Oinima aishe oyo oyongaho
1 Eendjovo domuudifi, omona waDavid, ohamba yomuJerusalem.
2 Aishe oyongaho, omuudifi osho a ti. Aishe oyongaho, oinima aishe oyongahoelela! 3 Omunhu ote limonene mo shike mokulipyakidila oupyakadi waye keshe koshi yetango? 4 Epupi limwe tali piti po nepupi likwao tali uya po. Ndele edu tali kala po fiyo alushe. 5 Netango tali piti, netango tali ningine, ndee tali endelele okufika konhele oko tali ka pita. 6 Omhepo tai i kOumbuwanhu ndele tai pungulukile alushe; nomhepo tai alukile kedingililo layo. 7 Omilonga adishe tadi tondokele mefuta, ndelenee efuta itali yada. Konhele apa omilonga tadi di, oko tadi tondokele vali alushe.
8 Oinima aishe tai lipyakidile, kaku nomunhu ta dulu oku shi hepaulula. Eisho itali kuta kokutala nokutwi itaku yada kokuuda. 9 Shinya sha kala ko, osho tashi ka kala ko vali. Naashinya sha ningwa, otashi ka ningwa vali, ndele kape na ipe koshi yetango. 10 Ngeenge ope na sha tashi tiwa: “Tala, eshi oshipe!” Sho osha kala ko nale nokuli mounyuni wonale, we tu tetekela. 11 Kaku na edimbulukiwo lootatekulu. Nosho yo momapupi tae uya itapa ka kala edimbulukiwo kwaava tave va shikula.
Okulalakanena ounongo itaku eta elao
12 Ame omuudifi nda li ohamba yaIsrael muJerusalem. 13 Ndele nda tula omutima wange mokukonakona ounongo nokupanapana aishe oyo tai ningwa koshi yeulu. Oshilonga shidjuu osho Kalunga e shi pa ovana vovanhu, vo ve lipyakidile nasho. 14 Ame nda tala oilonga aishe oyo tai ningwa koshi yetango, ndele tala, oyo aishe oyongahoelela nokushikula omhepo. 15 Osho sha endama, itashi yukifwa; osho sha yongolwa, itashi valwa. 16 Ame nda popya nomwenyo wange, handi ti: “Tala ame nde likongela ounongo, naalushe ounongo ouhapu u dule woshito, u dule aushe waava va li nge komesho muJerusalem, nomutima wange wa mona ounongo uhapu nokushiiva kuhapu.” 17 Ndelenee omutima wange eshi nde u pungulula okukonga ounongo neshiivo, okuheneendunge noulai, onda koneka nokutya, nasho yo okushikula omhepo. 18 Osheshi apa pe nounongo uhapu, ope na yo oluhodi linene, nokushiiva ngeenge taku hapupala, ouyehame yo tau hapupala.
© Oshikwanyama Bible Revised © Bible Society of Namibia, 2008, 2012.
