2 SAMUEL 13 - Oshikwanyama Bible (OKYB)

Tamar ta fifwa ohoni Amnon ta dipawa

1 Konima yoinima ei pa ningwa, Absalom yaDavid okwa li e na omumwaina okakadona kawa, edina lako Tamar, ndele Amnon yaDavid okwa li e mu hokwa. 2 Ndele Amnon okwe liutameka omolwomumwaina Tamar. Ndelenee eshi a li okakadona, Amnon a tala ye ita dulu oku ka ningila sha. 3 Ndelenee Amnon okwa li e na kaume, edina laye Jonadab, omona womumwaina waDavid, Simea. Ndele Jonadab okwa li omulumenhu a lungama. 4 Ndele ye okwe mu pula: “Omolwashike to fipatele efiku nefiku ove omona wohamba? Ito shi shiivifile nge?” Opo nee Amnon ta ti kuye: “Ame nda hokwa Tamar, omumwaina waAbsalom.” 5 Opo nee Jonadab ta ti kuye: “Inda u ka nangale mombete yoye ndele to liningifa omunaudu. Xo eshi te uya oku ku talela po, mu lombwela: Ngeno omumwatate Tamar ne uye kwaame a pe nge sha shokulya. Ngeno ta pakele nge po eendja moipafi yange, opo ndi shiive oku di tala noku di tambula meke laye.” 6 Ndele Amnon okwa ka nangala ndele e liningifa omunaudu. Ohamba eshi ye uya oku mu talela po, Amnon ta ti kohamba: “Tuma omumwatate Tamar a pakele nge po oikuki ivali moipafi yange, ndi shiive okutambula meke laye.” 7 Opo nee David a tuma kuTamar mongulu ndele ta ti: Inda ko keumbo lomumwaxo Amnon u mu pakele po eendja. 8 Opo nee Tamar okwa ya keumbo lomumwaxe Amnon fimbo ye a nangala nokwa kufa olumbololo lomungome nokwe li lungila moipafi yaye nokwa yofa oikuki. 9 Ndele ye okwa kufa opana nokwe i xukula pomesho yaye, ndelenee ye a anya okulya. Ndele Amnon ta ti: “Aveshe nava dje po!” Ndele aveshe va dja po puye. 10 Opo nee Amnon ta ti kuTamar: “Eta eendja monduda yokunangala, opo ndi shiive okutambula meke loye.” Ndele Tamar okwa kufa oikuki e i ninga nokwe i twala monduda yokunangala komumwaxe Amnon. 11 Fimbo ye ta ehene po noku mu etela a lye, okwe mu kwata ndele ta ti kuye: “Omumwatate, ila tu nangale fye naave!” 12 Ndelenee ye ta ti kuye: “Alala, omumwatate! Ino fifa nge ohoni, osheshi oshinima sha tya ngaha itashi ka ningwa muIsrael. Ino ninga oshififahoni sha tya ngaha. 13 Ohandi ka yuka ngeno peni molwokufifwa ohoni kwange, naave yo oto ka talwa muIsrael oove elai? Popya hano paife nohamba, yo itai ke ku anyena nge.” 14 Ndelenee ye ina hala oku mu pwilikina, ndelenee okwe mu dula, nokwe mu fifa ohoni ndele ta nangala naye.

15 Opo nee Amnon e mu nyonyodola unene noku mu tonda, heeno, oku mu nyonyodola kwaye kwa li kunene ku dule ohole oyo kwa li e mu hole. Ndele Amnon ta ti kuye: “Penduka u dje po!” 16 Ndelenee ye okwe mu lombwela: “Owii ou kau shi ngeno munene, u dule winya we u ningila nge, ove eshi to taataa nge po?” Ndelenee ye ina hala oku mu pwilikina. 17 Opo nee ye a ifana omupiya waye ou te mu yakula ndele ta ti: “Taataa mo ou pwaame, ndele pata oshivelo konima yaye.” 18 Ndele okakadona oka djala oshikutu shile shi nomaoko male, osheshi ovana oukadona vohamba va li va djala oikutu ya tya ngaha fimbo va li oukadona. Ndele omupiya eshi e ka twala pondje nokwa pata oshivelo konima yaye, 19 Tamar okwa undila omute komutwe waye nokwa pombaula oshikutu osho shile shi nomaoko male. Opo nee e likwata ombadomutwe ndele ta ende nokulila pombada. 20 Nomumwaxe Absalom ta ti kuye: “Omumwaxo Amnon okwa li tuu naave? Mwena ashike paife, omumwatate! Ye omumwaxo. Ino ninga unene omwenyo mwii omolwoshinima osho.” Ndele Tamar okwa kala a efiwa meumbo lomumwaxe Absalom. 21 Ohamba David eshi ya uda oinima aishe oyo, oya handuka unene. 22 Ndelenee Absalom ina popya naAmnon nande owii ile ouwa, ndelenee Absalom okwa tonda Amnon, shaashi a fifa ohoni omumwaxe okakadona Tamar.

