1 ǃKhūbats ga ǃao, ots ge nēsa nî dī. ǂHanubats ga ǁkhāǁkhāsen ots ge Gā-aisiba nî hō. 2 ǁÎb ge satsa ǁgûs tamas ka io ǂkham ǃgametaras khami nî ǁkhoreǁhare. 3 ǁÎb ge satsa gā-aisib tsî ǂans tsîra, ǂû-i tsî ā-i khami nî mā. 4 Mâxōǀkhās ǃaroma ǁîb ai ǂgomaiǂnûi, ots ge tātsē taotaohe tide. 5 ǁÎb ge satsa sa ǀgūkhoen ǃgâ-ai ǃgôasiba nî mā tsî ǂnûdi ǃnâts ga ǃhoa, o ǂhanu mîde nî mā tsi. 6 Sats ge ǃgâiaǂgaob tsî dâba nî hō tsîs ge sa ǀonsa ǀamose ǂâis ǃnâ nî ūhâhe.
7 Xawen ge khoen hîa gâ tamas ka io ra ǁorena tātsēs tsîna Gā-aisiba mûs xawesa hî tide. 8 ǁÎb ge tātsēs tsîna ǀgapiǂâixa khoen ǀkha dīxūxa tide tsî ǂhumi-aon ge ǁîb xa ǂâi tide. 9 ǁOre-aona koatsanade ǁnaes ge ǁîb ge ǁnāsa ǁîn di ǂgaogu ǃnâ ǂgā tama hâ i xui-ao ūǃoasa tama hâ. 10 ǁNaetsana-i ge gā-aisiba nî ǁgauǂui tsî ǃKhūb ǂûb xa nî ûi-ûihe.
ǃNorasa ǂgaoǀkhās
11 ǃKhūb ge ǁîb a ǃhuisa xū-e ǃaroma tama hâ, xuige tā ǃKhūba sa ǁoreb ǃaroma ǀhapimā. 12 Tā ǁîb xats ge ǂgaeǂhapuhe ti mî. ǁÎb ge ǁore-aon di huiba ǂhâba tama hâ, ǁîb di ǂâibasensa dīǀoaǀoas ǃaroma. 13 ǃKhūb ge ǂkhababa ǁîb di īsigu hoagu ǃnâ ǃhuisa tsî ǁnān ǃKhūba ra ǃaoǃgân ge ǁkhāti ǂkhababa ǀnam tama hâ. 14 ǃKhūb ge tsoatsoas ǃnâ khoena kuruo, ob ge ǁîna ǂgaon ra khamin nî dīga ǃnorasasib ǃnâ ge ǁnāxū. 15 ǂGaots kao, ots ge ǃKhūb di mîmāde nî ǃkhōǀgaipe tsî sats ge ǁîbats nî ǂgomǂgomsase hâbasa aitsama nî mîǀgui. 16 ǁÎb ge sa ais ai ǀaes tsî ǁgam-i tsîra ge mā, xuige sa ǃomma ǀhōǂui, î ǂhâbats hâ-e ū. 17 Sats ge ûib tsî ǁōb tsîkha ǁaegu ǁhûi ǁkhā, tsîts ge ǁhûits ra-e nî hō. 18 ǃKhūb di gā-aisib tsî ǁkhāsib tsîn ge a kai tsîb ge ǁîba mâ xū-i hoa-e ra mû. 19 Khoe-i ra dī xū-i hoa-eb ge a ǂan, tsîb ge ǁîba ra ǃaoǃgâna ra ǃûi. 20 ǁÎb ge ǀgui-i ân tsîna eloxoresa i nî ǃkhaisa mîmā tamas ka io ǁore i nî ǃkhaisa mā-am tama hâ.
