Esra te uya kuJerusalem
1 Ndele konima yoinima oyo mepangelo laArtasasta, ohamba yaPersia, Esra yaSeraja yaAsaria yaHilkia 2 yaSallum yaSadok yaAhitub 3 yaAmarja yaAsaria yaMerajot 4 yaSerahia yaUssi yaBukki 5 yaAbisua yaPinehas yaEliaser yaAron, omupristeli omukulunhu, 6 Esra oye tuu ou, a fikama a dja muBabilon. Ye okwa li omunongo womishangwa, omukoneki womhango yaMoses, oyo ya yandjwa kOmwene, Kalunga kaIsrael. Nohamba ye mu pa ashishe ye e shi hala, shaashi eke lOmwene, Kalunga kaye, la li kombada yaye. 7 Movana vaIsrael yo nomovapristeli nomOvalevi nomovaimbi nomovanangeli vopoivelo nomovayakuli votembeli mwa fikama vamwe okuya kuJerusalem momudo omutiheyali wohamba Artasasta. 8 Nove uya muJerusalem mohani onhinhano momudo omutiheyali wohamba. 9 Osheshi va dja muBabilon mefiku lotete mohani yotete, ndele mefiku lotete mohani onhinhano ova fika muJerusalem, shaashi eke liwa laKalunga kaye la li kombada yaye. 10 Osheshi Esra a paka omutima waye mokukonakona omhango yOmwene noku i shikula nokulonga Ovaisraeli eenghedimhango nomalombwelo ayo.
Onhumwafo yohamba Artasasta
11 Neshangululo lonhumwafo oyo ohamba Artasasta ya yandja kuEsra, omupristeli nomunongo womishangwa, ou a li omukoneki weendjovo doipango neenghedimhango dOmwene e di pa Ovaisraeli, olo ngaha: 12 “Artasasta, ohamba yeehamba, komupristeli Esra, omunongo womishangwa womhango yaKalunga komeulu. 13 Pashipango shange keshe umwe womoshiwana shaIsrael novapristeli vasho nOvalevi, ovo ve li moshilongo shange ndele va hala okuya kuJerusalem, nava ye pamwe naave; 14 osheshi ohamba novapukululi vayo vaheyali tave ku tumu, u konakone Juda naJerusalem pamhango yaKalunga i li meke loye; 15 ndele u twale ko oisiliveli noingoldo oyo ya yandjwa kehalo liwa kohamba nokovapukululi vayo ve i pa Kalunga kaIsrael, ongulu yaye i li muJerusalem. 16 Nosho yo oisiliveli noingoldo aishe to i mono moshitukulwalongo ashishe shaBabilon neeshali dehalo liwa, ovanhu novapristeli tave i yandje kongulu yaKalunga kavo muJerusalem. 17 Onghee hano noimaliwa ei paliudo loye u nokulanda eengobe deemhedi, eedi deemhedi, oudjona, neendjayambo noikunwayambo yado noku i yamba koaltari yongulu yaKalunga muJerusalem. 18 Oisiliveli noingoldo oyo tai xupu ko nye novakweni tamu i longifa pahalo laKalunga keni. 19 Ndelenee oinima we i pewa i longifwe moshilonga shomongulu yaKalunga koye, u noku i yandja moipafi yaKalunga muJerusalem. 20 Neemhumbwe dimwe dongulu yaKalunga ove to pumbwa vali oku di yandja, ove to dulu oku di pewa kelimba lomamona ohamba.
21 “Ndele ame ohamba Artasasta, ohandi lombwele ovapashukili aveshe vomalimba omamona vombinga yokouninginino waEufrat, nokutya, ashishe osho omupristeli Esra, omunongo womishangwa domhango yaKalunga komeulu, te mu pula, osho shi nokuwanifwa shili, 22 shi fike peekilograma omayovi atatu nomafele ane doshisiliveli neekilograma omayovi omulongo doilya, neelita omayovi avali domaviinyu, neelita omayovi avali domaadi, nomongwa itau valwa. 23 Ashishe Kalunga komeulu te shi mu lombwele, shi nokuwanifilwa shili naanaa ongulu yaKalunga komeulu, osheshi omolwashike ehandu li uye ngeno kombada yoshilongo shohamba novana vayo ovalumenhu. 24 Ndele ohatu mu shiivifile nokutya kaku na ou ta dulu okufendelifa ovapristeli nOvalevi aveshe novaimbi novanangeli poivelo novayakuli votembeli ile ovapiya vongulu ei yaKalunga: oimaliwa ile oilya ile efuto longaba.
25 “Ndele ove Esra, paunongo waKalunga ou u li meke loye, tula ovapashukili novatokoli okutokola ovanhu aveshe vokombinga yokouninginino waEufrat, aveshe ovo va shiiva omhango yaKalunga koye. Ndele ovo vehe i shii, ve noku i longwa. 26 Ndele keshe umwe, ou ita wanifa omhango yaKalunga, ye e nokuhokololifwa, nokutokolelwa efyo ile okutewa mo ile okufuta oimaliwa ile odolongo.”
27 Ndele Esra a tya: “Omwene Kalunga kootate na hambelelwe, ou e shi tula momutima wohamba nokutya, yo i nokuwapaleka ongulu yOmwene muJerusalem, 28 ou a fila nge onghenda koshipala shohamba nomoipafi yovakulunhu vayo nomoipafi yomalenga aeshe omanaenghono ohamba.
“Ndele ame onde linyatipaleka, shaashi eke laKalunga kange la li kombada yange, ndele ame nda ongela ovakulunhu vomuIsrael va ende pamwe naame.”
© Oshikwanyama Bible Revised © Bible Society of Namibia, 2008, 2012.
