David ma rambwa motjimbumba tjOvafilisti tjovita
1 Ovafilisti va woronganisira ovimbumba vyawo vyovita avihe mOafek, Ovaisrael ngunda ava tono ozondanda zawo poruharwi ndu ri mOrutjandja rwa Jesreel. 2 Nu inḓa ozombara ndano zOvafilisti za kayenda puna ovimbumba vyazo vyomasere novyomayovi; nu David novarumendu ve va kayenda puna Akis. 3 Novahongore vOvafilisti wovita va pura ave tja: “Ovaheberi mba mave paha tjike?”
Akis we ve zira a tja: “Ingwi o David, omukarere wa Saul, ombara ya Israel. Eye wa kara puna ami oure wombura imwe poo mbari. Ke na pa tjita otjiṋa otjivi okuza indu nga karere puna ami.”
4 Nungwari ovahongore wOvafilisti va pindikira Akis tjinene, nave tja ku ye: “Yarura omundu ngo kotjirongo tje tji we mu pa, nu a ha i puna eṱe kovita, tjapo ngaa yaruka mu eṱe. Omundu ngwi me ritjatisa na tjike komuhona we? Kee ritjatisa nonḓiro yovandu vetu are? 5 Eye onguri David, ovakazendu nguyave imbura nai tjaave pundu: ‘Saul wa zepa eyovi, nungwari David wa zepa omayovi omurongo.’ ”
6 Tjazumba Akis otja isana David na tja ku ye: “Tjimbe tja Muhona omunamuinyo, tjiri oove omurumendu omuṱakame, nu ku ami tja rira kokuwa, andakuzu mo i puna ami kovita. Ami hiya muna ondataiziro move okuza keyuva, ndi weya ku ami nga ku ndinondi. Nungwari inḓa ozombara zarwe kaze nonyuṋe move. 7 Nambano yaruka koyoye nohange, nu o tjiti otjiṋa tji tji hi nokutjata kozombara zOvafilisti.”
8 David wa zira Akis a tja: “Mba ungura ye, nu ove wa muna otjingee otjiṋa otjivi momukarere woye okuza keyuva, ndi mba uta okukara puna ove nga ku ndinondi! Okutjavi tji mbi hi nakuyenda puna omuhona wandje, ombara, okukarwisa ovanavita na ye?”
9 Nungwari Akis wa tja nai ku David: “Ami me tjiwa kutja oove omuṱakame ku ami otja omuengeri wa Ndjambi. Nungwari inḓa ozombara zarwe zOvafilisti za hungira kutja ove ko nakuyenda puna eṱe kovita. 10 Mependukirwa tji pa tji, ove rirongera puna ovakarere woye mbu mwe ya pamwe, mu yende.”
11 Tji pa tji, David otja kayenda mondjira puna ovarumendu ve okuyaruka kehi rOvafilisti. Nungwari Ovafilisti va ya kotjihuro Jesreel.
© Herero Revision Bible © Bible Society in Namibia, 2021.
