Akis ta shunifa David
1 NOvafilisti va ongela omatanga avo aeshe ovakwaita puAfek, fimbo Ovaisraeli va onga onhanda pofifiya oyo i li puJisreel. 2 Ovakulunhu vOvafilisti eshi ve uya novakwaita vavo omayovi nomafele ndele David novakwaita vaye ve uya hauxuuninwa pamwe naAkis, 3 ovakulunhu vOvafilisti va popya, tava ti: “Ovaheberi ovo otava kongo shike apa?” Akis okwa nyamukula ovakulunhu vOvafilisti ndele ta ti: “Ha ou oDavid, omupiya waSaul, ohamba yOvaisraeli, ou a kala pwaame efimbo li dule omudo umwe, ndele inandi mona sha muye okudja kefiku linya ye e uya kwaame fiyo onena eli.” 4 Opo nee ovakulunhu vOvafilisti ve mu handukila novakulunhu vOvafilisti ve mu lombwela: “Shunifa omulumenhu ou! Na shune konhele oyo we i mu pa; aha ye pamwe nafye molwoodi, aha ninge omhiluki yetu molwoodi. Osheshi te likongele ngahelipi ngeno ohokwe yomwene waye, ngeenge hanomitwe dovakwaita ava vetu ngeno? 5 Ha ou e tu shii, David, ou ve mu imbila nokutanha ndele tava ti:
‘Saul okwa ta eyovi,
ndelenee David omayovi omulongo?’ ”
6 Opo nee Akis a ifana David ndele ta ti kuye: “Oshili, ngaashi Omwene e nomwenyo, oshili, oove omuyuki, ndele okuya mo kwoye nokudja mo kwoye pamwe naame momatanga ovakwaita oshiwa momesho ange. Osheshi inandi mona owii washa mwoove okudja kefiku linya we uya kwaame fiyo onena eli. Ndelenee ove ku fi muwa momesho ovakulunhu. 7 Shuna hano paife u ye nombili, ndele ino ninga sha shii momesho ovakulunhu vOvafilisti.” 8 Opo nee David ta ti kuAkis: “Ndelenee ame onda ninga shike? Ile oshike wa mona momupiya woye okudja kefiku linya nda kala pwoove fiyo onena eli, ndiha itavelwe okulwifa ovatondadi vomwene wange ohamba?” 9 Ndelenee Akis okwa nyamukula David ndele ta ti: “Ame ondi shi shii nokutya, ove oumuwa ngaashi omweengeli waKalunga momesho ange.” Ndelenee ovakulunhu vOvafilisti tava ti: “Ye ina ya pamwe nafye molwoodi. 10 Fikama hano ongula inene novapiya vomwene woye, ava ve uya pamwe naave, ndele indeni nondjila yeni ongula inene, ngeenge taku shi.” 11 Onghee hano David a fikama novalumenhu vaye ongula inene va ka shune koshilongo shOvafilisti. Ndelenee Ovafilisti va ya kuJisreel.
© Oshikwanyama Bible Revised © Bible Society of Namibia, 2008, 2012.
