David ma vara otjiwaṋa
(2Sam 24:1-25)1 Satan wa vanga okueta otjipo motjiwaṋa tja Israel, notja pukisa David kutja a vare ovandu. 2 David wa rakiza ku Joab na kovahongore ovakwao a tja: “Tuurungeye ehi ra Israel arihe okuza kOberseba nga kOdan, mu vare ovandu. Ami me vanga okutjiwa kutja mu novandu vengapi mehi ndi.”
3 Joab wa zira a tja: “Muhona nga takavarise otjiwaṋa tja Israel potumasere komurungu waindu pu tji ṱeki nambano. Muhona ombara, owo avehe ovakarere voye! Okutjavi tji movanga okutjita otjiṋa otja ihi, nokuturisa otjiwaṋa tjoye ondjo?” 4 Nungwari ombara David wa tjita kutja Joab a zuve komarakiza we. Joab otja pita na tuurunga ehi arihe ra Israel, nu tjazumba a kotoka kOjerusalem. 5 Eye wa hepura kombara David otjivaro atjihe tjovarumendu, mba yenena okuyenda kovita: Ovaisrael va ri 1,100,000, nOvajuda va ri 470,000. 6 Omarakiza wombara tjinga aya ri omavi ku Joab, eye otje ha varere omuhoko wa Levi nowa Benjamin.
7 Ndjambi wa nyengwa imbi mbya tjitwa, notja vera Ovaisrael. 8 David wa tja nai ku Ndjambi: “Ami mba tjita ourunde ounene komurungu woye tji mba tjita otjiṋa hi. Arikana, ndji isira; ami mba tjita ouyova.”
9 Muhona wa tja nai ku Gad, ingwi omuprofete wa David: 10 “Twende nu u karaere David kutja ami me mu pe oviṋa vitatu okutoorora. Ami me tjiti ngamwa ihi tji ma toorora.”
11 Gad otja ya ku David ne kemu raera imbi Muhona mbya hungira, na pura a tja: “Mo toorora tjiṋe? 12 Ozombura ndatu zourumbu poo omieze vitatu vyokutaura kovanavita na ove poo omayuva yetatu Muhona mu me ku rwisa nengaruvyo re, nu mu ma hindi omutjise omuzeu mehi roye, ama tjiti kutja omuengeri we a ete onḓiro kombanda ya Israel? Ami hi kazire vi ku Muhona?”
13 David wa zira ku Gad a tja: “Ami mbi ri mombamisiro onene. Hi nokuvanga okuverwa i ovandu. Nungwari Muhona nga rire ngwe ndji vere, eye tjinga e notjari.”
14 Muhona otja hinda omutjise omuzeu motjiwaṋa tja Israel: Nomayovi omirongo hambombari vawo va ṱa. 15 Ndjambi wa hinda omuengeri kutja a nyone Jerusalem wina; nungwari ingwi omuengeri tja ri pokutjinyona, Ndjambi otje rivingurura momutima na tja komuengeri: “Kurama, opuwo!” Omuengeri nai tjandje wa kurama potjitondero tja Arauna, ingwi Omujebusi.
16 David wa muna omuengeri a kurama pokati keyuru nehi, e nengaruvyo meke re, e rirongerere okunyona Jerusalem. David novanane votjiwaṋa tje, avehe mba zarere ovipiriko, va wa onḓurumika, omirungu vyawo amavi ṱunu mehi. 17 David wa kumba a tja: “Ndjambi, owami ngu mba tataiza. Owami ngu mba rakiza inga omavarero. Ovandu ovasyona mba va ungura tjike? Muhona, Ndjambi wandje, vera ami neṱunḓu randje, nu yama otjiwaṋa tjoye.”
18 Nomuengeri wa Muhona wa raera ku Gad, a rakize kutja David a katungire Muhona otjipunguhiro potjitondero tja Arauna, Omujebusi. 19 David wa zuva komarakiza wa Muhona, nai otja Gad punga e mu raerere. 20 Arauna novazandu ve vane aave tondo ovikokotwa. Nowo tji va muna ingwi omuengeri, ovazandu ve otji va tupuka nave kaṱara. 21 Nu Arauna tja muna David a meya kuye, otja isa ihi otjitondero ne ripete onḓurumika, omurungu we amau ṱunu mehi. 22 David wa tja nai ku ye: “Randisa otjitondero tjoye ku ami, mbi tungire po Muhona otjipunguhiro, okutjaera omutjise omuzeu. Ami me ku pe otjisuta tji tja yenene.”
23 Arauna arire tja tja nai ku David: “Otjo ho, kambura, muhona ombara, nu u tjite pu movanga. Ozongombe ozonduwombe zombunguhiro oningiririsiwa ozo nḓa, noviti vyotjitondero okuisapo ozonguṋe, novikokotwa vyombunguhiro yovirya ovyo mbi. Avihe me ku pe.”
24 Nungwari ombara ya zira ai tja: “Ayee, me ku sutu otjisuta tji tja yenene. Ami hi nokuyandja otjiṋa tji tji ri otjoye otja ombunguhiro ku Muhona, otjiṋa tji mbi hi nokusuta.” 25 Neye wa suta Arauna ovimariva ovingoldo omasere hamboumwe. 26 David wa tungira Muhona otjipunguhiro poṋa mbo, na punguhire po ozombunguhiro ozoningiririsiwa nozohange. Eye wa kumba, nu Muhona we mu zira nomuriro mbwa za meyuru nu mbwa ningiririsa ozombunguhiro kotjipunguhiro.
27 Muhona wa raera omuengeri kutja a twe pehi engaruvyo re; nomuengeri wa kara nonḓuviro. 28 David wa muna mu imbi kutja Muhona wa zuvira ongumbiro ye; neye otjaa punguhire ozombunguhiro kotjipunguhiro potjitondero tja Arauna. 29 Moruveze ndo Ondanda yOmahakaeneno ya Muhona, Moses ndja tungire mokuti onguza, notjipunguhiro kuya ku ningiririsirwa ozombunguhiro, tjandje ingee vi ri kondunda mOgibeon. 30 Nungwari David kaa sora okuyenda ngo okukerikotamena ku Ndjambi, tjinga aa tira engaruvyo romuengeri wa Muhona.
© Herero Revision Bible © Bible Society in Namibia, 2021.
