Muhona ma isana Samuel
1 Nomuzandu Samuel wa karera Muhona kehi yondjeverero ya Eli. Nu moruveze ndo ombuze ya Muhona aa i zuvaka oungundi, nu kaape kara omerimunikisiro wa Muhona. 2 Ouṱuku umwe Eli ngwa ngundiparere omeho, wa rarere metuwo re omuini. 3 Samuel wa rarere motjouyapuke tja Muhona mu mwa ri Otjipwikiro tjOmerikutiropamwe wa Muhona. Nemunine ra Ndjambi tjandje mari yaka. 4 Muhona wa isana Samuel, neye wa itavera a tja: “Owami ngwi!” 5 Samuel otja ya ku Eli na tja: “Owami ngwi. Ove we ndji isana.”
Nungwari Eli wa zira a tja: “Hi ku isanene; twende, karare.” Samuel otja yaruka na karara.
6 Muhona wa isana Samuel rukwao; neye wa penduka, a i ku Eli na tja: “Owami ngwi! Ove we ndji isana.”
Nungwari Eli wa zira a tja: “Hi ku isanene, muatje wandje; twende karare.” 7 Samuel tjandje ingee keya tjiwa Muhona; wina tjandje embo ra Muhona kariya zuvaka ku ye.
8 Muhona wa isana Samuel otjikando otjitjatatu; nu Samuel wa penduka, a i ku Eli na katja: “Owami ngwi! Ove we ndji isana!”
Eli otja tjiza kutja nangwari oMuhona ngwa isana omuzandu. 9 Eli arire tja tja nai ku Samuel: “Twende karare: Neye tje ku isana rukwao, itja nai: ‘Hungira, Muhona, omukarere woye ma zuu.’ ” Samuel otja yaruka na karara potjiraro tje.
10 Muhona otje ya, a kurama mbo na isana otja ovikando imbi ovitenga na tja: “Samuel, Samuel!”
Nu Samuel wa zira a tja: “Hungira, Muhona, omukarere woye ma zuu.”
11 Muhona wa tja nai ku Samuel: “Tara, ami me tjiti otjiṋa mOisrael, nu auhe ngwe tji zuu, omatwi we aeyevari maye ku ongo. 12 Meyuva ndo, ami me yenenisa ku Eli imbi avihe mbi mba tandera onganda ye, okuza kombutiro nga kondjandero. 13 Ami mbe mu tjivisa kutja mee kavera onganda ye nga ko nga aruhe mena rouhasemba mbwa tjitwa, ovazandu ve tjinga ave ndji yamburura, neye e he ve tjaerere. 14 Ami otji mba yanene onganda ya Eli kutja, tjiri, imbwi ouhasemba wonganda ya Eli kamaau hanganisiwa nombunguhiro yovinamuinyo poo yovikurya nga ko nga aruhe.”
15 Nu Samuel wa kara momara nga tji pa tji; tjazumba otja yezurura omivero vyondjuwo ya Muhona. Nungwari Samuel wa tira okutjivisa Eli otjirimunikise hi. 16 Nu Eli wa isana Samuel a tja: “Samuel, muatje wandje!”
Neye wa itavera a tja: “Owami ngwi!”
17 Nu Eli we mu pura nai: “Muhona we ku raere tjike? O horeke otjiṋa ngamwa atjihe eye tje ku raere.” Ndjambi me ku vere tji wa horeke otjiṋa atjihe tja hungire. 18 Samuel otje mu raera oviṋa avihe, nu ke mu horekere otjiṋa. Nu Eli wa tja: “Eye onguri Muhona; nga tjite ngamwa tji tji ri osemba ku ye.”
19 Samuel we kura, nu Muhona wa kara puna ye; nu Muhona ke na rimwe romambo we nde ha yenenisire. 20 NOvaisrael avehe okuza kOdan nga kOberseba va muna kutja Samuel, tjiri, omuprofete wa Muhona. 21 Nu Muhona wa kara pokurimunikisa mOsilo, me rimunikisire ku Samuel nu ma hungirire puna ye. Nembo ra Samuel iyari zuvaka nawa kOvaisrael avehe.
© Herero Revision Bible © Bible Society in Namibia, 2021.
