Ovatjevere vondjuwo ya Muhona
1 Imbi ovyo oviungura mbya yandjewa kOvalevi, ovatjevere vopomivero vyondjuwo ya Muhona. Monganda ya Kora mwa ri Meselemia, omuzandu wa Kore, weṱunḓu ra Abiasaf. 2 Meselemia wa ri novanatje ovazandu hambombari, mba tjangwa otja koviwondo vyawo: OoSakaria na Jediael na Sebadja na Jatniel, 3 na Elam na Johanan na Eljoenai.
4 Wina pa ri Obed-Edom, ngwa serwa ondaya i Ndjambi mokumupa ovanatje ovazandu hambondatu otja koviwondo vyawo: OoSemaja na Josabad na Joak na Sakar na Netanel, 5 na Amiel na Isakar na Peuletai.
6-7 Semaja, otjiveri ra Obed-Edom, wa ri novazandu hamboumwe mba: OoOtni na Refael na Obed na Elsabad na Elihu na Semakia. Owo va ri ovarumendu ovananḓengu monganda yawo mena roupatje wawo ounene. Elihu na Semakja va ri ovarumendu omapatje tjinene povakwao.
8 Eṱunḓu ra Obed-Edom ra ri novarumendu omirongo hamboumwe na vevari, mba hongerwe otjiungura hi nawa tjinene.
9 Eṱunḓu ra Meselemia ra ri novarumendu omurongo na hambondatu, mba hongerwe nawa tjinene wina.
10 Monganda ya Merari mwa ri Hosa, ngwa ri novanatje ovazandu vane: OoSimri, ngwa zikwa omuhongore i ihe, nangarire kutja ka ri otjiveri, 11 na Hilkija na Tebalja na Sakaria. Ovandu veṱunḓu ra Hosa, mba ri ovatjevere vondjuwo ya Muhona, avehe kumwe va ri omurongo va vetatu.
12 Ovatjevere vondjuwo ya Muhona va haṋewa motupa otja komaṱunḓu wawo; nowo va pewa oviungura mondjuwo ya Muhona otja tji pa ri kOvalevi ovakwao. 13 Eṱunḓu arihe, nangarire kutja enene poo eṱiṱi, ra umba ozohanga kutja pe tjiukwe omuvero mbu ra sokutjevera. 14 Momaumbiro wozohanga Selemia wa pewa omuvero wokomuhuka, nomuzandu we Sakaria, omurumendu ngwaa yandja omaronga omawa aruhe, wa pewa imbwi wokeyuva kokunene. 15 Obed-Edom wa pewa okutjevera omuvero wokeyuva kokumuho, novazandu ve va pewa okutjevera omatuwo womapwikiro woviṋa. 16 OoSupim na Hosa va pewa okutjevera omuvero wokongurova na imbwi wa Saleket wondjira ndji yenda kombanda. Oviungura vyomatjeverero vya haṋewa motuveze tu twa tuwa po okukongorerasana. 17 Komukuma wokomuhuka kwa ri ovatjevere hamboumwe, mba ri motjiungura eyuva arihe peke, komukuma wokeyuva kokunene kwa ri vane, nu komukuma wokeyuva kokumuho kwa ri vane wina. Ovatjevere vane aave kurama pomatuwo womapwikiro woviṋa eyuva arihe peke, vevari petuwo rimwe na varwe vevari pekwao. 18 Popezu netuwo ehondjerwa rokongurova pa ri ovatjevere vane pondjira, na vevari pu indi ehondjerwa orini. 19 Imbi ombi ri oviungura vyomatjeverero mbya yandjewa konganda ya Kora na indji ya Merari.
Oviungura ovikwao vyondjuwo ya Muhona
20 Ovalevi ovakwao varwe va ri ovatjevere vovihuze vyondjuwo ya Muhona novomatuwo womapwikiro woviyandjewa mbya yapurirwa Ndjambi. 21 Ladan, ngwa ri umwe wonganda ya Gerson, wa ri ihe mukururume wotupa twomaṱunḓu pekepeke puna eṱunḓu romuzandu we Jehiel. 22 OoSetam na Joel, ovazandu ovakwao va Jehiel, va ri ovatjevere vovihuze vyondjuwo ya Muhona.
23 Oviungura mbi wina vya yandjewa kozondekurona za Amram noza Jishar noza Hebron noza Usiel.
24 Sebuel, omuzandu wa Gersom, omuzandu wa Moses, wa ri ohongora yokuṱakamisa ovihuze vyondjuwo ya Muhona. 25 Eye wa ri omuzamumwe wa Selomit ngwa za mu Elieser, omuangu wa Gersom. Elieser wa ri ihe ya Rehabja, ngwa ri ihe ya Jesaja, ihe ya Joram, ihe ya Sikri, ihe ya Selomit. 26 Selomit novandu veṱunḓu re va ri ovatjevere voviyandjewa mbya yapurirwa Muhona i ombara David noviuru vyomaṱunḓu novanane vovimbumba vyozonganda novahongore vovimbumba vyovita. 27 Owo va toora ovihuurwa tjiva, mbi va huura motjirwa, nave vi yapurire kutja vi ungurisiwe mondjuwo ya Muhona. 28 Selomit neṱunḓu re aave tjevere otjiṋa atjihe ngamwa tji tja yapurirwa okuungurisiwa mondjuwo ya Muhona puna oviyandjewa mbya eterwe i omuprofete Samuel, nombara Saul, na Abner, omuzandu wa Ner, na Joab, omuzandu wa Seruja.
Oviungura vyOvalevi ovakwao varwe
29 Mozondekurona za Jishar, Kenanja novazandu ve va pewa oviungura vyomatyero mbi: Okutyera Ovaisrael oviṋa, nokuvepangurira oviposa.
30 Mozondekurona za Hebron, Hasabja novazamumwe ve eyovi rimwe nomasere hambombari, avehe mba ri ovarumendu omapatje, va ri nourizirira woviungura vyokutya ovitjitwa mbi tjitirwa Ndjambi nombara mOisrael, komukuma wokongurova kwonḓonḓu Jordan. 31 Jerija wa ri omunane wozondekurona za Hebron. Mombura ndji omirongo vine youhona wa David mwa tjitwa omakonḓononeno weṱunḓu rozondekurona za Hebron; novarwe wovita omapenda, mba ri oveṱunḓu ndi, va munika kutja va tura mOjaser, mehi ra Gilead. 32 Ombara David wa toorora oviuru vyomaṱunḓu omapenda omayovi yevari nomasere hambombari movazamumwe va Jerija, ne ve twa moviungura vyokutya ovitjitwa, mbi tjitirwa Ndjambi nombara mehi ra Ruben nora Gad noromuhoko wa Manasse mbwa tura komuhuka.
© Herero Revision Bible © Bible Society in Namibia, 2021.
