1 Tēr-ets ga tsâǀkhā, o-i ge nî ǂae-ai tsi, tsî ǀgapiǂâixa khoen di ǀhûhâsib ǃnâts ga hâ, ots ge ǁîn ǁkhān khami nî ī. 2 Tā satsa ǃgomba xū-e ūkhâitsâ tsî tā kaise ǃkhū hâ tsî sats xa ǃnāsa ǁkhāsiba ūhâ khoen ǀkha ǀguipa hâ. Sats ge ǂgoasū-e ǀuri ketels xōǀkhā ūhâ ǁoa; ǂgoasūs ge ketels ais ga ǂgâusen, o nî khôa. 3 ǃKhū hâ khoe-i ga tsūdī, o-i ge satsa tsûtsûs ǃaroma ǃkhāǃkhā tsi ǁkhā, xawe ǀgâsa-i ga tsūdī, o-i ge ǀûbaba i nî ǂgan ǃkhaisa ra ǁgarihe. 4 ǃKhū hâ khoe-i ge satsa xu i hōǂgāsa hō ǁkhas kōse nî sîsenū tsi, xawets ga satsa ǂhâsiba ūhâ, o i ge huiose nî ǁnāxū tsi. 5 ǁÎ-i ge xū-ets ūhâs kōse ǀgui sats ǀkha nî hâ tsî ǃgâiǂgaoxase, ǂnâts nîs kōse nî ǀgomǂuiǃnâ tsi. 6 Satsa i ga ǂhâba, o ǀnomba tsi tsî ǃgâise tsâ kai tsi, tsî khoexaǃnâ mîdi ǀkha nî gā tsi. ǁÎb ge ǃgâi ǀgaub ǃnâ satsa ǃhoa-ū tsî “Tare-e ta hui tsi ǁkhā?” ti nî dî. 7 ǁÎb ge ǃgâi ǂûxūn ǀkha nî taotao tsi. ǀUnis aib ge ǀgam tsî ǃnona ǃnādeb satsa ǀgomǂui ǃnâ hâs khaoǃgâ nî âiǂui tsi. Tsîts ga ega mû bi, ob ge satsa ǀū khami tanisen tsî sa xōǀkhā nî ǃgûǃkharu.
8 ǂAnbasen i tā ǂgaeǂhapuhe tsî sa ǃgâiaǂgaob ǃnâ ǃgamǃgamhe. 9 ǃGôaǃgôasa khoe-i xats ga ǁî-i di oms ǃoa ǁkhauǂuihe, o sa tanisens ǃnâ ǃkhō-oasen, o i ge nî ǁkhau ka ǁkhau tsi. 10 Aisǀkhāb ǃoats ga ǀgaiǁgū, o i ge nē ǃgôaǃgôasa khoe-e nî ǂhā-oa tsi. ǀNî ǀkhāb ai i ge ǁî-e xuts ga ǃnūse hâ, o nî ǀuru tsi. 11 Tā ǁî-i ǀkha ǀguiti dīsen tamas ka io ǁî-i ra mî xū-i hoa-e ǂgom. ǁÎ-i di gaxu ǃhoa-ain ǀkha i ge ra ǃâitsâ tsi.
12 Khoe-i ga ǂgomǃgâde ǃkhōǀgara tama i, o-i ge karosaǂgaoxa. ǁÎ-i ge satsa tsûtsûs tamas ka io ǃkhō-oms ǃnâ ǂgā tsisa îganǀgē tide. 13 Sa ǂganǃgâsiga ūhâbasen, î ǃaorosa ǃhūb aits ra ǃgû xuige ǃûisen.
15 Mâ ûitsama ǀguru-i hoa-i ge ǁî-i di īsib ǂûb xa a ǃgâibahe tsî khoen tsîn ge ǁnās ǁkhās xase i. 16 ǀGurun tsî xamarin ǀgui ǀgaub din ra ǀhao khamin ge khoen hîa ǀguiti-īna ra ǀhao. 17 ǁOre-aon tsî khoen hîa ra Eloba ǃaoǃgân ra ǃkharagagu khamin ge ǂhiran tsî ǁkhaon tsîna a ǃkharagagu. 18 ǃKhū hâ khoeb tsî ǀgâsa khoeb hâkha khākhoegu khami i ge ǂhira-i tsî ari-i tawas tsîna ī. 19 ǃKhū hâ khoe-i ge ǀgâsa-e, xamn ra ǃaub dâukina ǃaub ǃnâ ǃkhō khami ra ǃkhō. 20 ǀGapiǂâixa khoen ge xū-en ūhâ tama, xawe ǃgamǃgamsensa ra ǃgôaǁnâ tsî ǃkhū hâb ge ǁkhā ǀgaub ai ǀgâsab xa ra ǂâi. 21 ǃKhū hâ khoeb ga ǃnôa, on ge ǁîb ǀhōsana nî ūkhâi bi, xawe ǀgâsab ga ǁnā, on ge ǁîb di ǀhōsana ǁîb ǀkha ǁae tide. 22 ǃKhū hâ khoeb ga dīsā, on ge ǂgui khoena ǁîba ra hui tsî ra mâǂgāba tsî ǁîb ra mî xūn a ǂhanu ǃkhaisa ra mîǃgāǃgā. Xawe ǀgâsa khoeb ga dīsā, ob ge ǀnî xū-i ose ǀgoraǃgâs ǀguisa ra hō. ǁÎb ra mîn ǀkhab ga ǃgâiba ǂâibasen, xawe i ge ǀgui khoe-i tsîna ǃgâ bi tide. 23 ǃKhū hâ khoeb ra ǃhoa, o i ge mâ-i hoa-e ra ǃnō tsîn ge mîb ran ǃaroma ǁîba ra koa. Xawe ǀgâsa khoeb ga ǃhoa, o-i ge khoe-i hoa-e “Tari-e ǁnā-e?” ti ra mî. Tsîb ga tsū xū-e mî, on ge khoena ǁnā mîsa ǁnās ǃgâ-ai tsūse ra gom kai.
24 ǃKhūsis ge tsū tama hâ, hanats ga ǀhôagao ǀgaub ai ǁîsa hō tama io. Xaweb ge ǀgâsiba ǁkhāti tsū tama hâ, eloxoresan ǀguin ge ǁnāti ra ǂâi. 25 Khoen ga sa aisa ǃoa kō, on ge dâxats a tamas ka iots ra tsûaǂgao ǃkhaisa ra mû. 26 Dâxasibats ga hōǃâ, ots ge dâxase ra mûsen, xawe ǂkhoamîde dīs ge a ǀgaisa sîsen tsî ra tsau kai tsi.
