Ama Elob ge ǁōǁoasasiba ra mā
1 Xawe sats, sida Elots ge ǃgâi, ama tsî a ǃnūǃnâxa. Sats ge hoa xūna ǀkhommi ǀkha ra ǂgaeǂgui. 2 ǁOre da ka xawe da ge sa ǀgaiba a ǂan tsî a sa. Xawe sa da a ǃkhaisa da ǂan xui-ao da ge ǁore tide. 3 Satsa ǂans ge a ǀoasa ǂhanu-aisi. Sa ǀgaiba mûǂans ge ǁōǁoasasib di tsoatsoasa. 4 Sida ge ǀguis khami ī ǂkhaba xū-i, khoesi ǁkhāsib ǀkha kuruhe hâ-i, harebeoǃnâ xū-i, ǂkhau-aob xa ǂkhauhe hâ-i, tamas ka io ǁgôa-elo-i, ǃkharagaǃnâgu ǀûgu ǀkha ǂkhauhe hâ-i xas tsîna ǂgaeǂhapuhe tama ge i. 5 ǁNāti ī xūna mûs ge turaba gâ khoen ǃnâ ra ǂkhaiǂkhai tsîn ge ǁō hâ tsî ûio ība ra ǁkhore. 6 Khoe-i hoa-i ǁnāti ī xū-e kuru, tamas ka io ǁkhore, tamas ka io ra ǀgoreǀî-i ge ǂkhaba xū-e a ǀnam tsî ǁî-i ǃoaǂui hâ xū-e ra hō, ǁî-i di ǃâubasensa i ga ǁnā xū-i ǃnâ mâio.
ǂGoaǁgôa-elona ǀgoreǀîs di gâsib
7 Sūǂnubi-aob ge tsaura ǂgoa-e sîsenū tsî mâ xū-i hoa-e sada nî sîsenūga ra kuru. Hoa xūn ra ǁkhā ǂgoa-i ǀkha ǁkhā ǀgaub ai kuruhe xawen ge ǀnî xūna ǃgâise ra sîsenūhe xawe ǀnîn ose. Sūǂnubi-aob ǂûb ge mâ xū-i nî mâ ǂâibasens ǃaroma sîsenūhe ǃkhaisa ra mîǁgui. 8 Nē sūǂnubi-aob ge khoes ǀguisa ib, ǃnubu ǁaero-i ǃkharu hâse ge ǁîb tsîna ǃhūba xu kuruheba. ǂKhari ǁaero-i khaoǃgâb ga ǁîb di ǀoms hîab ǀkhupihe hâsa ǁkhaeǁnâ, ob ge ǁkhā ǃhūb ǃoa nî oa. ǁÎb ge a khoe xaweb ge harebeoǃnâ elona ǁkhā ǂgoa-i, sūdeb ra ǂnubi-ū-i ǀkha kurus ǀkha ra ǁaeǁore. 9 ǁÎb ûiǁaeb ge nî ǃnubu tsîb ge ǃhaese nî ǁō, xaweb ge ǁnā-i xas tsîna ǂâiǂhansen tama hâ. ǁÎb ge ǁnān hîa ǃhuniǀurib, ǀhaiǀurib, brons-i ǀkha xūna ra kurun ǀkha ǀnûgu ǂgao tsî ǁîn ra kuru xūn ǁkhāna ra kuru. ǁÎb ge kurub ge ǁgaeǁgaexūn ai kaise ǂnīsa. 10 ǁÎb di ǂgaob ge tsaoba xu kuruhe hâ. ǁÎb di ǃâubasens ge ǀurisasib di ǂganǀgaub xa a supu. ǁÎb di ûib ge ǁîb di ǂgoa-i tsîn xa a ǁau. 11 Nēn hoan ge ǁîba ge kuru Elob, ǁîba ǀomsa ǃnâiǂgāǃnâ tsî ge ûiba mābab ǂan tama xui-ao ge ī. 12 ǁÎb ge khoesi ûib ǀhurus ǀguisa īb, ǁamaguǃkhaib hōǂgāsab a hōxū ǁkhāb ti ǂâi hâ. ǁÎb ge ǂkhaba ǀgau-i ai ǀguis ka xaweb mari-e hōǂgā ǁkhā ǃkhais ǃnâ ra ǂgom. 13 Khoeb hîa ǁgôa-elon tsî khôaǁkhā sūna ǁkhā ǂgoa-i xu ra kurub ge nau khoen hoan ǃgâ-ai, ǁoreb ra ǃkhaisa a ǂan.
Egipteǁîn di ǁkharab
14 Xawen ge ǃKhūtse, khākhoen hîa gere sa khoena ǁgâiǀānna, hoaraga khoen ǃhūbaib ai hân ǃgâ-ai gâ tsî a ǁau. ǂKham ǀgôaron tsîn ge ǁîn xa ǃnāsase a ǁnâuǃāxa. 15 ǁÎn ge ǁîn di hoaraga ǀūbe ǁgôa-elon, mûdi ân ǀkha mû ǁoa, ǂguidi ân ǀkha ǀom ǁoa, ǂgaedi ân ǀkha ǁnâu ǁoa, ǀkhunugu ân ǀkha tsânana ǁoa tsî ǀnūgu ân ǀkha ǃgû ǁoan a ǁîn di elo ti ge ǂâi hâ i. 16 Gagasa ǀkhupis ǀguisa hîhe hâ khoeb ge ǁîna ge kuru. ǀGui khoe-i tsîn ge khoe-i ǀkha ǀguitikō elo-e a kuru ǁoa. 17 Mâ khoe-i hoa-i ge nēsi tamas ka i xawe ega nî ǁō, xawe ǁîb ǂkhabusa ǃomgu ǀkhab kuru hâ xū-i hoa-i ge tsoatsoasa xu ǀnai ǁō hâ. ǁÎb ǂûb ge ǀgoreǀîb ra-i xa a ama-ai. ǁÎb ge a ûitsama, xawe ǁîb ra ǀgoreǀîn ge ûitsama tama hâ tsî tātsē ge ûitsama tama hâ i. 18 ǁNāti ī khoen ge kaise ui-uisa ǀgurun tsî xamarin, ǂkhari ǁnâuǃāba ūhân tsîna ǃkhōǂgā hâna ra ǀgoreǀî. 19 ǀGurun tsî xamarin ase khoe-i xa ǂhâbahes tsînan ge anuba tama hâ. Elob ǂûb ge ǁîb ǃgâiǃgâibasens tsî ǀkhaebab ge nau kurusabena mā, xawe ǁîna ge ǃgûǃkharuǀkhā.
