Emoniko lomatemba ane
1 Ndele nda lyaamena vali, ndele nda mona, tala, omatemba ane a hovela okulinyenga e li pokati keemhunda mbali, neemhunda odo oda li doshikushu. 2 Etemba lotete la shilwa keenghambe domadiya, netemba etivali la shilwa keenghambe dilaula; 3 etemba etitatu la shilwa keenghambe ditoka, netemba etine la shilwa keenghambe domavala deenghono. 4 Opo nee ame onda pula omweengeli ou a popifa nge, ndele handi ti: “Omwene wange, ei otai ti ngahelipi?” 5 Ndele omweengeli okwa nyamukula nge ndele ta ti kwaame: “Oo eemhepo nhee dokeulu, tadi fikama okudja po eshi da kala koshipala shOmwene wedu alishe.” 6 Olo li neenghambe dilaula tali di po tali yuka kedu lokoumbangalanhu, naado di toka tadi i kouninginino. Ndele odo domavala tadi di po tadi yuka kedu lokoumbuwanhu. 7 Ndele odo di neenghono tadi fikama, ndele da hala di lyangaane nedu. Ndele ye okwa tya: “Indeni, nye mu lyangaane nedu!” Ndele oda lyangaana nedu. 8 Opo ye okwa ifana nge ndele ta ti kwaame: “Tala, odo tadi i kedu lokoumbangalanhu, otadi ka tulumukifa omhepo yange medu lokoumbangalanhu.”
Omulumenhu, edina laye Oshitutuma, ta xunganekwa
9 Ndele ondjovo yOmwene ye uya kwaame, tai ti: 10 “Tambula momake eenghwate Heldai, Tobia naJedaja. Inda nena eli keumbo laJosia yaSefania, mulo omo va fikilile eshi va dja kuBabilon, 11 ove u tambule oshisiliveli noshingoldo, u ninge oshishani ove u shi dike komutwe womupristeli omukulunhu Josua yaJosadak, 12 mu lombwela u tye: Omwene womatanga ovakwaita osho ta ti: Tala, omulumenhu edina laye Oshitutuma, te uya! Moshififinwa shaye oye ta ka tutuma. Ye ota ka tunga otembeli yOmwene. 13 Ota ka tunga otembeli yOmwene, ndele ta ka kala omunaenghono a fimana, ndele ta kala kolukalwapangelo ndele ta pangele. Ye ota ka kala yo omupristeli kolukalwa loupristeli nopokati kavo tapa ka kala ekwatafano lombili. 14 Ndele omutumbo u nokukala motembeli yOmwene u ninge edimbulukifo laHeldai nolaTobia nolaJedaja nolaJosia yaSefania.” 15 Ndelenee oonakukala kokule tave ke uya okutunga otembeli yOmwene. Opo nee nye otamu ka shiiva, nokutya Omwene womatanga ovakwaita Oye a tuma nge kunye. Ndele osho tashi ka kala, onye ngeenge tamu pwilikine shili ondaka yOmwene Kalunga keni.
© Oshikwanyama Bible Revised © Bible Society of Namibia, 2008, 2012.
