OVATOKOLIPANGELI 13 - Oshikwanyama Bible (OKYB)

Okudalwa kwaSimson

1 Novana vaIsrael eshi va ninga vali eshi inashi wapala momesho Omwene, Omwene e va yandja momake Ovafilisti omido omilongo nhee.

2 Ndele pa li omulumenhu umwe wokuSorea, womepata lOvadan, edina laye Manoah. Nomwalikadi waye okwa li ongadji ndele okwa li ehe novana. 3 Ndelenee omweengeli wOmwene okwe lihololela omwalikadi ndele ta ti kuye: “Tala, oove ongadji, ndele wa li uhe nounona, ndelenee ove oto ka ninga oufimba ndele to ka dala okaana okamati. 4 Lungama hano uha nwe omaviinyu ile oikunwa tai kolifa ndele ino lya sha, osho inashi yela. 5 Osheshi tala, ove oto ka ninga oufimba nokudala okaana okamati, noshimbi shiha kume omutwe waye. Osheshi omumati ta ka kala Omunasiri waKalunga nghee e li medimo laina, ndele ye ota ka hovela okuxupifa Israel momake Ovafilisti.” 6 Opo nee omwalikadi e uya mo ndele ta popi nomulumenhu waye ta ti: “Omulumenhu waKalunga e uya kwaame, nolupe laye la li ngaashi olupe lwomweengeli waKalunga, la tilika unene. Ndelenee inandi mu pula apa a dja, ndele ina shiivifila nge edina laye. 7 Ndelenee ye okwa lombwela nge: Tala, ove to ka ninga oufimba nokudala okaana okamati. Ino nwa hano omaviinyu ile oikunwa tai kolwifa. Ndele ino lya sha osho inashi yela. Osheshi omumwoye ta ka ninga Omunasiri waKalunga nghee e li medimo laina fiyo okefiku lefyo laye.” 8 Ndele Manoah okwa indila kOmwene ndele ta ti: “Akutu Omwene, omulumenhu waKalunga, ou we mu tuma, ne uye vali lumwe kufye, opo ye e tu longe nhumbi tu nokuninga nokaana okamati aka taka ka dalwa.” 9 Ndele Kalunga okwa uda ondaka yaManoah, onghee omweengeli e uya vali lumwe komwalikadi, fimbo ye a li omutumba mepya nomulumenhu ina kala puye. 10 Nomwalikadi okwa tondoka diva nokwa lombwela omulumenhu waye ndele ta ti kuye: “Tala, omulumenhu winya e ile po ongheleinya, e uya kwaame.” 11 Opo nee Manoah a fikama nokwa tondoka nokushikula omwalikadi waye, ndele te uya komulumenhu ndele te mu pula: “Oove omulumenhu ou a popya nomwalikadi?” Ye ta ti: “Heeno.” 12 Opo nee Manoah ta pula ta ti: “Eendjovo doye ngeenge tadi wanifwa, omona ota ka kalwa ngahelipi naye, nota tekulwa ngahelipi?” 13 Opo nee omweengeli wOmwene ta ti kuManoah: “E nokulungama ashishe osho nde shi lombwela omwalikadi. 14 Ashishe eshi tashi di komuviinyu aha lye sha. Nomaviinyu ile oikunwa tai kolwifa aha nwe, ndele aha lye nande sha osho inashi yela. Ashishe eshi nde shi mu lombwela ye e na oku shi diinina.” 15 Manoah ta ti komweengeli wOmwene: “Hatu ku indile u teelele, fimbo hatu ku lilongekidile okakombwena.” 16 Nomweengeli wOmwene okwa nyamukula Manoah: “Nande mu teelelife nge, ame ihandi ka lya komungome weni. Ndelenee ngeenge mwa hala okuyamba exwikiloyambo, li yambeleni Omwene. Osheshi Manoah ina shiiva nokutya, winya omweengeli wOmwene.” 17 Opo nee Manoah ta pula omweengeli wOmwene: “Edina loye, oove olyelye, opo tu shiive oku ku fimaneka, ondjovo yoye ngeenge tai wanifwa.” 18 Nomweengeli wOmwene ta ti kuye: “Omolwashike to pulile nge edina lange, osheshi lo olikumwifa?” 19 Opo nee Manoah okwa kufa okakombwena neendjayambo ndele te di yambele Omwene kemanya. Omwene okwa longa oshikumwifa moipafi yaManoah nomwalikadi waye: 20 elaka lomundilo wokoaltari eshi tali yeluka pombada, omweengeli wOmwene okwa ya pombada melaka lomundilo. Ndele Manoah nomwalikadi waye ove shi mona ndele va wila eombe. 21 Nomweengeli wOmwene ine lihololela vali Manoah nomwalikadi waye. Onghee hano Manoah okwe mu dimbulukwa ye omweengeli wOmwene. 22 Ndele Manoah ta ti komwalikadi waye: “Fye ohatu ka fya shili, shaashi twa mona Kalunga.” 23 Ndelenee omwalikadi waye ta ti kuye: “Omwene ngeenge a hala tu fye, Ye ngeno ina tambula momake etu exwikiloyambo neendjayambo noku tu monifila oinima ei aishe noku tu udifila oinima ya tya ngaha.” 24 Nomwalikadi okwa dala okaana okamati nokwe ka luka Simson. Nokaana ka kula nOmwene e mu nangeka noupuna. 25 NOmhepo yOmwene ya hovela oku mu endifa monhanda yaDan pokati kaSorea naEstaol.