Ouwanghenda waKalunga ounene u fike peni!
Epsalme laDavid, omupiya wOmwene; la pewa enyakwa lolwiimbo.
1 Enyono lomulunde tali popi momutima waye,
omesho aye itaa tila Kalunga nande,
2 osheshi olo tali mu shendjeleke momesho aye,
a longe owii waye,
aha mone ehalo loku u mu tondifa.
3 Eendjovo domokanya kaye odo oixuna nouketuketu,
okwa kaleka okulonga ounongo nouwa.
4 Mokunangala kwaye ota dutu okulonga owii,
ta hovele okweenda ondjila youmbudi,
ite u nyonyodola.
5 Omwene, ouwanghenda woye
otau hange fiyo okeulu,
noudiinini woye otau tu fiyo okoilemo kwi.
6 Ouyuki woye owa pama
ngaashi eemhunda daKalunga,
omatokolo oye oku li ngaashi
oule womeva efuta;
Omwene, Ove to kwafa omunhu noshinamwenyo.
7 Kalunga, ouwanghenda woye ounyenye u fike peni!
Ovana vovanhu ohava hondama
momudidimbe womavava oye.
8 Ovo hava kutifwa keondo longulu yoye;
Ove to va itavelele okunwa
momulonga wounyenye woye.
9 Osheshi mwoove omo omu nofifiya yomwenyo;
nomouyelele woye, omo hatu mono ouyelele.
10 Diinina ouwanghenda woye
kwaava tave ku shiiva,
nouyuki woye okwaava ve nomutima wa yela.
11 Ino efa omhadi yomulinenepeki i lyate nge,
nomake ovakolokoshi a taatae nge.
12 Oko ovaningi vowii va papala,
eshi va pundulilwa po, va shatwa pedu,
ndele itava dulu vali okufikama nande.
© Oshikwanyama Bible Revised © Bible Society of Namibia, 2008, 2012.
