ǀGapipristeri Alsimub tsî Nikanori di ǀapemās
(2 Makabergu 14:1-362 15:1-36)1 ǀGuikaidisi tsî korodisiǀguiǀaǁî kurib ǃnâb ge Seleukub ôab, Demetriuba Romesa xu ǀoro khoegu ǀkha ǂoa tsî Mediteraneahurib amǃgâ ǂnôa ǃās tawa sī tsî ǁnāpa gao-aose ge ǂnûisen. 2 ǁÎb aboxagu di gao-ommi ǁgab garu, hîa gu ge toroǃkhamaoga Antioxub Koroǁîb tsî Lisiab hâkha, ǁîkha gu Demetriub ǃoa nî ǃgû-ūga ǃkhōsis ǃnâ ge ū. 3 Demetriub ge nēsab ge ǁnâuo, “Tita ge ǁîkha mû ǂgao tama hâ” ti ge mî. 4 O gu ge toroǃkhamaoga ǁîkha ge ǃgam, tsîb ge Demetriuba trons ai ge ǂnû.
5 ǁNāpa gu ge Alkimub hîa ge ǀgapiprister kai ǂgao hâ ib xa ǂgaeǂguihe hâse, ǂhanuoǃnâ tsî eloxoresa khoegu Israelǁaes diga ǁîb tawa ge sī. 6 ǁÎgu ge ǀhapiǂgā-amde nau Jodeǁîn ǃoagu ge hā-ū tsî ge mî: “Judab tsî ǁîb di ǃgâsagu ge satsa gere ǂkhâǃnâ khoen hoana ǃgam tsî sida, sida ǃhūba xu ge sauruǂui. 7 O da ge ra ǀapemā tsi, îts sats ǂgomǃgâ hâ khoe-e sîǂui, î-i sida xūn tsî gao-aob ǀkharib ǃnâ dīhe hâ ǂkhôaba sī kō tsî Judab, ǁîb ǃgâsagu tsî ǁîba ra ǂkhâǃnâ khoen hoan tsîna ǁkhara.”
8 Demetriub ge ǁîb di ǀapemā-aogu di ǀguib, Baxide ti ǀon hâb, Kai Siriab di gowonia iba ge ǁhûi. ǁÎb ge gaosib di ǂhâǂhâsa tsî gao-aob di ǂgomǂgomsa khoe ge iba. 9 ǁÎb ge eloxoresa Alkimub, gao-aob xa ge ǀgapipristerse ǁgaumâihe tsî Israelǁînab nî ǀkhao ǃkhaisa mîmāhe hâ ib ǀkha ge ǃgû. 10 ǁÎkha ge kai toroǂnubis ǀkha Antioxsa xu ǃgû tsî Judeab ǃnâ ge sī. Baxideb ge Judab tsî ǁîb di ǃgâsaga gāxaǃnâsa dītsâ tsî sîsabega ǂkhîb di mîdi ǀkha ǁîgu ǃoa ge sî. 11 Xawe gu ge Judab tsî ǁîb di ǃgâsaga, mâtikō kai toroǂnubis ǀkhab go hā ǃkhaisa gu ge mû, o sîsabegu di mîde ǂgom tama ge i.
12 ǂHanub di xoaǂansabegu ge Alkimub tsî Baxideb hâkha tawa hā tsî ǂhanu-aisib ǃaroma hā ge ǂgan. 13 Jodeǁîn ǃnâ ge hâ i eloǃaoǃgâxa khoegu ge Alkimub tsî Baxideb tsîkha ǀkha ǂkhîbagusa dīsa ǂgurose ge dītsâ. 14 ǁÎn ge Aronni di ôananôaguba xu ge hâ i pristeri Alkimuba ge ǂgomǃgâ, tsîn ge ǂkhôa-i xare-eb ǁîna dī tide, ti ge ǂâi hâ i. 15 Alkimub ge ǂkhîǂkhîsa mîdi ǀkha ǃhoa tsî ǁîn tsî ǁîn ǀgūkhoen tsîn ǂkhôa-i xare-e dīhe tide, ti ge nū. 16 Xaweb ge ǁîban ra ǂgomǃgâtsoatsoa hîa ǃnanidisi khoegu ǁîn diga ǃkhōsis ǃnâ ū tsî hoaga ǁnātsēs ǁkhās ai ge ǃgam. Xoas ra mî khami:
17 “Sa ǂgomǂgomsan di ǀaob ge ge ǂnâxūhe.
ǁÎn di sorodi ge Jerusalems ǃnâ ge aoxūǁguihe
tsî i ge ǀgui-i tsîna ǁō hâna nî ǁkhōse ǃgau tama ge i.”
