1 EEHAMBA 21 - Oshikwanyama Bible (OKYB)

Nabot ta dipaelwa epya lomiviinyu

1 Ndele konima yoinima ei pa ningwa, Nabot, Omujisreel, okwa li e noshikokola shomiviinyu muJisreel, sha shaama nongulu youhamba waAhab, ohamba yaSamaria. 2 Ndele Ahab okwa popya naNabot ndele ta ti: “Pe nge oshikokola shoye shomiviinyu, shi ninge oshikunino shange sheembidi, osheshi sho shi li popepi nongulu yange youhamba. Ame ohandi ku pe oshikokola shomiviinyu shi dule osho, ile ngeenge wa hala, handi ku pe oimaliwa, ye shi yeleka.” 3 Ndelenee Nabot ta ti kuAhab: “Omwene na amene nge oku ku pa efyuululo lootate!” 4 Opo nee Ahab e uya keumbo laye e nomwenyo mwii nehandu omolwondjovo yaNabot, Omujisreel, oyo e i popya naye, nokutya: Ihandi dulu oku ku pa efyuululo lootate. Nokwa ka nangala mombete yaye, okwa pungulula oshipala shaye ndele ina lya omungome. 5 Opo nee omwalikadi waye, Isabel, te uya kuye ndele ta ti kuye: “Omolwashike wa ninga omwenyo mwii, nomolwashike ito li omungome?” 6 Nokwe mu nyamukula, ta ti: “Shaashi nda popya naNabot, Omujisreel, ndele nde mu lombwela: ‘Pe nge oshikokola shoye shomiviinyu, ndi shi lande noimaliwa, ile ngeenge wa hala, ame handi ku pe oshikokola shomiviinyu ponhele yasho.’ Ndelenee ye okwa nyamukula: ‘Ame itandi ku pe oshikokola shange shomiviinyu.’ ” 7 Opo nee omwalikadi waye, Isabel, ta ti kuye: “Haave mbela ho pangele Israel ngaashi ohamba? Penduka, lya omungome, nomwenyo woye nau hafe. Ame ohandi ke ku pa oshikokola shomiviinyu shaNabot, Omujisreel.” 8 Opo nee ye a shanga onhumwafo medina laAhab nokwe i hakifa noshihako shaye nokwa tuma onhumwafo kovakulunhu novanamadina vomoshilando shaNabot, ndele va kala pamwe naNabot. 9 Ndele monhumwafo okwa shanga ngaha: “Ingideni efiku lelidiliko, naNabot na kale omutumba komesho mokati kovanhu. 10 Novalumenhu vavali ovakolokoshi nava kale omutumba ve mu taalela, ve mu pwilikine noku mu lundila, va tye: ‘Ove wa tuka Kalunga nohamba!’ Nye mu mu pitife ndele mu ke mu dipaife nomamanya.” 11 Ovalumenhu vomoshilando shavo, ovakulunhu novanamadina, ovo va li moshilando shaye, va ninga ngaashi Isabel e va lombwela, ngaashi sha shangelwa monhumwafo e i va tumina. 12 Ova ingida efiku lelidiliko, ndele va kaleka Nabot omutumba komesho mokati kavo. 13 Opo nee ovalumenhu venya ovakolokoshi vavali, va kala omutumba moipafi yaye. Novakolokoshi ova hepaulula nokuhokololifa Nabot moipafi yovanhu, ndele tava ti: “Nabot okwa tuka Kalunga nohamba.” Opo nee ve mu twala pondje yoshilando ndele ve mu denga nomamanya nde ta fi. 14 Opo nee va shiivifila Isabel tava ti: Nabot a dengwa nomamanya nokwa fya.

15 Isabel eshi a uda nokutya: “Nabot okwa dipawa nomamanya nokwa fya,” Isabel ta ti kuAhab: “Penduka, kufa oshikokola shomiviinyu shaNabot, Omujisreel, osho ye e shi ku anyena oku ku pa noimaliwa. Osheshi Nabot ke nomwenyo, okwa fya.” 16 Eshi a uda nokutya, Nabot okwa fya, Ahab a penduka ndele ta i koshikokola shomiviinyu shaNabot, Omujisreel, e shi nangale. 17 Ndelenee ondjovo yOmwene ye uya kuElia, Omutisbi, ndele tai ti: 18 “Fikama, inda u ka shakeneke Ahab, ohamba yaIsrael, yo i li muSamaria. Tala, oku li moshikokola shomiviinyu shaNabot, oko a ya e ke shi nangale. 19 Ndele u nokupopya naye u tye: ‘Omwene ta ti ngaha: “Ove wa dipaa ndele wa kufa efyuululo?” ’ U noku mu lombwela vali u tye: ‘Omwene ta ti ngaha: “Monhele tuu oyo eembwa da lafa ohonde yaNabot, eembwa tadi ka lafa yo ohonde yoye mwene.” ’ ” 20 Opo nee Ahab ta ti kuElia: “Omutondadi wange ove, wa hanga nge nokuli mboli?” Ye okwa nyamukula: “Heeno, onde ku hanga nokuli. Osheshi ove we lilandifa po u ninge osho inashi yuka momesho Omwene! 21 Tala, Ame ohandi ku tumine omupya ndele handi ku kombo po ndele handi ka hanauna po sheke muIsrael oludalo alishe laAhab ovalumenhu. 22 Naame ohandi ka ninga eumbo loye ngaashi eumbo laJerobeam yaNebat, nongaashi eumbo laBaasha yaAhia, osheshi wa handukifa nge ndele wa hongaula Ovaisraeli okunyona. 23 Heeno, mokupopya Isabel, Omwene ta ti: ‘Eembwa tadi ka lya Isabel pohotekuma yomuJisreel.’ 24 Ndele ou womoludalo laAhab ta file moshilando, ta ka liwa po keembwa, ndele ou ta file poluhaela, ta ka liwa po keedila dokeulu.” 25 Oshili, inapa kala nande umwe ngaashi Ahab, ou e lilandifa po okuninga osho inashi yuka momesho Omwene, Osheshi omwalikadi waye Isabel e mu hongaula. 26 Ye okwa ninga shili oixuna, eshi a ka shikula oihongwakalunga, ngaashi Ovaamori va ninga, ovo va tewa kOmwene komesho yOvaisraeli. 27 Ndelenee Ahab eshi a uda eendjovo odo, okwa pombaula oshikutu shaye nokwa djala oshikutu sheefya kolutu laye longaho nokwe lidilika. Nokwa nangala yo e noshikutu sheefya ndele ta ende a mwena filu. 28 Opo nee ondjovo yOmwene ye uya kuElia, Omutisbi, tai ti: 29 “Ove wa mona tuu nhumbi Ahab e lininipika koshipala shange? Ye eshi e lininipika koshipala shange, itandi tumu omupya pomafiku aye. Pomafiku omona waye Ame ohandi ka etela eumbo laye omupya.”