DANIEL 3 - Oshikwanyama Bible (OKYB)

Oshitelekwafano shoshingoldo shaNebukadnesar

1 Ohamba Nebukadnesar okwa ningifa oshitelekwafano shoshingoldo. Ofika yasho eemeta omilongo hamano, nounene washo eemeta hamano, ndele ye okwe shi dika molufilu laDura, momukunda waBabilon. 2 Opo nee ohamba Nebukadnesar oya tuma ovatumwa, va ka shive omalenga novakulunhu vovakwaita novapangeli voilongo noovene vomikunda novapukululi novadiinini voiyandjwa yoshilongo novatokoli novayakuli aveshe vamwe vomoilongo, okuya keyapulo loshitelekwafano eshi sha dikwa kohamba Nebukadnesar. 3 Opo omalenga novakulunhu vovakwaita novapangeli voilongo novapukululi novadiinini voiyandjwa yoshilongo novatokoli novayakuli aveshe vamwe vomoilongo ova shakavaena keyapulo loshitelekwafano sha dikwa kohamba Nebukadnesar, ndele va kala ofika koshipala shoshitelekwafano sha dikwa kuNebukadnesar. 4 Ndele omwiingidi okwa ingida pombada ta ti: “Onye oiwana nomaludi nomalaka, tamu shiivifilwa: 5 ngeenge nye tamu udu ondaka yomanghuma noyeenyalilo noyouyaayaa noyoushandje noyouxumbafeta noyoumbulumbubwa nondaka youxumba ve lili nove lili, opo nee nye omu nokulinyongamena poshi, ndele tamu ilikana oshitelekwafano shoshingoldo eshi sha dikwa kohamba Nebukadnesar. 6 Ndele ou ite linyongamene poshi ndele ita ilikana, opo tuu ta ka ekelwa mediko lomundilo.” 7 Opo nee oiwana aishe nomaludi nomalaka eshi ya uda ondaka yomanghuma noyeenyalilo noyouyaayaa noyoushandje noyouxumbafeta noyoumbulumbubwa nondaka youxumba ve lili nove lili, opo nee oiwana aishe nomaludi nomalaka oye linyongamena poshi ndele tai ilikana oshitelekwafano shoshingoldo, osho sha dikwa kohamba Nebukadnesar. 8 Opo tuu opo pe uya ovalumenhu vamwe Ovakaldea okupopya ko Ovajuda. 9 Ovo va lombwela ohamba Nebukadnesar, tava ti: “Tatekulu ohamba nai kale alushe nomwenyo! 10 Ove ohamba wa yandja ondaka nokutya, keshe omunhu ta udu ondaka yomanghuma noyeenyalilo noyouyaayaa noyoushandje noyouxumbafeta noyoumbulumbubwa noyouxumba ve lili nove lili, e nokulinyongamena poshi nokwiilikana oshitelekwafano oshingoldo, 11 ndele keshe ou ta anye okulinyongamena poshi nokwiilikana, oye na ekelwe mediko lomundilo. 12 Ndele oku na ovalumenhu Ovajuda ava wa lenga va kale ovakulunhu voshilongo shaBabilon, Sadrak, Mesak naAbednego. Ovalumenhu ava kave na ko na sha noshipango shoye, ohamba. Oikalunga yoye itave i fimaneke noshitelekwafano oshingoldo, we shi dika, itave shi ilikana nokulinyongamena.” 13 Opo Nebukadnesar okwa handuka nomehandu la xwama okwa yandja ondaka, ve uye, ava Sadrak, Mesak naAbednego. Opo nee ovalumenhu ova etwa koshipala shohamba. 14 Ndele Nebukadnesar okwa popya kuvo ta ti: “Sadrak, Mesak naAbednego, eshi itamu fimaneke oikalunga yange, nye itamu ilikana oshitelekwafano oshingoldo eshi nda dika, omwe shi ningila owina? 15 Paife eshi, ngeenge tamu udu ondaka yomanghuma noyeenyalilo noyouyaayaa noyoushandja noyouxumbafeta noyoumbulumbubwa nondaka youxumba ve lili nove lili, kaleni mwe lilongekidila okulinyongamena poshi nokwiilikana oshitelekwafano eshi nde shi ninga, opo nawa. Ndelenee ngeenge itamu ilikana, opo tuu opo tamu ekelwa mediko lomundilo. Ndele Kalunga ou te mu xupifa momake ange, olyelye?” 16 Sadrak, Mesak naAbednego ova nyamukula ndele tava lombwele ohamba tava ti: “Nebukadnesar, kape nomhumbwe tu ku nyamukule moshinima eshi nando ondjovo imwe. 17 Ngaashi Kalunga ketu ou hatu mu longele, ta dulu oku tu xupifa. Oye te ke tu xupifa mo mediko lomundilo nomomake oye, ohamba, 18 ndelenee, ngeenge hasho, kala u shi shii, ohamba, fye itatu longele oikalunga yoye, noshitelekwafano oshingoldo eshi wa dika, fye itatu shi ilikana.”