18 Tsî nēn ge ī, on ge hoaraga khoena Alkimub tsî Baxideb tsîkha ǃao tsî ge mî: “ǁÎkha ge amab tamas ka io ǂhanu-aisib ra tare-e ǂâibasen ǃkhaisa a ǀū. ǁÎkha ge nū toa tsî nūsa ge khôa.” 19 Baxideb ge Jerusalemsa xu ǃgû tsî Betsaits tawa ǁîb hâǃkhaiba sī ge ǂnaumâi. ǁÎb ge ǂhanu-ai Jodeǁîn tsî ǁkhāti ǂhanuoǃnâ khoen ǁîba ge māsenxase saon tsîn nî ǃkhōsis ǃnâ ūhe tsî ǃgamhe tsî ǃgam tsaub ǃnâ aoǂgāhe ǃkhaisa ge mîmā. 20 Baxideb ge ǃhūba Alkimub di ǂgaeǂguis ǃnaka, ǂgui toroǃkhamaogu ǁîba nî huigu ǀkha ǁnāxū tsî gao-aob ǃoa ge oa.
21 Alkimub ge ǀgapiprister kaib nî ǃkhaisa ǀgaisase ge ǁgūbatsoatsoa. 22 ǁNā ǃhūb ǃnâ ge hâ i ǂkhabadī-ao-i hoa-i ge ǁîba ge sao. Tsîn ge Judeaba ǂgaeǂguisa ǁîn dise hō tsî Jodeǁîna kai ǃgomsiba gere mā. 23 Judab ge Alkimub tsî ǁîb khoegu xa ge dīhe ǂkhabadīb, Jodeǁî taman xa ge dīhe ǂkhôab xa a ǃnāsa ǃkhaisa ge mû. 24 ǁNā-amagab ge hoaraga Judeaba ǃgûǃnâ tsî Alkimuba māsenxase sao khoegu hoaga ge ǀkhao tsî ǁîga ǃāde xu ǂoa tsî ǃhūb ǃnâ ǂgâsa ge ǂkhā. 25 Alkimub ge Judab tsî ǁîb khoegu ra ǃaruǀî ǀgai ǃkhaisa mû, tsîb ge ǁîgab mâǃoa ǁoa ǃkhaisa a ǂano, gao-aob ǃoa oa tsî ǁîga ǂgui ǂkhabadīgu ai ge ǂkhabaǂgā-am.
26 Ob ge gao-aoba Nikanori, ǃgôahesa ǂamkhoegu di ǀguib, Jodeǁîna ge ǃhuisa iba, ǁînab nî hîkākā mîmās ǀkha ge sî. 27 Nikanori ge kai toroǂnubis ǀkha Jerusalems ǃoa ge hā. ǁÎb ge Judab tsî ǃgâsaga ǂkhîb mîdi ǀkha gere gā ǂgao. Tsîb ge ge mî: 28 “ǂKhaba-i ge sakhom ǁaegu hâ tide. Tita ge ǀoro aogu ǀkha, khoexaǃnâse khom nî ǃhoaǁarese sats tawa nî sī.” 29 Tsî Judab tawab ge sī, o kha ge ǂkhîb ǃnâ ge tawedegu, xawe gu ge Judab di khākhoega, ǁîba ǁgariǃgû-ūsa ǀnai ge ǂhomisen hâ i. 30 Judab ge Nikanori di saris gāxaǃnâsib xa hâǃnâhe ǃkhaisa ǂan tsî ǁîbab gere ǃao xui-ao, ǁîb ǀkha ǁkhawa ǀhaosa ǂgao tama ge i. 31 Nikanori ge ǁîb ǀapes ge ǂanǂuihe ǃkhaisa ǂan tsî Judab ǀkhab Kafarsalamas ǀgūse toroǃkhams ǃnâ nî ǀhaose Jerusalems ǃoa ge oa. 32 ǁAubexa gu ge korokaidisi toroǃkhamaogu Nikanori diga ge ǃgamhe tsî ǃgau ge toroǃkhamaogu ge Jerusalems ǃnâ ge mâ i ǁkhui-ommi ǃoa ge ǃkhoeni.
33 Nēn hoan khaoǃgâb ge Nikanora Sionǃhommi ai ge ǂoa. Tsî gu ge ǀnîgu pristergu diga, ǀnîgu kaigu digu ǀkha, ǁîba ǁkhoreǁhare tsî nî ǂkhîb di mîde mā tsî ǁkhāti gao-aob ǃaroma ge dīhe khauǁguibasa nî ǁgause Tempela xu ge ǂoaxa. 34 Xaweb ge ǁîga ǃhō tsî ǁîgab ge ǂara-ais ǀkha ǁîga ge ǃanuoǃnâ kai. ǁÎb ge ǀgapiǂâixase ǃhoa 35 tsî ǁaixa hâse nūs ǀkha ǁîga ge ǁgoaǂui: “Judab tsî ǁîb di toroǂnubis ga ǁnātimîsi tita māǁnâhe tama io, o ta ge ti dansa xu ta ga oahāo, nē Tempela nî ǂhubiǁnâ.” Tsîb ge kaise ǁaixa hâse ge ǃgû.
