Tobiti ǃgomsigu
1 Oms tawa ta ge oasī, o ta ge ǁkhawa ti taras, Annas tsî ti ôab Tobiab tsîra ǀkha ge ǀhao. ǃGaos di ǁÂudīb, Wekhegu di ǁÂudīb tis tsîna ra ǂgaiheb tawa ta ge ǁkhoaxa ǂûǀhaos tawa ǂû ta nîse ge ǂnû. 2 Mâtikō ǂgui ǂûn tāb ai mâ ǃkhaisa ta ge mû, o ta ge Tobiab ǃoa ge mî: “Ti ôatse, ǂoa î sada ǀaokhoen di ǀgui-i hîa Nineves di ǃhūsaben ǁaegu ǀgâsib ǃnâ ûi hâ, xawe Elob di mîmāde ra ǃkhōǀgaipe-e sī ôa. ǁNā-e sa ǀkha hā-ū, î-i nē ǁâudīb di ǂû-e sada ǀkha amǃnâxa. Tita ge sats oahā tamas kōse ǂûtsoatsoa tide.”
ǃGams Nineves ǃnâ
3 Tobiab ge ǃgûǂoa tsî ǁnāti ī khoe-e ge ôa. Xaweb ge ǃhaese oahā tsî “Ti îtse! Ti îtse!” ti ge ǂgaiǂui.
“Ā, tare-e?” ti ta ge ge dî.
“Sada khoen di ǀgui-i ge ǃgamhe hâ! Khoe-i ge ǁî-e ǃkhōdom tsî ǁî-i sorosa ǁamaguǃkhaib ǃnâ aoǁgui hâ.”
4 Tita ge urikhâi tsî ǂû-i tsîna tsâǀkhā tamase ǂoa tsî sorosa ǃganna xu ūǂui tsî ǂkhari sâuǃnâ-oms ǁga ge tani. ǁNāpa ta ge sores nî ǂgâs kōse, ega ta nî ǁkhōga sorosa ge sâu. 5 Oms tawa ta ge oahā, o ta ge ǁāsen tsî kai ǃoab ǀkha ti ǂû-e ge ǂû. 6 Kēbo-aob Amob ge Betels khoen ǃoa mî hâ i mîsa ta ge ge ǂâihō.
“Sadu ǁâudīgu ge ǃoab ǃnâ nî dabaǃkhunihe
tsî sadu dâxa ǁnaeba ǃgaetsanadi ǃnâ.”
Tsî ta ge ge ātsoatsoa.
7 Ega, sores ge ǂgâs khaoǃgâ ta ge ǂoa, ǀhoba-āsa sī khao tsî sorosa ge ǁkhō. 8 Ti ǁanǁare-aon ge ǃkhau ta hâ ti ge ǂâi. “Xū-i xare-ets ǁkhāǁkhāsen tama hâ?” tin ge ge dî. “Khoena ǁkhōs ǃaromats ge ǀnai ǃgomsib ǃnâ ge hâ i tsîts ge ǃkhoeni tamats ga hâ, o ga ǃgamhe hâ. Xawets ge ǁkhawa ǁkhā xū-i ǁkhā-e ra dī.”
Tobiti ge ge ǂgī
9 ǁNā tsuxuba ta ge ǁāsen tsî ǂoa tsî ti omǂnamib di ǂnubiǂgoab tawa ge ǁom. Tsuxub ge ge ǀgamsa i tsî ta ge danasa ge anaǂgan tama hâ i. 10 ǀHomaniron ge ǀgapika, ǂnubiǂgoab ai ǂnôa i ǃkhaisa ta ge ge ǀū i. ǃGūnai tama ta ge hâ i xui-aob ge ǁîn di ǀgamsa anixauba ǂgâmû te tsî ǃuri ǃurukha mûra âtara ai ge ǃaroma. Nē ǀaedī-aoba xu ta ge naub ǁga gere ǃgû, xawe ra ge ti mûra ǁîgu ra ǁîgu di sōǀôan ǀkha sōǀôadī tes kōse ǃaruǀîǀgui gere ǂkhabu, ǀunis ai ta ge hoaragase sī a ǂgīs kōse.
Haka kurigu ǀgaiba ta ge xū-i xare-e ge mû ǁoa i. Ti ǀaokhoen ge nē mâsib xa kaise gere ǂâiǂhansen tsîb ge Ahikara Elammi ǁgab nî ǃgûs aiǃâ ǀgam kurikha ge mâxōǀkhā te.
ǀAokhoen ǁaegu hâ ǂkhabab
11 Ahikari ge ǃgûs khaoǃgâs ge ti taras Annasa ge sîsenǃgû. Nau khoedi gere dī khamis ge mari-es nî hōǂgāse, ǁîs tsîna ǂgapusîsenni ǀkha ge tsoatsoa. 12 ǁÎs gere sîsenba khoen ge saranas ga dītoa tsî māǁnâ, o ǀgui gere matare si. ǀGuitsē, ǁhaoǁaeb ǃnâs ge dītoahe hâ saraba, rams hîa ra ǂgapu-aihesa xu ǃgaoǁnâ tsî ǂgan ge hâ i khoen ǁga ge ǃgû-ū. ǁÎn ge ǀoasa matares tsî ǁkhāti ǂkham piri-i tsîna ge mā si.
13 Annas ge piri-i ǀkha oms tawa oahā, o-i ge ge ātsoatsoa. O ta ge ǂan ǂgao tsî ge mî: “ǁNā piri-e mâpa xu i ra hā? ǀNîsis ǁî-e ǃnari tama? ǁÎ-e ǀhonkhoen â-i ǁga ǁaru-ū. ǃNarihe hâ ǂû-e ǂûs ge ǃgâi tama hâ!”
14 “Hî-î!” tis ge ge ǃeream. “ǀKhaexū-i ase ta ge ǁî-e ti matares tawa go ǀarobahe.” Xawe ta ge ǁîsa ǂgom tama ge i tsî ǁîs go ǃnari ti ta gere ǂâi ǃkhais xa ge tao. Tita ge ǁîsa ge mîmā, îs piri-e ǀhonkhoena sī mā-oa, xawes ge ǁîsa ǀuni mîsa ge ūhâ. “Nēsi ǀgui ta ge tarebe khoeǃnôats a ǃkhaisa amase ra mû!” tis ge ge ǂgaiǂui. “Sa māǂgaoxasib tsî ǂhauǃnâsiga mâpa hâ? Sats kom hoana a ǂano!”
