1 Ovature va Kirjat-Jearim otji ve ya nave twara Otjipwikiro tjOmerikutiropamwe wa Muhona hi kondjuwo ya Abinadab ndja ri kondunda; nowo va yapura omuzandu we Eleasar a rire omutjevere wOtjipwikiro tjOmerikutiropamwe wa Muhona.
Samuel ma rire omunane mOisrael
2 Otjipwikiro tjOmerikutiropamwe wa Muhona tja kara mOkirjat-Jearim oruveze orure, ozombura mangara omirongo vivari. Moruveze ndwi Ovaisrael avehe ve ri tanaurira ku Muhona ave noruhoze.
3 Samuel wa hungira kotjiwaṋa tja Israel a tja: “Tji mamu vanga okuritanaura ku Muhona nomitima vyeṋu avihe iseye oomukuru vovisenginina avehe noviserekarera vyomukuru wotjisenginina oserekaze Astarte mokati keṋu, mu riyandje nomitima vyeṋu avihe ku Muhona nu mu mu karere erike. Neye otji me mu yama momake wOvafilisti.” 4 Ovaisrael otji va isa okukarera otjiserekarera tja Baal notja Astarte, nave karere Muhona erike.
5 Tjazumba Samuel wa hungira kOvaisrael avehe a tja: “Woronganeneye mOmispa, nami me mu kumbire ku Muhona.” 6 Nowo otji va woronganena mOmispa, ave kateka omeva, ave ye tirahi kutja ye rire ombunguhiro ku Muhona nave ritjaere kovikurya oure weyuva ndo arihe. Nowo va tja: “Eṱe twa tura ondjo komurungu wa Muhona.” Nu Samuel wa pangura oviposa pokati kOvaisrael mOmispa.
7 Ovafilisti tji va zuva kutja Ovaisrael va woronganene mOmispa, inḓa ozombara ndano zOvafilisti notjimbumba tjazo tjovita otji za sekama okukeverwisa. Ovaisrael tji va zuva otjiṋa hi, va tira Ovafilisti, 8 nave tja nai ku Samuel: “Kara pokutukumbira ku Muhona, Ndjambi wetu, kutja e tu yame kOvafilisti.” 9 Samuel wa zepa ondjona, ndji nyama, ne i punguhire Muhona aihe ombomba i rire ombunguhiro oningiririsiwa. Neye wa kumbira Ovaisrael ku Muhona, nu Muhona arire tje mu zuvire. 10 Samuel ngunda ama punguha ombunguhiro, Ovafilisti tjandje mave ryama popezu okurwisa Ovaisrael; nu kamanga Muhona wa ṱuṱumina Ovafilisti okuza keyuru, nave puruka oparukaze, nga tji va haverwa i Ovaisrael. 11 Novarwe vOvaisrael vovita va womboroka mOmispa nave tezere Ovafilisti nga kObet-Kar, amave yende amave ve zepa ondjira aihe.
12 Nu Samuel wa toora ewe, a ziki pokati ka Mispa na Shen, e ri ruku Eben-Eser, okutja “Ewe rombatero.” Neye wa tja: “Nga mbenomba Muhona we tu vatere.” 13 Komuhingo mbwi Ovafilisti otji va haverwa; nu Muhona we ve tjaera okuhita mehi rOvaisrael rukwao, Samuel ngunda e nomuinyo. 14 Ovihuro avihe okuza kOekron nga kOgat Ovafilisti mbi va huurire vya kotorwa i Ovaisrael; nu komuhingo mbwi Ovaisrael otji va kotora ehi rawo arihe. Nu pa kara ohange pokati kOvaisrael nOvaamori.
15 Samuel wa ri omunane mOisrael oure womuinyo we auhe. 16 Ombura aihe eye aa ryanga pokati ka Betel na Gilgal na Mispa okupangura oviposa vyOvaisrael movirongo avihe mbi. 17 Nu tjazumba wa yaruka konganda ye mOrama, eye maa karere otja omupangure. MOrama eye wa tungira Muhona otjipunguhiro.
© Herero Revision Bible © Bible Society in Namibia, 2021.
