1 Nu Kristus tjinga a hihamisiwa otja omundu, eṋe wina otjinga amwa sokuripanḓiparisa oveni nouripura tjingewo mbwi eye mbwa ri na wo, orondu ingwi ngwa hihamisiwa otja omundu eye wa za ko kourunde. 2 Okuza ku ndinondi ongarero yeṋu kombanda yehi ngai kare otja kombango ya Ndjambi, nungwari ai ha kara otja kozonḓuma zongaro youndu. 3 Moruveze ndwa kapita eṋe mwa ri nongarero ndja sana na indji yovandu mbaa ve ha tjiwa Ndjambi. Eṋe iyamu ryanga mokuhinameritjaerero koviṋa vyouye na mokunanukira oviṋa ngamwa na mokupurukisiwa i omeva wamururu, nomikandi omivi, nomerikotameneno omayaukise kovisenginina. 4 Nambano imba mbe ha tjiwa Ndjambi va kumwa, eṋe tji mu hi nokukara noruwano na wo mongarero yawo yokuhinomeritjaerero; nowo opu ve sokumuyamburura. 5 Nungwari owo ve sokuyandja omerizirira ku Ndjambi ngwe rirongerera okupangura ovanamuinyo novakoke. 6 Ombuze Ombwa opu ya zokuzuvarisirwa ovakoke wina, ku imba mba pangurwa monyama otja ovandu tji ve pangurwa; oyo ya zuvarisirwa wo kokutja ve kare nomuinyo mOmbepo otja kongaro ya Ndjambi.
Ovatye ovawa voviyandjewa vya Ndjambi
7 Ondjandero yoviṋa avihe ya yenene. Kareye nomeritjaerero nu mu kare katumba kutja mu sore okukumba. 8 Nu kombanda yaavihe suverasaneye nomasa tjinene, orusuvero tjinga aru vandeka ourunde oungi. 9 Sekirisaneye nokuhinomaunaunino. 10 Auhe nga ungurise otjiyandjewa tja pewa i Ndjambi kouwa wovakwao. Komuhingo mbwi eye ma rire omutye omuwa woviyandjewa pekepeke vya Ndjambi. 11 Ngamwa ngu ma zuvarisa nga zuvarise omambo ngu maye zu mu Ndjambi omuini. Ngamwa ngu ma karere mombongo nga karere yo nomasa ngu ma pewa i Ndjambi. Nu mu avihe mbi mamu tjiti ngamu yozike Ndjambi mu Jesus Kristus ngu nondjozikiro nomasa aruhe nga ko nga aruhe. Amen.
Okuhihamisiwa otja omukambure
12 Vakwetu ovasuverwa, amu kumisiwa i omarorero omazeu mu mu ri. Owo kakutja oviṋa mbi he iwe. 13 Nu tjinene kareye nenyando tji mamu kara norupa momahihamisiro wa Kristus, kokutja ondjoroka yeṋu i rire onene indu eye tji meya rukwao ongeṋangeṋeno ye. 14 Oweṋe ovaṋingandu, tji mamu yambururwa motjimbe tjokutja oweṋe ovakongorere va Kristus; ihi matji hee kutja Ombepo yongeṋangeṋeno ye, indji Ombepo ya Ndjambi i ri kombanda yeṋu. 15 Ape ningi umwe weṋu ngu ma hihamisiwa otja omuzepe poo erunga poo omutjite wouvi poo ngu me ritwa moviṋa vyovakwao. 16 Nungwari tji mo hihamisiwa mena rokutja oove omukriste, o ṱohoṋi; nungwari itja okuhepa ku Ndjambi kutja ove u isanewa omukambure.
17 Oruveze rwokutja ombanguriro ya Ndjambi i ute rweya. Notjiwaṋa tja Ndjambi omuini otji matji rire otjitenga okupangurwa. Nu tji mai utire pu eṱe, korusenina mape kakara vi ku imba mbe ha kambura mOmbuze Ombwa ya Ndjambi? 18 Nomatjangwa maye tja:
“Nu tje ri ouzeu komusemba okuyamwa,
hapo mape kara vi komurunde na komutjite wouvi?”
19 Nu imba mbe hihamisiwa otja kombango ya Ndjambi, ngave kare nonḓakameno mOmuute wawo omuṱakame nu ve panḓere pokutjita ouwa.
© Herero Revision Bible © Bible Society in Namibia, 2021.
