Samuel ta ifanwa kOmwene
1 Ndele omumati Samuel okwa longela Omwene kokuulikilwa kuEli. Neendjovo dOmwene oda li da pumba pomafiku enya. Kakwa li omamoniko mahapu. 2 Mefimbo linya, fimbo Eli a nangala monhele yaye, omesho aye a hovela okutwika, ye ita dulu vali okumona ko, 3 nolamba yaKalunga inai dima natango, naSamuel okwa nangala a kofa motembeli yOmwene, omo mwa li oshikefa shaKalunga, 4 Omwene okwa ifana Samuel, ndele ye okwa nyamukula ta ti: “Aame ou!” 5 Opo nee ye okwa ya kuEli ndele ta ti: “Aame ou, owa ifana nge.” Ndelenee ye okwa nyamukula: “Ame inandi ku ifana; inda u ka nangale vali. Opo nee ye okwa ya a ka nangale. 6 Omwene okwa ifana vali Samuel, ndele Samuel okwa penduka ndele ta i kuEli ta ti: Aame ou, wa ifana nge. Ndelenee ye okwa nyamukula, ta ti: Ame inandi ku ifana omumwange. Inda nee hano u ka nangale vali.” 7 Ndelenee Samuel ina shiiva natango Omwene. Nondjovo yOmwene inai mu hololelwa natango. 8 NOmwene okwa ifana Samuel olutitatu. Ndele ye okwa penduka ndele ta i kuEli ndele ta ti: “Aame ou, osheshi ove owa ifana nge.” Opo nee Eli e shi dimbulukwa nokutya, Omwene okwa ifana omumati. 9 Onghee hano Eli okwa lombwela Samuel ndele ta ti: Inda u ka nangale, ndele Ye ngeenge te ku ifana, u nokunyamukula: “Popya Omwene, omupiya woye ta udu ko.” Opo nee Samuel okwa ya a ka nangale monhele yaye.
10 Opo nee Omwene e uya nokwa kala ofika ndele ta ifana ngaashi shito: Samuel, Samuel! Ndele Samuel okwa nyamukula: “Popya, osheshi omupiya woye ta udu ko.” 11 Opo nee Omwene okwa tya kuSamuel: “Tala, Ame ohandi ka ninga oshinima shimwe muIsrael, keshe ou te shi udu, omatwi aye avali otaa ka uma. 12 Mefiku tuu olo Ame ohandi ka wanifila Eli ashishe osho nde shi tongela epata laye, okehovelo fiyo okexulilo. 13 Ndele Ame ohandi ke mu hololela nokutya Ame ohandi tokola epata laye fiyo alushe omolwoulunde ou e u shii, osheshi ovana vaye ovamati ve lietela oshififohoni, ndelenee ye ine va handukila shili. 14 Onghee hano Ame ohandi anene epata laEli. Oshili, oulunde wepata laEli itau ka dimwa po fiyo alushe komatomenoyambo ile keendjayambo.”
15 Ndele Samuel okwa nangala fiyo ongula. Ndele ye okwa yeulula oivelo yongulu yOmwene. Ndelenee Samuel okwa tila okuhepaululila Eli emoniko olo. 16 Ndele Eli okwa ifana Samuel ndele ta ti: “Samuel, omumwange!” Ndele ye okwa nyamukula: “Aame ou!” 17 Opo nee Eli ta pula: “Ondjovo ei wa lombwelwa kuye otai ti shike? Ino i holeka nge. Kalunga ne ku handukile paife nokomesho, ngeenge to holeke nge sha shomudo Ye e di ku lombwela.” 18 Ndele Samuel okwe mu hepaululila eendjovo adishe, ine mu holeka nande sha. Ndele ye ta ti: “Oye Omwene. Ye na ninge eshi tashi mu wapalele.”
19 Ndele Samuel okwa kula, nOmwene a kala naye. Ndele ye ina efa nande ondjovo imwe yomeendjovo adishe i wile poshi. 20 Ndele Israel ashishe okudja kuDan fiyo okuBerseba sha shiiva nokutya, Samuel a tulwa po omuxunganeki wOmwene. 21 NOmwene okwa holoka vali muSilo. Osheshi Omwene okwa holokela Samuel muSilo meendjovo dOmwene.
© Oshikwanyama Bible Revised © Bible Society of Namibia, 2008, 2012.
