Salomo me rirongerere okutunga ondjuwo ya Muhona
(2Eku 2:1-18)1 Hiram, ombara ya Tirus, wa ri epanga ra David aruhe; neye tja zuva kutja Salomo wa pingena ihe David okurira ombara otja hinda ovatumwa ve ku ye. 2 Salomo wa yarura ombuze ndji ku Hiram na tja: 3 “Ove mo tjiwa kutja tate David kaa sora okutunga ondjuwo ondjapuke ya Muhona, Ndjambi we tje mu pa outoṋi kovanavita ve avehe. 4 Nungwari nambano Muhona, Ndjambi wandje, we ndji pa ohange komikuma avihe. Hi novanavita, nu hi nokutira oumba wokurwisiwa. 5 Muhona wa yanena tate David na tja: ‘Omuzandu woye ngu me ziki okurira ombara kombunda yoye me ndji tungire ondjuwo ondjapuke.’ Nambano ami otji mbe rimana okutunga ondjuwo ndjo okukumbira mo Muhona, Ndjambi wandje. 6 Nambano hinda ovandu voye kOlibanon ve kendjikondere otupapa. Ovakarere vandje mave kaungura puna wo, nami me sutu ovakarere voye otja pu movanga. Otja tji mo tjiwa kape na umwe wovakarere vandje ngu ma tjiwa okukonda omiti nawa tjimuna imba Ovasidon.”
7 Hiram wa yoroka tjinene tja zuva ombuze ndji ya Salomo na tja: “Muhona nga tangwe ndinondi ngwa yandja ku David omuzandu onongo okuhonaparera otjiwaṋa otjinene hi.” 8 Tjazumba Hiram otja hinda eziriro ndi ku Salomo na tja: “Ombuze yoye mbe i zuu, nu ami mbe rirongere okutjita imbi mbi wa ningire. Me ku pe omiti vyotupapa novyomiparara. 9 Ovakarere vandje mave eta omiti mbi okuisa kOlibanon ave vi twara kokuvare nave vi kutu kumwe; novyo mavi tendeza momuronga nga poṋa pu wa toorora. Novakarere vandje mave vi kuturire mbo, nu imba ovoye mave vi twara. Komunda woye me vanga kutja u yandje ovikurya kovandu vonganda yandje.”
10 Hiram otja yandja omiti vyotupapa novyomiparara ku Salomo otja pa vanga; 11 nu Salomo wa yandja ovikokotwa ozotona omayovi yevari, nomaze womiṋinga nga kamwa ozorita omayovi omasere yane mombura aihe okuparura na vyo ovandu ve.
12 Muhona wa yenenisa omakwizikiro we na yandja ounongo ku Salomo. Nu pa kara ohange pokati kooHiram na Salomo, nowo va tjita omakutasaneno.
13 Ombara Salomo wa kuta ovandu 30,000 mehi arihe ra Israel moviungura vyoṋiṋikizire. 14 Adoniram ongwa ri omutjevere wovandu moviungura mbi. Eye we ve haṋa movimbumba vitatu, atjihe tjovarumendu 10,000. Notjimbumba atjihe tja kara oure womueze umwe mOlibanon noure womieze vivari monganda. 15 Salomo wina wa ri novarumendu 80,000 mbaa ve ke omawe mozondundu, novarumendu 70,000 mbaa ve ye tjindi; 16 neye wa twa po ovatjevere 3 300 okutjevera ovandu moviungura vyawo. 17 Ombara Salomo wa rakiza kutja ve ke omawe omanene nomazeu nokuyehonga ye rire omazikameno wondjuwo ondjapuke. 18 Ovatunge va Salomo nova Hiram novarumendu votjihuro Biblos ve ye teya nave hongo omawe nomiti okutunga ondjuwo ondjapuke.
© Herero Revision Bible © Bible Society in Namibia, 2021.
