Mâǁaets nî ǃhoa ǃkhaisa ǂans
1 Khoe-i ge tsū ǀgaub ai ǃgabehe ǁkhā. ǃGâi ka ǃkhais ge xū-e ǃhoas amǃnâs ai ǃnōsa. 2 Xawe ǃnāsase ǃgâi ǃkhais ge ǁaixa hâse hâs xa khoe-e ǃgabesa. 3 Tsūsets ga dīo ǂanǃgâ, ots ge taosiba nî ǂgōsen. 4 ǀGaib ǃnâ xū-e ǃhoadan ǂgaos ge dabisa khoeba ǀgôasa ǀgaiǃkhō ǂgaos ǁkhās khami ī. 5 ǀNî khoen ge ǃnōn ra xui-ao gā-ain a ti ra ǂâihe. Naun kaise ra ǃhoan ge ra ǃhuihe. 6 ǀNî khoen ge mîxū-en ūhâ tama, xui-ao ra ǃnō. Naun ge mâǁaen ǃhoa ǁkhā ǃkhaisan ǂan, xui-ao ra ǃnō. 7 Gā-ai khoe-i ge ǂhanu ǁaeb hā tama hîa ǃhoa tama, xawe ǂamaxa gâb ge mâb a ǂhanu ǁae ǃkhaisa a ǀū. 8 Khoe-i xare-i ge kaise gaxuse ǃhoa tsî nauna soa-e mā tama khoe-e taniǀnam tama hâ.
ǁUib ge ǃhaese ǀkhara ǁkhā
9 Tsūǃgâb ge ǀnî ǃnāde ǃgâiǃgâ kai ǁkhā, saogubese hâ ǃgâiǃgâb ge ǀnî ǁaeb ai ǂoaǃnâs kōse sī-ū tsi ǁkhā.
10 Māǂgaoxasib ge ǀnî ǃnāde ǃgâiba ǃkhōǂgāba tsi tama hâ, xawe nau ǁaegu ai ǀgamǃnâguse ra mādawa tsi.
11 ǃGôasib ge taosib xa saohe ǁkhā, xawen ge ǃgôaǁnâhe ge hâ i khoen, hîa ge ǃgôasib di ǃharos ai ǂoana hâ.
12 ǀNîn ge ǂgui xūna ǂkhariro-i ǀkha ra ǁama, xawe i ge ega ǃnāsa māǂuis ase ra ǂoaxa.
13 ǃGâi ǀgoraǃgâsa ūhâ khoe-i ga ǃhoa, o i ge ǂgui ǀhōsana ra hōbasen. Xawe gâre ǀgoraǃgâsa ūhâ khoe-i ge mâtikōse i ga ǂhanu-ai ǂgao, xawe mîdi ǀguide ra ǂkhôa. 14 ǁNāti ī khoe-i ga xū-e mā tsi, xawe i ge ǀgui ǀgau-i ais tsîna ǁî-i ǂâi hâ ǀgaub ǃnâ, ǃgâi-e harebeba tsi tide. 15 ǁÎb ge ǀorose ra māǂui, xawe ǃhūbaib hoaragab nî ǁnâuga, ǃgarise ra ǃhao. Nētsēb ga xū-e ǀkhupi tsi, ob ge ǁari ra ǂhâba-oa. 16 Ob ge ǁnā gâba nî mî: “ǀHōsa-i xare-e ta ūhâ tama; ǀgui-i tsîn ge tita xa i ra dībahena ǃgôaǃgâ tama hâ. Tita xan ra māhenan ra ǃkhōǃoa, xawen ge tita xa ti ǃgâb ai ra ǃhoa.” 17 Ama-eb ge ra mî! Mâ-i hoa-i mûǁaeb ge ǃhōxūse i.
Ūǃoaheǁoasa ǃhoa-ain
18 Nammi di ǂkhanusib ge ǀuiǂgapab ai ǂkhiris xa a tsū. Tsî ǂkhaba khoen ga ǁnā, os ge ǁnā ǃkhais tsîna ǃhaese ra ī.
19 Tsūǂū khoe-i ge ūǃoaheǁoasa ǃhoa-ain hîa ǂan-e ūhâ tama khoen xa ra ǃhoamahen khami ī.
20 Gâ khoe-i ǂhanu tama ǁaeb ai ra ǃhoa ǂkhoamî-i ge mâ khoe-i hoa-i xa ra ǂharahe.
21 Khoe-i ga ǀgâsib xa ǁoreba xu ǂhanihe o i ge ǀhapio ǂgaoǂans ǀkha sâsase hâ ǁkhā.
22 Khoe-i ge ǁî-i ûiba taosib ǃnâ-ū, tamas ka io ǁî-i di gâre īsib ǃaroma a ǂoaǃnâ ǁkhā.
23 ǀHōsa-ets ga hî-î, ti mîsats ra tao amaga xū-e mîmâiba, ots ge ǂhâbasa tama ǀgaub ai ǁî-e ra khākhoedī.
24 ǂHumib ge khoe-i ai ǁgaisi ǂnaos ase ī, ǁîb ge ǂansa ūhâ tama khoe-i di amǁgaugu ai hoaǁae hâ. 25 ǃNari-aob ge ǁnaetisa ǂhumi-aob ǃgâ-ai a ǃgâi, xawe kha ge hoakha hîkākāhesa garuba. 26 ǂHumi-aob ge ǃgôasi-e ūhâ tama hâ. ǁÎb ge ǀgui ǀgaub ǀguib ai taotaosasib ǃnâ ra ûi.
Gā-aisib di ǃereamxasib
27 Gā-aisets ga ǃhoa, ots ge ǃhūbaib ǃnâ nî aiǃgû. ǃGôaǃgôasa khoen ge ǃgâi ǁnâuǃāxasiba ra gangan. 28 ǁÎn ge sats xan ga ǃgâibahe, o sa dīsāde nî ǀûba tsi, xuige ǃhūba ǃkhāǃkhuri, î ǃgaosa ǂguiǂgui.
29 ǀKhaexūn ge gā-ai khoeb di mûde ra ǂgī kai; tsîb ge amaba ǃgāsase mû tsî ǁnān ǀkhaexūna ra māna ǀgoraǃgâ tama hâ.
30 Gowaǂuihe tama Gā-aisib ge sâusâuhe hâ ǁuib khami ī; hoakha ge harebeoǃnâ. 31 Khoe-i hîa ǁî-i di gâsiba ǂganǃgâsase ra ūhâ i ge ǁî-i di gā-aisiba ǁî-i ǃaroma ǀgui ra ūhâ i xa ǃnāsase a ǃgâi.
