Josija ma tjiti omukandi wOpaska
(2Ozo 23:21-23)1 Ombara Josija wa tjitira omukandi wOpaska mOjerusalem kondjozikiro ya Muhona; nu meyuva oritjamurongo na yane komueze omutenga ovandu otji va zepa ovinamuinyo komukandi mbwi. 2 Eye wa yandja oviungura kovapristeri, mbi ve sokuungura mondjuwo ya Muhona, ne ve yanḓiparisa kutja ve vi ungure nawa. 3 Wina wa yandja omaronga nga kOvalevi, mbaa ve hongo Ovaisrael avehe, nu mba yapurirwa Muhona, ama tja: “Hitiseye Otjipwikiro tjOmerikutiropamwe mondjuwo ya Muhona ndja tungirwe i ombara Salomo, omuzandu wa David. Amu tji tjindi rukwao koviṱuve vyeṋu, ooimba na mbeni, nungwari karereye Muhona, Ndjambi weṋu, notjiwaṋa tje Israel. 4 Kurameye potuveze tweṋu mondjuwo ya Muhona otja kozonganda zeṋu komuhingo woviungura mbi mwa perwe i ombara David, nomuzandu we ombara Salomo, 5 nu riṱuneye oveni mOtjouyapuke, kokutja tjiva veṋu ve yenene okuvatera eṱunḓu arihe peke motjiwaṋa tja Israel. 6 Zepeye ozondjona zOpaska nozongombo, nu mu riyapure! Rongereye ozombunguhiro, kokutja Ovaisrael ovakweṋu ve yenenise omaraerero aehe Muhona nga yandjere notjinyo tja Moses.”
7 Ombara Josija wa yandja ozonyanda, okutja ozondjona nozongombona, azehe kumwe nḓa ri 30,000, kovandu kutja ve ze zepere Opaska; wina wa yandja ozongombe 3,000, azehe nḓa okuza motupanda twe. 8 Ovahongore ve wina va yandja oviyandjewa nombango yawo oveni kotjiwaṋa na kovapristeri na kOvalevi. OoHilkija na Sakaria na Jehiel, ovahongore ovatjevere vondjuwo ya Ndjambi, va yandja ozondjona nozongombona 2 600, nozongombe omasere yetatu, kovapristeri kutja ve ze punguhire Opaska. 9 Ovanane vOvalevi, ooKonanja na Semaja nomuangu we Netanel, na Hasabja na Jeiel na Josabad va yandja ozondjona nozongombona 5,000, nozongombe omasere yetano kOvalevi kutja ve ze punguhire Opaska.
10 Oviṋa avihe tji vya za nokuṱuninwa Opaska, ovapristeri nOvalevi otji va kakurama potuveze twawo otja ombara pu ye ve rakiza. 11 Ozondjona nozongombona tji za za nokuṱa, ovapristeri va pamenena ombinḓu kotjipunguhiro, ndjaave pewa i Ovalevi, Ovalevi ngunda amave ze purura. 12 Tjazumba va twa onyama yozombunguhiro ozoningiririsiwa peke kutja ve i yandje kovandu otja komaṱunḓu pekepeke, kokutja ve i punguhire Muhona komuhingo womaraerero nge ri mOmatwako wa Moses. 13 Ovalevi va tereka ondjona yOpaska pomakara otja komatjangwa, noviyambo oviyapuke vyozombunguhiro ve vi tereka mozonyungu na motuungu na moviterekero ovipapi, nave hakahana okuhaṋa onyama movandu. 14 Oviṋa mbi tji vya za nokutjitwa, Ovalevi otji ve ritoororera onyama yOpaska nave toororere ovapristeri, ozondekurona za Aron, wina, orondu ovapristeri va kara noviungura tjinene nga kouṱuku, amave punguha ozombunguhiro ozoningiririsiwa nozonḓura. 15 Ovaimbure vonganda ya Asaf va kurama potuveze tu va perwe otja komaraerero wombara David. Onganda ya Asaf noya Heman noya Jedutun, ombuke yombara, novatjevere vopomivero vyondjuwo ya Muhona kave zire po poviungura vyawo, Ovalevi tjinga ave ve ṱunina Opaska. 16 Oviungura avihe vya Muhona vya ungurwa meyuva ndo, okuṱakamisa Opaska nokupunguhira ozombunguhiro ozoningiririsiwa kotjipunguhiro tja Muhona otja ombara Josija pa rakizire. 17 Ovaisrael avehe, mba ri poṋa mbo, va tjita Opaska nomukandi wOzomboroto nḓe hi nosurise oure womayuva hambombari. 18 Okuza koruveze rwomuprofete Samuel, Opaska otja indji kai na pu ya tjitirwe nai. Kape nozombara ozongwao nḓa tjitire Opaska otja indji ndja tjitwa i ombara Josija novapristeri nOvalevi novandu va Juda nOvaisrael novature va Jerusalem, 19 mombura oitjamurongo na hambondatu youhona wa Josija.
Ondjandero youhona wa Josija
(2Ozo 23:28-30)20 Ombara Josija tja za nokumana omatungururiro aehe wondjuwo ya Muhona, Neko, ombara ya Engipte, otja hongorera otjimbumba tjovita okukarwira mOkarkemis, tji tji ri pomukuro wonḓonḓu Eufrat. Josija wa kondja okumutjaera, 21 nungwari Neko wa hinda ombuze ndji ku Josija, a tja: “Ovita mbi ami mbi me ru kavi notjiṋa na ove, mbara ya Juda. Ami hi ere okukurwisa, nungwari mbe ere okurwisa ovanavita na ami; nu Ndjambi we ndji raera kutja mbi hakahane. Ndjambi u ri komunda wandje, o mu sekamene, tjapo eye ngee ku nyono.” 22 Nungwari Josija we rimana okurwa, notje riteturura na i kotjirwa. Eye wa panḓa okupuratena ku imbi Ndjambi mbya hungira notjinyo tjombara Neko, na karwa ovita morutjandja rwa Megido.
23 Ombara Josija wa yahwa noviku vyOvaengipte motjirwa; notja rakiza kovakarere ve ama tja: “Ndji tooreye mu ndji ise po! Mba yahwa tjinene.” 24 Owo ve mu herura metemba re rovita, ave mu twa mekwao nda ri na ro mbo, nave mu twara kOjerusalem. Josija wa kakokera ngo, na pakwa momaendo wooihe mukururume. Ovandu avehe va Juda nova Jerusalem ve kemutjitira omutambo.
25 Omuprofete Jeremia wa tjitira ombara Josija eimburiro romutambo; novaimbure, ovarumendu novakazendu, nga ndinondi ve imbura eimburiro ndi, tji mave mu riri. Ihi tja rira ongarero mOisrael, neimburiro ndi ri ri momatjangwa wOmaimburiro wOmitambo.
26 Omeriyamekero wa Josija ku Muhona, nokukara nonḓuviro kwe kOmatwako wa Muhona, 27 nekuruhungi re okuza kombutiro nga kondjandero, notjiṋa ngamwa atjihe tja tjita, avihe mbi vya tjangwa mEkuruhungi rOzombara za Israel noza Juda.
© Herero Revision Bible © Bible Society in Namibia, 2021.
