Efyo laMirjam
1 Ndele eongalo lovana vaIsrael, eshi la fika mombuwa yaSin, mohani yotete, ovanhu va onga onhanda muKades. Ndele Mirjam okwa fila ko, oko a pakwa.
Omeva omemanya
2 Ndelenee eongalo la li lihe nomeva. Opo nee va ongalela Moses naAron. 3 Novanhu va twa eemhata naMoses, ndele vo va popya, tava ti: “Akutu, ngeno twa file pamwe navakwetu, vo eshi va fila koshipala shOmwene! 4 Nomolwashike nye mwa eta eongalo lOmwene mombuwa ei, opo fye noimuna yetu tu fye po? 5 Nomolwashike mwe tu kufa mo muEgipiti mu tu ete monhele ei ii? Kai fi onhele yoilya ile yeenghwiyu ile yoikokola yomiviinyu ile yomiti dagranate. Navali pehe nomeva okunwa.” 6 Opo nee Moses naAron va dja po peongalo, va ya koshivelo shetwali leongalo, ndele va wila eombe. Opo nee oshinge shOmwene she va holokela.
7 NOmwene okwa lombwela Moses ndee ta ti: 8 “Kufa onhaili, shiva eongalo, nye nomumwanyoko Aron, ndele lombweleni emanya moipafi yavo. Opo nee lo otali ka yandja omeva alo. Osho ngaha hano to va kungulukifile omeva, ndee to nwefa eongalo noimuna yavo.” 9 Opo nee Moses okwa kufa onhaili koshipala shOmwene ngaashi Ye e mu lombwela. 10 Ndele Moses naAron va ongaleka eongalo komesho yemanya, ndele ye okwe va lombwela: “Udeni hano ovanandubo nye! Otu noku mu kungulukifila omeva memanya eli?” 11 Opo nee Moses okwa yelula eke laye ndee ta denge emanya luvali nonhaili yaye. Ndele omeva mahapu a dja mo, opo eongalo ola nwa nosho yo oimuna yovanhu. 12 Opo nee Omwene okwa lombwela Moses naAron, ndee ta ti: “Nye eshi inamu itavela nge opo mu yapule nge moipafi yovana vaIsrael, onghee hano nye itamu ka twala eongalo eli medu linya nde li mu pa.” 13 Oo hano omeva eemhata, omeva oMeriba, ovana vaIsrael oko va twifila Omwene eemhata, Oye nokwe ve lishiivifila omuyapuki.
Israel muEdom
14 Opo nee omo muKades Moses okwa tuma ko ovatumwa kohamba yaEdom: “Omumwanyoko Israel ta ti ngaha: Ove mwene wa shiiva omaudjuu aeshe e tu hanga. 15 Ootate yetu va tembukila muEgipiti ndele fye otwa kala omafiku mahapu muEgipiti. NOvaegipiti ve tu hepeka fye nootate. 16 Opo nee fye twa kuwila Omwene ekwafo, ndele Ye okwa uda ondaka yetu. Ye okwe tu tumina omweengeli waye ndele okwe tu pitifa mo muEgipiti. Fye otu li paife muKades, oshilando shopongaba yoshilongo shoye. 17 Tu itavelela tu taulule moshilongo shoye; fye itatu ka enda momapya ile moikokola yomiviinyu, ndele itatu ka nwa omeva meendungu. Fye ohatu ka enda melila linene lohamba. Itatu ka yapuka nande kolulyo ile kolumosho, fiyo twa taulula moshilongo shoye.” 18 Ndelenee Edom okwe mu nyamukula ta ti: “Ahowe, ito ka taulula moshilongo shange. Ndele ngeenge to shi hetekele, ame ohandi ke ku shakeneka neongamukonda.” 19 Opo nee ovana vaIsrael ve mu lombwela: “Fye ohatu ka enda melila linene, ndele ngeenge hatu nu omeva oye, ame noimuna yange, ohandi ke ku futa. Itavela ndi taulule handi ende kolupadi; kape na sha shimwe.” 20 Ndelenee ye okwa nyamukula ta ti: “Nye itamu ka taulula nande!” Ndele Edom okwa fikama nomatanga mahapu neenghono dinene a ka lwe naye. 21 Osho ngaha hano Edom okwa anya okwiitavelela Israel okutaulula moshilongo shaye Opo nee Israel okwa dja po puye.
Okufya kwaAron
22 Novana vaIsrael, eongalo alishe, va dja mo muKades, ndele ve uya komhunda yaHor. 23 NOmwene okwa lombwela Moses naAron pomhunda yaHor pongaba yoshilongo shaEdom, ndee ta ti: 24 “Aron na ongelwe mo, a ye kovakwanepata vaye, osheshi ye ite ke uya medu olo nde li pa ovana vaIsrael, shaashi nye mwa li mwa anya elombwelo lange pomeva aMeriba. 25 Kufa Aron nomona waye Eliaser, ndele va twala komhunda yaHor. 26 Ndele Aron mu dula oikutu yaye ndele i djaleka omona waye omumati Eliaser. Ndele oko Aron ta ka ongelwa kovakwanepata vaye, ndee ta fi.” 27 Opo nee Moses okwa ninga ngaashi Omwene e mu lombwela: Vo ova londa komhunda yaHor moipafi yeongalo alishe. 28 Ndele Moses okwa dula Aron oikutu yaye, ndele e i djaleka omona waye Eliaser. Ndele Aron okwa fila ko koxulo yomhunda; ndelenee Moses naEliaser va londoloka komhunda. 29 Neongalo alishe eshi la mona nokutya Aron okwa fya, eumbo alishe laIsrael ola lila eefya daAron omafiku omilongo nhatu.
© Oshikwanyama Bible Revised © Bible Society of Namibia, 2008, 2012.
