Ohambamutokoli te uya
1 Imbileni Omwene eimbilo lipe,
edu alishe, imbila Omwene!
2 Imbileni Omwene, tangeni edina laye,
efiku nefiku udifeni exupifo laye.
3 Hepaululeni oshinge shaye
mokati koiwana yovapaani,
noikumwifalonga yaye
mokati koiwana yoilongo.
4 Osheshi Omwene omunene,
noku nokufimanekwa pombada,
oha tilika komesho yookalunga aveshe;
5 osheshi ookalunga aveshe voiwana, ovo oikalunga,
ndelenee Omwene Oye Omushiti womaulu.
6 Etumbalopangelo noshinge otai mu tetekelele,
eenghono nevilimo otai yadifa ouyapuki waye.
7 Oiwana yovapaani nye, tumbalekeni Omwene,
mu peni efimaneko neenghono.
8 Yandjeni kOmwene efimano ledina laye,
eteni oiyambifo, mu uye momikala daye.
9 Linyongameneni Omwene, mwa djala ouyapuki,
edu alishe, kakama koshipala shaye.
10 Udifeni mokati kovapaani mu tye:
“Paife Omwene Oye ohamba.
Nongonga yedu okwe i pameka, ihe linyenganyenge;
ota ka tokolela oiwana pauyuki.”
11 Eshi, eulu nali shi nyakukilwe, nedu nali kuwilile.
Omeva efuta naa ngungume, naashishe tashi ilauka mo.
12 Omatunda naa nyakukwe, naashishe eshi sha hapa mwoo.
Opo omiti adishe domofuka tadi hovele okukuwilila
13 koshipala shOmwene, osheshi Ye ote uya,
heeno, ote uya okutokola edu;
ota ka tokola ongonga yedu mouyuki,
noiwana yoilongo paudiinini waye.
© Oshikwanyama Bible Revised © Bible Society of Namibia, 2008, 2012.
