David ma yama omuinyo wa Saul rukwao
1 Ovasif tjiva ve ya ku Saul mOgibea nave mu tjivisa nai: “David wa kaṱara mondunda Hakila kotjikoro tjokuti onguza kwa Judea.” 2 Saul arire tja sekama tjimanga novarumendu omayovi yetatu wOvaisrael ovatoororwa, nave i mokuti onguza Sif okukapaha David. 3 Nu Saul wa tona ozondanda meṋe yondjira kondunda ya Hakila. David tjandje ingee u ri mokuti onguza; neye tja zuva kutja Saul weya mbo okumupaha, 4 otja tuma ozohoze okukakonḓonona kutja Saul, tjiri, weya mbo. 5 David otja sekama, a i poṋa Saul pa tona ozondanda, na kamuna poṋa pu pa rarere Saul nomuhongore we wovita Abner, omuzandu wa Ner. Saul wa rara moukoto worumbo rwozondanda, ovarwe ve wovita ngunda ava tono ozondanda okumukondoroka.
6 Nu David wa pura Omuhetite Ahimelek na Abisai, omuzandu womukazendu Seruja, omuangu wa Joab, na tja: “Owaṋi pu eṋe, ngu ma i puna ami kozondanda za Saul?”
Nu Abisai wa zira a tja: “Owami ngu me i puna ove.”
7 Ouṱuku mbo David na Abisai otji va hita mozondanda, nave vaza Saul a rara moukoto worumbo, nenga re ara twerewa mehi meṋe yotjiuru tje. Nu Abner novarwe va Saul wovita tjandje va rara okumukondoroka. 8 Nu Abisai wa tja nai ku David: “Ouṱuku mbunombwi Ndjambi wa twa omunavita na ove momake woye. Ndji esa nambano mbi tuvakanise enga re mu ye omuini, mbi mu papere mehi otjikando tjimwe uriri. Ami hi nakuhepa okumutwera tuvari.”
9 Nungwari David wa tja ku ye: “O mu zepa! Owaṋi ngu ma twa eke kombara ya Muhona ondwirisiwa na kara nokuhaverwa?” 10 Tjazumba David a tja komeho: “Tjimbe tja Muhona omunamuinyo, tjiri, Muhona omuini me mu vere poo eyuva ronḓiro ye mari ya poo ma kaṱa movita. 11 Muhona nge ndji tjaere kutja e ha ṱunu komutwirisiwa we! Ngatu toore enga, ndi ri meṋe yotjiuru tje, nondjupa ye yomeva wina nu tu yende.” 12 David otja toora enga ndi nondjupa yomeva mbya ri meṋe yotjiuru tja Saul, nave i. Kape na umwe ngwa muna poo ngwa tjiza kutja pa tjitwa tjike poo ngwa yanḓimuka; avehe tjinga ava rarere ozomboṱu ozonḓeu Muhona nḓe ve pere.
13 David wa konda komukuma mbwina wotjana, na kakurama kondomba yondundu ohumburuko; nu pa ri oruveze orunene pokati kawo. 14 David arire tja ravaere kovarwe wovita va Saul na ku Abner, omuzandu wa Ner, a tja: “Abner! Mo ndji zuu?”
Abner arire tja ziri a tja: “Ove oovyaṋi ngu mo kwenene ombara?”
15 Nu David wa ziri Abner a tja: “Kaove omurumendu watjiri are? Kaove omurumendu omunene pu avehe mOisrael are? Okutjavi tji u ha tjeverere omuhona woye ombara? Umwe wotjiwaṋa wa zu nokuhita nambano nai mozondanda okukazepa omuhona woye ombara. 16 Otjiṋa tji wa tjiti hi, katji nakukuetera ohivo! Tjimbe tja Muhona omunamuinyo, eṋe mwa pu okuṱa, tjinga amu ha tjeverere omuhona weṋu, ingwi omutwirisiwa wa Muhona. Nambano tara, enga rombara ri ri pi? Nondjupa yomeva ndja ri potjiuru tje i ri pi?”
17 Saul wa zemburuka eraka ra David na tja: “Eraka ndi oroye are, muatje wandje David?”
Nu David wa zira a tja: “Otji pe ri, tjiri, muhona wandje ombara.” 18 Neye wa hungira nai komurungu: “Okutjavi, muhona wandje, ingee tji u tjera omukarere woye? Mba ungura tjike? Nu otjivi tji mba tjita, otjikeṋa? 19 Nambano omuhona wandje ombara nga puratene komambo womukarere we nga: Tjinangara Muhona ongwe ku hingira ku ami, mu punguhira ombunguhiro. Nungwari tjinangara ovandu ombe tjita nao, ngave sengwe komurungu wa Muhona, orondu ve ndji ramba motjirumatwa tja Muhona kutja mbi yende kehi ku me kakarera oomukuru varwe uriri! 20 O ndji esa mbi ṱire mehi rozonganda, kokure na Muhona. Ombara ya Israel ya kumuka okutjinga omuinyo wandje tjimuna orukoze ndu maru yeve ongwari mozondunda.”
21 Saul arire tja ziri a tja: “Mba tjita ouvi, kotoka uri, muatje wandje David. Himee ku tjiti navi rukwao, tjinga awa yama omuinyo wandje ndinondi. Tara, ami mba tjita ouyova, nu mba tataiza navi tjinene.”
22 David wa zira a tja: “Tara, enga rombara oro ndi. Omurumendu umwe weṋu nge ye okurieta! 23 Muhona ma sutu auhe kouṱakame nousemba we. Ndino Muhona we ku yandja momake wandje, nungwari ami hi tjitire otjipo komutwirisiwa wa Muhona. 24 Otja punga amba yama omuinyo woye ndino, Muhona nga rire punga a tjiti ku ami wina, nu nge ndji kuture kombamisiro aihe.”
25 Saul opa tjera nai ku David: “Serwa ondaya, muatje wandje David! Ove mo tjiti oviṋa ovinene, nu tjiri, mo ṋingapara.”
Tjazumba David otja twara ondjira ye, nu Saul wa yaruka koye.
© Herero Revision Bible © Bible Society in Namibia, 2021.