19 Opo nee Nebukadnesar okwa handuka unene noshipala shaye sha didivalela Sadrak, Mesak naAbednego. Oye a yandja elombwelo ndele ta ti, ediko nali hanyekwe li kale la hanya oupyu u dule luheyali oupyu wonale. 20 Ndele ye okwa lombwela ovalumenhu vamwe ovanaenghono vomovakwaita vaye, va ka mange Sadrak, Mesak naAbednego, va ekelwe mediko lomundilo. 21 Opo nee ovalumenhu ava va mangwa, ova li va djala oikutu ile neembaikifa nomambale noikutu yavo imwe, ndele tava ekelwa mediko lomundilo. 22 Molwaashi ondjovo yohamba oya li idjuu nediko ola pupyalekwa neenghono, omalaka omutemo womundilo okwa dipaa ovalumenhu venya, va ekela mo Sadrak, Mesak naAbednego. 23 Ndelenee ovalumenhu ava vatatu Sadrak, Mesak naAbednego, ova wila mo mediko lomundilo va mangwa.

24 Opo nee ohamba Nebukadnesar oya haluka noya yambuka, ya kala ofika. Ndele tai lombwele omalenga ayo, ndele tai ti: “Ongahelipi, inatu ekela momundilo ovalumenhu vatatu, va mangwa?” Ovo va nyamukula ohamba, tava ti: “Oshili, ohamba!” 25 Ndele ye okwa nyamukula, ta ti: “Taleni, ame ondi wete mo ovalumenhu vane, tave linyenge momundilo, ndele vo kave na nande oshiponga, omutine okwa fa omona waKalunga.” 26 Opo Nebukadnesar okwa ehena poshivelo shediko lomundilo, ndele ta ti: “Sadrak, Mesak naAbednego, onye ovapiya vaKalunga wOkombadambada, djeni mo, ileni oku! Opo nee Sadrak, Mesak naAbednego ova dja mo mediko lomundilo.” 27 Opo nee omalenga novakulunhu vovakwaita novapangeli voilongo novapukululi vohamba ova ongala, ndele va mona omundilo eshi wa nyengwa okuxwika omalutu ovalumenhu ava, noinau vava eexwiki dokomitwe davo, ndele inau lungwinifa omalwakani avo; navo vene inava nyika nande omuvavu.

28 Opo nee Nebukadnesar a popya, ta ti: “Kalunga kaSadrak, kaMesak nokaAbednego na hambelelwe, ou a tuma omweengeli waye ndele a xupifa ovapiya vaye, ve mu lineekela, vo va tauluka oshipango shohamba, ndelenee vo ove liyandja omalutu avo vaha fimaneke ile vaha ilikane kalunga kamwe, ndelenee Kalunga kavo aeke. 29 Onghee hano keshe oshiwana noludi nelaka tali sheke Kalunga kaSadrak, kaMesak nokaAbednego, oye na timbaulwe oinhimbu, neumbo laye tali ka ninga oshuumbo. Osheshi kape na Kalunga kamwe e shii okuxupifa ngaashi ou.” 30 Opo nee ohamba oya lenga Sadrak, Mesak naAbednego omalenga manene oshilongo shaBabilon.