36 O gu ge pristerga omǂnamib ǃnâ ǂgâ tsî altars tsî Tempeli tsîra ǀkhāb ǁga ra kōse ge mâ. Tsî gu ge ā tsî ge ǀgoretsoatsoa: 37 “ǃKhūtse, sats ge nē Tempela sa ǀons ǃaroma, ǀgoreǃkhaib tsî sa khoen di ǃgamǃgamsens ǃkhaib ase ge ǁhûi. 38 Nēsi nē khoeb tsî ǁîb toroǃkhamaoga ǀkhao re, î gu nē torob ǃnâ ǁō. Mâtikōse gu gere sa xa ǂkhabase ǃhoa ǃkhaisa ǂâihō re, îb tā ǀguib âgu tsîna ûiǃgau.”
39 Nikanori ge Jerusalemsa xu ǃgû tsî hâǃkhaiba Bet-Horons tawa ge ǂnaumâi tsîs ge Siriab toroǂnubisa ǁnāpa ǁîb tawa ge ǀarosen. 40 ǁNā ǁaeb ǁkhāb ǃnâb ge Judaba ǃnonaǀoadisi khoegu ǀkha Adasas tawa hâǃkhaiba ge ǂnaumâi. Tsîb ge ǁnāpa ge ǀgore: 41 “ǃKhūtse, Xoas ge gao-aob ga satsa gu nî ǃkhāǃkhāse sîsabega sîǂui, ob sa ǀhomǃgāba ǂoa tsî ǀguikaidisi tsî ǁkhaisadisikoroǀaǀoadisi toroǃkhamaogu ǁîb diga nî ǃgam ti ra mîba da. 42 ǁNāti nē toroǂnubisa nētsē ǁkhā ǀgaub ai sida aiǃâ hîkākā re, î i mâ khoe-i hoa-e, Nikanori ge sa Tempelab ge ǃkhāǃkhā xui-ao ǁkharahe ǃkhaisa ǂan. ǁÎba ǁîb di ǂkhabadīgu ǃoa ǁkhara re.”
43 Toroǂnubidi ge disiǃnonaǀaǁî tsēs Adari dis ai toroǃkhams ǃnâ ge ǂgâ tsîs ge Nikanori di toroǂnubisa ge danhe. Nikanori ǂûb ge nē torob ǃnâ ǂgurose ge ǃgamhe. 44 Tsîgu ge ǁîb toroǃkhamaoga ǁōb go ǃkhaisa gu ge mû, o ǁîgu ǁâtanina aoxū tsî ge ǃkhoeni. 45 Jodeǁîgu ge ǁîga hoaraga tsēsa Adasa xu Gesers kōse ge ǃgôaǃgon. ǁÎga ǃgôaǃgon garuse gu ge xâiǁnâdi di ǀōb ǀkha toroba gere ǂanǂan. 46 Tsîn ge ǂnamipe ǁgoe ǃādi Judeab dide xu khoena ǂoaxa tsî hoa ǀkhāga xu ǃkhoeni garu khākhoega gere ǁnāǂam. Nēs ǀkha gu ge ǁkhawa ǁîga ge ǃgôaǃgon ǃgoaxa i Jodeǁîgu ǃoa ge sauru-oahe, tsî gu ge khākhoegu hoaga nē ǃkhams ǃnâ ge ǃgamhe. ǀGuib âgu tsîn ge ûiǃgau tama hâ.
47 Jodeǁîgu ge ǁkhâuǁnâgu ge xūn hoana ū tsî Nikanori di danas tsî amǀkhāb ǁôab hîab ge ǀgapiǂâixase ǀhōǂui hâ ib tsîra ge ǃgaoǁnâ. ǁÎgu ge ǁîb danas tsî ǁôab tsîra Jerusalems ǃauga nî ǁgauǂuihese ge hā-ū. 48 Jodeǁîn ǃnâb ge kai ǃgâiaǂgaoba ge hâ i. ǁÎn ge ǁnā tsēsa, ǁâudīb di ǀō-aisa tsēs ase ǂgaiǂui 49 tsî disiǃnonaǀas Adari dis nî kurikorobe ra dīhe ǁâudīb tsēs ase ǃgapaǀîhe ǃkhaisa ge mîmā. 50 ǂKhari ǁaerobab ge ǂkhîba Judeab ǃnâ ge hâ.
