Joas ma rire ombara mOjuda
(2Ozo 12:1-16)1 Joas wa rira ombara mOjuda e notjiwondo tjozombura hambombari; eye wa honapara oure wozombura omirongo vine mOjerusalem. Ina wa ri Sibja, ngwa zire kotjihuro Berseba. 2 Joas wa tjita imbi mbyaa vi tjata ku Muhona, omupristeri Jojada ngunda a ri nomuinyo. 3 Jojada wa toororera ombara Joas ovakazendu vevari, nowo ve mu pandukira ovanatje ovazandu novakazona.
4 Joas tja za nokurira ombara, we rimana okuṱunisa ondjuwo ya Muhona. 5 Eye wa rakiza kovapristeri nOvalevi kutja ve yende kovihuro vya Juda, nu ve kawonge ovimariva mbya yenene movandu avehe vyokuṱunisa navyo ondjuwo ya Ndjambi ombura aihe. Eye we ve raera kutja ve hakahane okuwonga ovimariva mbi, nungwari Ovalevi va womba. 6 Joas opa isanena Jojada, otjiuru tjovapristeri, ne mu pura tjinene ama tja: “Okutjavi tji mu ha kondjere kutja Ovalevi ve wonge ovimariva vyomasutiro mOjuda na Jerusalem, Moses, omukarere wa Muhona, mbya ningirire kovandu kutja ve sute kokuvatera na vyo Ondanda yOmerikutiropamwe?”
7 Atalja, ingwi omukazendu omurunde, novandu ve va nyonene ondjuwo ya Muhona, nave ungurisa oviyandjewa oviyapuke avihe vyayo okurikotamena na vyo koviserekarera vyovisenginina vya Baal.
8 Ombara ya rakiza kOvalevi, ve ungure otjiwongero tjovimariva nu ve tji twe pendje yondjuwo ya Muhona pomuvero. 9 Owo va hinda ombuze mOjerusalem na mOjuda arihe kutja auhe a etere Muhona otjisuta otja Moses, omukarere wa Ndjambi, pa rakizire kOvaisrael mokuti onguza. 10 Otjiṋa hi tja yorokisa otjiwaṋa novanane vatjo; nowo otji va eta ovistua vyotjimariva nave urisa na vyo ihi otjiwongero. 11 Eyuva arihe peke Ovalevi aave twara otjiwongero komunane omunene wouhona nguye tji ṱakamisa. Aruhe tji tje ura, omutjangerepo wouhona nomukuramenepo wOmupristeri Otjiuru ave ya, ave isa mo ovimariva nave yarura otjiwongero poruveze rwatjo. Komuhingo mbwi otji va wonga ovimariva ovingi tjinene.
12 Ombara na Jojada aave yandja ovimariva ku imba mba ri ovatjevere votjiungura tjokuṱuna ondjuwo ya Muhona, novatjevere mba aave yazema ovake vomawe, novahonge vomiti, novaungure vovitenda okutjita inga omaṱunino. 13 Ovarumendu avehe ovaungure va ungura nomasa, nu va ṱuna ondjuwo ya Ndjambi otja tji ya ri rutenga, nave i zikamisa nawa tjinene komurungu waindu tji ya ri rukuru. 14 Omaṱunino tji ya manuka, ongoldo nosilveri ndja hupa ya yandjwa kombara na ku Jojada; nowo va ungura na yo oviyaha noviungurise vyarwe vyondjuwo ya Muhona.
Jojada ngunda a ri nomuinyo, ozombunguhiro aruhe aaze punguhirwa mondjuwo ya Muhona. 15 Tja za nokuvaza otjiwondo otjinene tjozombura esere nomirongo vitatu, otja koka. 16 Owo ve mu paka momaendo wouhona, mOtjihuro tja David, amave raisa ondjozikiro koviungura oviwa eye mbya ungurira Ovaisrael na Ndjambi nondjuwo ya Muhona.
Joas ma poka ku Muhona nu ma verwa
17 Kombunda yonḓiro ya Jojada, ovanane va Juda va popa Joas kutja a puratene ku wo. 18 Ovandu va isa okurikotamenena mondjuwo ya Muhona, Ndjambi wooihe mukururume, nave rikotamene koomukuru vovisenginina, na kovihenḓe ovizere vyomukuru wotjisenginina oserekaze Asera. Nomazenge wa Muhona ye ya kOjuda na Jerusalem mena rozongatukiro nḓa. 19 Muhona wa hinda ovaprofete okuveronga kutja ve ritanaurire ku ye, nungwari ovandu kave puratenene ko. 20 Tjazumba Ombepo ya Ndjambi ya hita mu Sakaria ngwa ri omuzandu womupristeri Jojada. Eye wa kurama poṋa ovandu avehe paa ve yenene okumumuna, na ravaere a tja: “Muhona, Ndjambi, ma pura kutja okutjavi tji mu ha karere nonḓuviro komatwako we, namu riyetere otjiwonga komuhingo mbwi! Eṋe mwe mu esa, neye otji me mu esa wina!” 21 Ombara Joas we rikuta kuna ovandu okusekamena Sakaria, novandu va zepera Sakaria nomawe morupanda rwondjuwo ya Muhona otja komarakiza wombara. 22 Ombara ke rizemburukire nouṱakame Jojada, ihe ya Sakaria, mbwe mu karera na wo, nungwari wa zepaisisa Sakaria. Sakaria ngunda ama koka, wa ravaera a tja: “Muhona ma munu imbi mbi mo tjiti, nu me ku vere!”
Ondjandero youhona wa Joas
23 Oruteṋi tji rweya ombura ndjo, otjimbumba tjOvasirie tjovita otji tja rwisa Juda na Jerusalem, atji zepa ovanane avehe natji yarura ovihuurwa ovingi tjinene kombara kOdamaskus. 24 Otjimbumba tjOvasirie tjovita tja ri otjiṱiṱi, nungwari Muhona wa tjita kutja tji havere otjimbumba hi otjinene tjOvajuda tjovita mena rokutja ovandu va pokere ku Muhona, Ndjambi wooihe mukururume. Komuhingo mbwi ombara Joas otja verwa. 25 Ovanavita na ye tji va isa otjirwa, ombara ya isiwa nomihihamo omizeu; novahongore vevari vombara ve rikuta kumwe okumupirukira nave mu zepere motjiraro tje okusutisa omazepero womuzandu womupristeri Jojada. Eye wa pakwa mOtjihuro tja David, nungwari ka pakerwa momaendo wouhona. 26 Imba mbe rikuta kumwe okumupirukira, va ri Sabad, omuzandu womukazendu Omuamoni wena Simat, na Josabad, omuzandu womukazendu Omumoab wena Simrit. 27 Momahandjauriro wEmbo rOzombara mu nomahungi wovazandu ve, nomaukiro, nga ukirwa omberero ye, nomatjangero womaṱunino wondjuwo ya Ndjambi. Nu omuzandu we Amasja we mu pingena mouhona.
© Herero Revision Bible © Bible Society in Namibia, 2021.
