rokokure tja zuu ena roye enene na imbi oviṋa ovinene, mbi wa tjita kotjiwaṋa tjoye, nu tje ya okukumbira mondjuwo ndji, 33 mu zuvira ongumbiro ye. Mu zuvira meyuru mu u tura, nu u yenenise imbi eye mbi me ku ningire okutjita, ovandu avehe mouye ve ku tjiwe nu ve ku tire i tjimuna otjiwaṋa tjoye omuini Israel tji tji tjita. Nowo otji mave tjiwa kutja ondjuwo ndji, ndji mba tunga, ove omu u kumbirwa mo.
34 “Ove tji wa rakiza kotjiwaṋa tjoye okukarwa novanavita na tjo, notjo tji matji kumbu kove ama tji tara kotjihuro hi tji wa toorora, na kondjuwo ndji ndji mbe ku tungira, 35 tji zuvira ozongumbiro zatjo. Tji zuvira meyuru, nu u tji pe outoṋi.
36 “Otjiwaṋa tjoye tji tja tura ondjo komurungu woye, tjinga ape hari omundu ngu ha tura ondjo, nu momazenge woye tji wa tjiti kutja ovanavita na tjo ve tji havere nokutjitwara kehi rarwe otja ovahuurwa, nandarire kutja okokure, 37 tji zuvira ozongumbiro zatjo. Tji tje ritanaurire mehi ndo natji kumbu kove, ama tji rihepura kutja otjinauvi nu tja tjita ouvi, zuvira ozongumbiro zatjo, Muhona. 38 Nu tji tje ritanaurire tjiri kove nomitima vyawo avihe mehi ndo, natji kumbu kove ngunda ama tji tara kehi ndi ndi wa yandja kooihe mukururume na kotjihuro tji wa toorora, na kondjuwo ndji ndji mbe ku tungira, 39 zuvira ozongumbiro zatjo. Tji zuvira moyoye meyuru, nu u tji tjariparere. Isira otjiwaṋa tjoye omauvi nozongatukiro zatjo komurungu woye.
40 “Nambano, Ndjambi wandje, paturura omeho nomatwi woye kozongumbiro ndu maze kumbirwa mba.
41 Nambano sekama, Muhona Ndjambi,
nu hita mondjuwo ndji,
ove nOtjipwikiro tjOmerikutiropamwe tji
tji ri otjisanekero tjomasa woye,
nu kara mo nga aruhe.
Sera ovapristeri voye ondaya
mu avihe mbi mave tjiti;
notjiwaṋa tjoye atjihe ngatji yoroke
mena rouwa mbu wa tjita ku tjo.
42 Muhona Ndjambi, o nakaura ombara,
ndji wa toorora.
Zemburuka orusuvero ndu wa ri na rwo
komukarere woye David.”
© Herero Revision Bible © Bible Society in Namibia, 2021.
