1 Ovakorinte 5 - Herero Revision Bible (HRR)

Oruvakiro aru ha kara mombongo

1 Nambano koṋa akuhe kwa zuvaka kutja mokati keṋu muna oruvakiro, oruvakiro oruyaukise ndu ha tamunwa, nangarire mokati kaimba mbe ha tjiwa Omatwako wa Ndjambi. Mbi zuva kutja pe nomurumendu worive ngu rara pomukazendu wa ihe. 2 Nu mamu rihivire tjike? Eṋe mwa sokutoruhoze! Nomurumendu ngu tjita otjiṋa otja ihi wa sokuisiwa mo mokati keṋu! 3-4 Nandire kutja ami mbi ri kokure na eṋe morutu, mbi ri puna eṋe mombepo. Nu aayo, tjiri, mbi ri puna eṋe mbo, ami mena ra Muhona Jesus mba pangura rukuru ingwi omurumendu ngwa tjita otjiṋa otjiyaukise hi. Eṋe tji mwa worongana, nami tji mbi ri puna eṋe mombepo, momasa wa Muhona wetu Jesus, 5 eṋe mamu sokuyandja omurumendu ngwi ku Satan kutja orutu rwe ru yandekwe, kokutja ombepo ye i yamwe mEyuva Muhona ndi meya.

6 Kakokuwa eṋe okurihiva! Kamu nokutjiwa kutja osurise onḓiṱi i surisa otjisema atjihe are? 7 Eṋe mamu sokukohorora osurise onguru youvi kokutja mu rire ovakohoke okumanuka. Eṋe mamu sana notjisema otjipe tji tji hi nosurise otja hapo tjinga amu ri tjiri. Orondu Kristus ondjona yetu yOpaska, ya punguhirwa eṱe. 8 Nu nambano ngatu nyandere omayuva wetu omanene wOpaska, nu a ha rire nomboroto ndji nosurise onguru youvi noyourunde, nungwari a rire nomboroto youkohoke noyouatjiri ndji hi nosurise.

9 Morutuu ndu mba tjanga ku eṋe komeho yaindwi mbe mu raera kutja amu ha wana novandu mbe tjita otuvakiro. 10 Nu morutuu ndo hi heere ovandu mba mbe ha varerwa mombongo ya Kristus, mbe tjita otuvakiro poo ozongopo poo omarunga poo mbe rikotamena koomukuru vovisenginina. Okuhinokuwana na wo itjamu sokupita mouye. 11 Tji mba tjanga, mba heya kutja amu ha wana nomundu ngu ritja eye omukambure omukweṋu, nungwari ngu tjita oruvakiro poo ongopo poo ngu rikotamena koomukuru vovisenginina poo omuyamburure poo ngwa ṱomeva wamururu poo erunga. Nu amu roro nangarire ingwi okurya ovikurya puna omundu ngu ri nai.

12-13 Nu hapo katjiungura tjandje okupangura ovandu mbe ha varerwa mombongo ya Kristus. Ndjambi omuini ongu meve pangura. Nungwari eṋe mu sokupangura ovandu wombongo yeṋu oveni. Omatjangwa maye tja: “Ingwi omunauvi nga isiwe mo mokati keṋu!”