23 Ndele eshi pa pita omido mbali di yadi, Absalom okwa li e nekululo leedi muBaal-Hasor shomuEfraim, ndele Absalom okwa ifana ko ovana aveshe ovamati vohamba. 24 Ndele Absalom e uya kohamba ndele ta ti: Tala, omupiya woye e nekululo leedi. Ohamba novapiya vayo nava ye pamwe nomupiya woye. 25 Ndelenee ohamba tai ti kuAbsalom: “Ahowe, inatu yeni ko atushe pamwe, tuhe ku lolokife. Nande ye okwe i ilikana shili, yo inai hala okuya ko, ndele ye mu lekela.” 26 Opo nee Absalom ta ti: Ngeenge hasho, omumwatate Amnon na ye ko pamwe nafye. Ndelenee ohamba tai ti kuye: “Omolwashike ye e nokuya pamwe naave?” 27 Ndelenee Absalom eshi e i fininika nokupula, yo ya itavela Amnon novana ovamati aveshe vohamba va ye pamwe naye. 28 Ndele Absalom okwa lombwela ovapiya vaye ndele ta ti: “Taleni, omutima waAmnon eshi wa hafifwa komaviinyu ndele ame ohandi mu lombwele: Dipaeni Amnon! Opo nee mu noku mu dipaa. Inamu tila, osheshi ame nde shi mu lombwela. Kaleni mwa pama, ovalumenhwelela!” 29 Novapiya vaAbsalom va ningila Amnon ngaashi Absalom e va lombwela. Opo nee ovana aveshe ovamati vohamba va fikama, keshe umwe a londa kemula laye ndele va faduka po.

30 Fimbo va li natango mondjila, David okwa kundana taku tiwa: “Absalom okwa dipaa ovana aveshe vohamba, inapa xupa nande umwe womuvo.” 31 Opo nee ohamba ya pombaula oshikutu shayo ndele tai nangala pedu longaho, fimbo ovapiya vayo aveshe va li ofika puye ve noikutu ya pombaulwa. 32 Opo nee Jonadab yaSimea, omona womumwaxe waDavid ta ti: Omwene wange aha diladile nokutya, ovamati aveshe, ovana vohamba va dipawa. Amnon aeke a fya. Osheshi oshipala shaAbsalom sha holola owii okudja kefiku linya Amnon a fifa omumwaxe Tamar ohoni. 33 Hano omwene wange ohamba ihe shi tule momutima wayo nokutya, ovana aveshe ovamati vohamba va fya, osheshi Amnon oye aeke a fya.

Absalom ta i onhapo

34 Ndelenee Absalom okwa ya onhapo. Omumati ou a kala ofika nokunangela eshi a yelula omesho aye, okwa mona ongudu inene tai uya nondjila ya dja kuHoronaim. Okwa ya kohamba e ke i shiivifile osho a mona. 35 Ndele Jonadab ta ti kohamba: Tala, ovana ovamati vohamba tave uya. Sha ningwa pandjovo yomupiya woye. 36 Ndele naanaa eshi a xulifa okupopya, ovana ovamati vohamba ve uya va yelula ondaka yavo ndele tava lili. Nohamba yo novapiya vayo aveshe va lila nokulililila.

37 Ndelenee Absalom okwa ya onhapo nokwa ya kuTalmai yaAmmihud, ohamba yaGesur. Ndele David okwa li ta lili omolwomona waye efimbo alishe. 38 Ndele Absalom okwa ya onhapo nokwa ya kuGesur. Ndele oko a kala omido nhatu. 39 Nomhepo yaDavid ya djuulukwa unene a ye kuAbsalom, osheshi okwe lixupulifa molwefyo laAmnon.