1 Ombara Ahab wa raera komukazendu we Isebel oviṋa avihe Elia mbya tjita, na indu tja zepa ovaprofete avehe va Baal. 2 Isebel wa hinda ombuze ku Elia na tja: “Oomukuru vovisenginina ngave ndji zepe muhuka moruveze tjingero ndwi, tji mbi ha tjitire otjiṋa tjingetjo kove, ihi tji wa tjita kovaprofete.” 3 Elia wa tira na taurisa omuinyo we; eye wa toora omukarere we na i kOberseba mOjuda.
Eye wa isa omukarere we ngo, 4 na kayenda oure weyuva arihe mokuti onguza. Eye wa haama momuzire womuti, ne rizeri okukoka na kumbu a tja: “Opuwo nambano, Muhona. Yakura omuinyo wandje, ami tjinga ambi he ri omusemba pootate!”
5 Eye wa rangavara kehi yomuti na twaererwa. Mokamanga omuengeri wa ṱuna ku ye na tja: “Penduka, u rye!” 6 Eye wa yevayeva, nu posi yotjiuru tje pa ri omboroto nehoro romeva. Neye wa rya a nu na rangavara rukwao. 7 Nomuengeri wa Muhona wa kotoka ne mu pendura porutjavari na tja: “penduka u rye, tjapo ouyenda mau rire ouzeu kove.” 8 Elia wa penduka na ri na nu, novikurya vye mu pa omasa nga yenene okukayenda oure womayuva omirongo vine kOsinai indji ondundu ya Ndjambi. 9 Nu imbo wa kahita mondimba na karara.
Mokamanga Muhona wa hungire ku ye na tja: “Elia, mo ungura tjike mba?”
10 Eye wa zira a tja: “Muhona, Ndjambi Omunamasaaehe, ami mbe ku karera aruhe, ove erike. Nungwari imba Ovaisrael va isa po omerikutiropamwe na ove, va haṋa ovipunguhiro vyoye nu va zepa ovaprofete voye avehe. Owami erike ngu mba sewa po, novandu mave vanga okundjizepa.”
11 Muhona wa tja nai ku ye: “Twende, kakurame kondomba yondundu komurungu wandje.” Nu Muhona wa kapita na hindi otjivepo tjomasa, tji tja nyinganyingisa ovivanda natji tukutura otuuwa. Nungwari Muhona ka ri motjivepo hi. Notjivepo tji tja isa okuhinga otji pa kara omungunda wehi, nungwari Ndjambi ka ri momungunda mbwi. 12 Kombunda yomungunda wehi pa kara omuriro, nungwari Muhona ka ri momuriro mbwi. Nu kombunda yomuriro kwa hinga orumuinyo orutarazu.
13 Elia tja zuva orumuinyo ndwi wa kutjira omurungu we nongwava na piti na kakurama pomahitiro wondimba. Nu pa zuvaka eraka nda tja nai ku ye: “Elia, mo ungura tjike mba?”
14 Eye wa zira na tja: “Muhona, Ndjambi Omunamasaaehe, ami mbe ku karera aruhe, ove erike. Nungwari imba Ovaisrael va isa po omerikutiropamwe na ove, va haṋa ovipunguhiro vyoye nu va zepa ovaprofete voye avehe. Owami erike ngu ma sewa po, novandu mave vanga okundjizepa.”
15 Muhona wa tja ku ye: “yaruka mokuti onguza kwa Damaskus. Kahite motjihuro nu katwirise Hasael a rire ombara ya Sirie, 16 na Jehu, omuzandu wa Nimsi, a rire ombara ya Israel. Nu wina twirisa Elisa, omuzandu wa Safat, ngwa zire kOabel-Mehola okukupingena a rire omuprofete. 17 Auhe ngwa taura kokuṱa i Hasael ma kaṱa i Jehu, nu auhe ngwa taura ku Jehu ma kaṱa i Elisa. 18 Nungwari ami me hupisa Ovaisrael omayovi hambombari, avehe imba mbe nouṱakame mu ami nu mbe he rikotamene ku Baal poo mbe ha hupite otjiserekarera tje.”
Omaisaneno wa Elisa
19 Elia wa ya na kavaza Elisa, omuzandu wa Safat, ama taura ehi nozonduwombe omirongo vivari na ine; neye omuini wa ri pu inḓa ozosenina. Elia wa hukura ongwava ye ne i yumbu kombanda ya Elisa. 20 Nu Elisa wa isa ozonduwombe ze na utuka kombunda ya Elia na tja: “Ndji esa, mbi kaminike ootate na mama, nu tjazumba otji me i puna ove.”
Elia wa zira na tja: “Osemba, yaruka, ami hi nokukutjaera.”
21 Elisa otja yaruka kozonduwombe ze na kazepa mbari; nu indji onyama we i tereke, noviyoke vyazo ombya rira ozonguṋe. Eye wa yandja onyama kovandu, nowo va rya. Okuzambo otja kongorera Elia ne kemukarera.
© Herero Revision Bible © Bible Society in Namibia, 2021.
