Oshilando shohonde
1 Ondjovo yOmwene ye uya vali kwaame, ndele tai ti: 2 “Ndele ove, kaana komunhu, wa hala okutokola? Wa hala okutokola oshilando shohonde? Hano shi shiivifila oixuna yasho aishe; 3 u tye: Omwene Kalunga ta ti ngaha: Oshilando omu tamu tilwashi ohonde opo efimbo lasho li uye, ndele tashi liningile oikalunga, opo shi linyateke! 4 Omolwohonde ove we i tilashi, wa pewa etimba. Nomolwoikalunga we i li ningila, ove we linyateka. Ove wa endelelifa omafiku oye, ndele wa fika pexulilo lomido doye. Onghee hano Ame ohandi ku ningi omushekwa koiwana nomudinwa koilongo aishe. 5 Ava ve li popepi naavenya ve li kokule naave, otave ke ku sheka: Woo ou e nedina la nyatekwa, musho omu nepiyaano linene! 6 Tala, eehamba daIsrael oda li mwoove, keshe imwe, okutilashi ohonde paenghono dayo. 7 Vo ova dina xe naina mwoove, va fininika omunailongo mwoove, eefiye novafiyekadi mwoove ve va hepeka. 8 Oinima yange iyapuki vo ve i dina nomashabata ange ve a xutulifa. 9 Mwoove mwa li ovalundili va tilashi ohonde, ndele pwoove vo va lile keemhunda ndele va ninga oififahoni mwoove. 10 Vo ova holola mwoove epenge laxo. Ombwada okwa li ya nyata mokunyata kwayo kwomafiku ayo, otai nangalwa naye mwoove. 11 Umwe okwa longa oshififahoni nomukainhu wamukwao, naumwe vali okwa nyateka oshitenya shaye omukainhu, molwoshilonga shoixuna, nomutitatu okwa fifa ohoni omumwaina omukainhu, omona waxe mwoove. 12 Vo ova tambula mwoove eembubo dokutilashi ohonde. Oikolo nye mwe i kwatifa eliko, ndele tamu tambula oshishoshela, ndele mwa futifa mukweni moku mu fininika, ndelenee mwa dimbwa nge, Omwene Kalunga ta ti.”
13 “Tala, osho hano Ame ohandi denge omake ange kumwe molweliko loye loulunde, olo we li lilikolela, nomolwetimba loye lohonde li li mwoove. 14 Eyombamo lomutima woye otali ka kala po tuu? Omake oye otaa ka kala a pama momafiku naame handi ku ningile, eshi handi ningi? Ame Omwene nde shi popya, naame ohandi ke shi ninga yo. 15 Ndele Ame ohandi ke ku halakanifila moiwana ndele handi ku undwile moilongo, ndele handi ka kufa mo mwoove onyata yoye. 16 Ndele ove to ke linyateka momesho oiwana yovapaani. Ndele to ka shiiva nokutya, Aame Omwene.”
17 Ondjovo yOmwene ye uya vali kwaame, ndele tai ti: 18 “Kaana komunhu, eumbo laIsrael la ninga kwaame omange oivela. Vo aveshe ongopolo noholo noshivela noikesha meleva. Vo va ninga ashike omange oshisiliveli. 19 Onghee hano, Omwene Kalunga ta ti: Shaashi onye amushe mwa ninga omange, tala, onghee hano Ame ohandi ke mu ongela meni laJerusalem. 20 Ngaashi oshisiliveli nongopolo noshivela noholo noikesha tai ongelwa kumwe meleva, opo i pepelwe omundilo ndele i hemuke, nosho Ame yo ohandi ke mu ongela mehandu lange nomoupyuhandu wange ndele tamu undulwa mo ndele tamu hemunwa. 21 Heeno, Ame ohandi ke mu ongela noku mu pepela nomundilo woupyuhandu wange, opo mu hemukile mo. 22 Ngaashi oshisiliveli tashi hemunwa meleva, nosho yo nye otamu ka hemunwa. Ndele tamu ka shiiva nokutya, Aame Omwene, nda tilashi oupyuhandu wange kombada yeni.”
23 Ondjovo yOmwene ye uya vali kwaame, ndele tai ti: 24 “Kaana komunhu, shi lombwela: oove oshilongo inashi yelekwa, inashi mona odula momafiku oupyuhandu. 25 Ehangakeno lovaxunganeki vasho li li musho, ngaashi onghoshi tai kumbu, tai nyanyaula oshikwatomwa, vo ohava li eemwenyo, hava kufa omamona noinima i nondilo. Vo hava hapupalifa omuvalu wovafiyekadi. 26 Ovapristeli vomusho ohava tauluka omhango yange nokudina oinima yange iyapuki. Vo ihava tongola pokati koshinima shiyapuki naashi shihe fi shiyapuki, noihava holola etongolo pokati kashi sha nyata naashi sha koshoka. Vo ohava fifikinine omesho avo omashabata ange. Heeno, ame onda xutukifwa mokati kavo. 27 Eehamba domusho odi li ngaashi omambungu taa nyanyaula oshikwatomwa: do otadi tileshi ohonde, tadi kanifa eemwenyo, opo ve lilikolele eliko loulunde. 28 Ovaxunganeki vomusho ohave va kolongele ashishe nokaalaka moku va monifila omamoniko oipupulu, noku va xunganekela oipupulu nokutya: Omwene Kalunga osho ta ti, nande Omwene hasho a tile. 29 Ovanhu vomoshilongo tava longo oukolokoshi nokunyeka, hava fininike ohepele nomukwanaluhepo, ndele tava hepeke omunailongo noku mu fininika vehe nouyuki. 30 Ndele Ame nda li kukonga mokati kavo omulumenhu ou a shiiva okutunga ekuma nokukala ofika moipafi yange momufya wekuma opo ndihe shi nyonaune po, ndelenee inandi mu mona. 31 Onghee hano Ame nda tilashi ehandu lange kombada yavo. Momundilo woupyuhandu wange Ame nde va mana po. Okweenda kwavo nde ku efela kombada yomitwe davo, Omwene Kalunga ta ti.”
© Oshikwanyama Bible Revised © Bible Society of Namibia, 2008, 2012.
