Eshabata
1 Omwene Kalunga ota ti ngaha: “Oshivelo sholuumbo lomeni, eshi tashi taalele oushilo, shi nokukala sha patwa momafiku aeshe ahamano oilonga. Ndelenee mefiku lEshabata shi nokupatululwa, nosho yo shi nokupatululwa mefiku lohani ipe. 2 Ndele ohamba i nokuya mo moshivelo shomehale lopondje, yo i nokukala ofika pomunghulo woshivelo novapristeli ve nokulongekida exwikiloyambo layo nepanduloyambo layo. Ndele yo i nokwiilikana nokutwa eengolo poshikulo shonhu nokudja mo. Ndelenee oshivelo shiha idilwe po fiyo onguloshi. 3 Nosho yo ovanhu vomoshilongo ve nokwiilikana nokutwa eengolo poluvanda lwoposhivelo koshipala shOmwene momashabata nomafiku ohani ipe.
4 “Ndele exwikiloyambo li nokweetelwa Omwene kohamba mefiku lEshabata olo: oudjona vahamano vehe noshipo noshikombo oshindume shi noshipo. 5 Neendjayambo: eelita omulongo naheyali netata koshikombo oshindume. Ndelenee koudjona ye i tulilwe po eshi te shi dulu noku shi hala, ndele kukeshe nali tulilwe ko eelita nhatu domaadi.”
Ohani ipe
6 “Ndelenee mefiku lohani ipe: onhana yondume kai noshipo noudjona vahamano noshikombo oshindume, aishe ihe noshipo. 7 Nongaashi eendjayambo ye e nokulongekida ngaha: Eelita omulongo naheyali netata kongobe omhedi neelita nhatu koshikombo oshindume, ndelenee koudjona na tulilwe ko eshi te shi dulu. Eelita nhatu domaadi naa tulwe ku keshe.
8 “Ndele ohamba ngeenge tai i mo, yo i nokuya mo moshivelo shehale nokwaaluka nondjila tuu oyo. 9 Ndelenee oshiwana shoshilongo ngeenge tashi uya koshipala shOmwene momafimbo oivilo, ou ta i mo moshivelo shokoumbangalanhu okwiilikana e nokupitila mo moshivelo shokoumbuwanhu. Naau ta i mo moshivelo shokoumbuwanhu, e nokupitila mo moshivelo shokoumbangalanhu. Itashi dulika ye a shune nokuya pondje moshivelo omo e uya mo, ndelenee e nokupitila mo moshivelo she mu taalela moshipala. 10 Nohamba i nokweendela pamwe navo, ngeenge tava i mo nongeenge tava aluka ko, yo i nokwaalukila pamwe navo.
11 “Natango moivilo nomomafimbo oivilo eendjayambo di nokweetwa ngaha: Eelita omulongo naheyali netata kongobe yomhedi neelita omulongo naheyali netata koshikombo oshindume, ndelenee koudjona na tulilwe ko eshi te shi dulu. Eelita nhatu domaadi nadi tulwe kukeshe.
12 “Ndele ohamba ngeenge ya hala okuyamba eyambo inai li popya, ngeenge exwikiloyambo ile epanduloyambo ngaashi eyambo lokehaloliwa laye mwene, opo nee yo i nokuyeululilwa oshivelo tashi taalele oushilo, ndele yo i nokulongekida exwikiloyambo layo nepanduloyambo layo, ngaashi yo tai ningi mefiku lEshabata. Ndele ngeenge tai piti mo, vo ove nokwiidila oshivelo, ngeenge yo ya dja mo.”
Omayambo efiku keshe
13 “Keshe efiku u nokulongekida odi yomudo umwe ihe noshipo ngaashi exwikiloyambo kOmwene. Ongula keshe nye mu noku shi ninga. 14 Nongula keshe mu nokulongekida vali kulo ngaashi eendjayambo eekilograma mbali doufila, nolita imwe omaadi okushashamina oufila utoka. Oyo eendjayambo kOmwene; eenghedimhango daalushe fiyo okondongolondongo. 15 Osho ngaha hano vo ve nokulongekida odi neendjayambo nomaadi ongula keshe ngaashi exwikiloyambo fiyofiyo.”
16 Omwene Kalunga ta ti ngaha: “Ohamba ngeenge tai taulile omona wayo omumati oshitukulwa shomepya layo, hano osho sha ninga omufyuululwamukunda waye. Oo nau ninge wovana vaye ovamati. Oo eliko lavo lefyuululo. 17 Nongeenge yo tai yandje sha shomoshitukulwa shayo, tai shi pe umwe womovapiya vayo, osho nashi kale shaye fiyo ekuwililomudo, opo nee shi nokwaalulilwa ohamba. Osho eliko lefyuululo layo notashi ningi shovana vayo ovamati.
18 “Ndele ohamba ihe nokukufa omifyuululwamikunda dovanhu noku va ta mo momapya avo. Omepya layo mwene nai tukulile ovana oitukulwa, i ninge efyuululo lavo, paha kale omunhu womovanhu vange, a tewa mepya laye.”
Onhele yokutelekela omayambo
19 Ndele ye okwa twala nge, okwa endifa nge moluvanda li li pekuma lopomunghulo woshivelo, okomakololo a li a tongolelwa ovapristeli nokwa taalela lwokoumbangalanhu. Ndele tala, opa li pe nonhele kombinga yokonima langhele lwokouninginino. 20 Ndele ye okwa lombwela nge, ta ti: “Onhele oyo tuu ei omo ovapristeli hava teleke okuvelombediyambo netimbayambo, nomo hava teleke eendjayambo, opo vehe di twale koluumbo lopondje nokuyapula ngaha ovanhu.” 21 Opo nee ye okwa pitifa nge pondje koluumbo lopondje nokwa twala nge keekolonela nhee domoluumbo. Ndele tala, mokolonela keshe mwa li vali oluumbo. 22 Meekolonela nhee domoluumbo mwa li omaluumbo a idilwa: oule omaludimbo omilongo nhee nounene omilongo nhatu. Eenhele adishe edi domeekolonela di fike pamwe. 23 Ndele pa li ekuma la dingilila eekolonela odo, adishe nhee, ndele omo mwa ningilwa keembinga adishe eenhele dokuteleka. 24 Ndele ye okwa lombwela nge: “Oyo epata lovateleki nomo ovayakuli votembeli hava pake po omatomenoyambo ovanhu.”
© Oshikwanyama Bible Revised © Bible Society of Namibia, 2008, 2012.
