Omhango yokudana Opaasa
1 Ndele momudo omutivali mohani yotete vo eshi va dja kuEgipiti, Omwene okwa popya naMoses mombuwa yaSinai ndee ta ti: 2 “Ovana vaIsrael ve nokudiinina Opaasa mefimbo la pangelwa. 3 Mefiku etimulongo netine mohani tuu oyo, onguloshi, mu noku i dana mefimbo la pangelwa. Nye mu noku i dana paenghedimhango dayo adishe nopalombwelo layo alishe.” 4 Opo nee Moses a lombwela ovana vaIsrael, vo ve nokudana Opaasa. 5 Ndele vo va dana Opaasa mombuwa yaSinai mefiku etimulongo netine lohani yotete, onguloshi. Naanaa Omwene ngaashi a lombwela Moses, osho ovana vaIsrael va ninga.
Opaasa itai liwa komunhu e linyateka koshimhu
6 Ndele pa li ovalumenhu ve linyateka koshimhu shomunhu ndele vo inava dula mefiku tuu olo okudana Opaasa. Onghee hano vo va ehena kuMoses naAron mefiku tuu olo, 7 novalumenhu ve mu lombwela: “Fye twe linyateka koshimhu shomunhu. Omolwashike fye hatu kelelwa okweetela Omwene eyambo mefimbo la pangelwa mokati kovana vaIsrael?” 8 Ndele Moses okwe va lombwela: “Kaleni apa, nda hala okuuda eshi Omwene te mu lombwele.”
9 Opo nee Omwene okwa popya naMoses ndee ta ti: 10 “Lombwela ovana vaIsrael u tye: Umwe womunye ile womomapata eni ngeenge te linyateke koshimhu ile ye e li moweenda kokule, ye e nokudana Opaasa kefimaneko lOmwene. 11 Mohani onhivali, mefiku etimulongo netine, onguloshi, ve noku i dana. Vo ve noku i lya nomingome dihe nonhafi noimbodi ilula. 12 Vo vaha xupifile sha shomuyo efiku lomongula ile vaha teye po ekipa lomuyo. Panghedimhango aishe yaPaasa ve noku i dana. 13 Ndelenee omulumenhu ou a yela ndele ke li moweenda ndee ta anye okudana Opaasa, na dimwe mo moshiwana shavo. Osheshi ye ina etela Omwene eyambo mefimbo la pangelwa. Omulumenhu ou ye e nokuhumbata etimba laye.
14 “Nomunailongo ou ha kala punye, ngeenge a hala okudana Opaasa yOmwene, ye e noku i dana panghedimhango yaPaasa nopalombwelo layo. Yo onghedimhango imwe aike kovanailongo novadalelwamo moshilongo.”
Oluudi loshilemo nolomundilo kombada yetwali liyapuki
15 Ndelenee mefiku tuu olo etwali liyapuki la dikwa, oshilemo sha tuvika etwali liyapuki, ndele onguloshi kombada yetwali londobwedi pa li ngaashi evadimo lomundilo fiyo okongula. 16 Osho ngaha sha kala alushe: oshilemo she li tuvika, ndele oufiku oluudi lomundilo. 17 Ndele shamha oshilemo she litumbu ko kombada yetwali, ovana vaIsrael ohava fikama po. Ndele ponhele apa oshilemo sha kanghama, opo Ovaisraeli hava ongo onhanda yavo, 18 palombwelo lOmwene ovana vaIsrael va fikama po, nopalombwelo lOmwene va onga onhanda. Omafiku aeshe fimbo oshilemo sha kala kombada yetwali liyapuki, vo ova kala monhanda. 19 Ndele oshilemo ngeenge sha kala omafiku mahapu kombada yetwali liyapuki, ovana vaIsrael va diinina oilonga yOmwene, ndele inava fikama po. 20 Ndelenee pomafimbofimbo oshilemo sha kala kombada yetwali liyapuki omafiku avali aeke, ndelenee palombwelo lOmwene vo ova onga onhanda ndele palombwelo lOmwene ova fikama po. 21 Ndele pomafimbo amwe oshilemo osha kala po okudja konguloshi fiyo okonguloshi ikwao, ndele shamha oshilemo she litumbu po ongula, vo ohava fikama po. Ngee nee omutenya ile oufiku oshilemo she litumba po, ohava fikama po. 22 Ngeenge oshilemo osha kala kombada yetwali liyapuki omafiku avali ile ohani imwe ile efimbo lile li dule olo ovana vaIsrael va kala opo ihava tembuka po. Ashike ngeenge oshe litumbu po, ohava tembuka. 23 Palombwelo lOmwene ova onga onhanda, nopalombwelo lOmwene ohava tembuka. Vo ova wanifa omayukifo Omwene palombwelo lOmwene ngaashi Ye a lombwela Moses.
© Oshikwanyama Bible Revised © Bible Society of Namibia, 2008, 2012.
