Job ta nyamukula
1 Job okwa nyamukula ndele ta ti: 2 “Oinima ya tya ngaha nde i uda ihapu. Nye amushe ovahekeleki vongaho. 3 Okudenga omhepo itaku xulu po nokuli? Ile oshike tashi ku fininike u nyamukule? 4 Ngeno nye mu li ponhele yange, ngeno naame yo handi dulu okupopya ngaashi nye, ndele handi dulu okutunga omatumbulo ndi mu kondjife noku mu pukapukila omutwe wange. 5 Ohandi dulu okupopya eendjovo doku mu ladipaleka, ndi mu pupaleke nehekeleko lomilungu dange. 6 Ngeenge handi popi, ihandi mono epupaleko mouyehame wange nongeenge handi mwena, itau di mo tuu. 7 Ndelenee paife Ye okwa lolokifa nge. Ove wa mana po eumbo lange alishe. 8 Ove wa kwata nge. Okukwata nge kwoye kwa ninga ondobwedi tai pe nge oushima. Noudu wange tau twile nge ondubo, tau hokololifa nge moipafi. 9 Ehandu laye la lengaula nge ndele tali tondo nge. Ye ta kweshele nge omayoo aye. Ovatondadi vange hava dakamene nge omesho avo.
10 “Vo ova makulila nge omakanya avo. Hava denge nge polupanda nokutuka nge. Ngaashi omunhu umwe vo otava ngudumanene nge. 11 Kalunga ta yandje nge momake ovanhu vai ndele ta ekele nge momake ovakolokoshi. 12 Ame nda kala nombili, ndelenee Ye a halukifa nge, okwa kwata nge mofingo nokwa nyanyaula nge. Ye okwa tula nge etanga laye lokuyasha. 13 Oikuti yaye tai xwema kombinga nombinga yange. Ye ota taula eefiyo dange ehe nolukeno. Nonyango yange ote i tileshi poshi. 14 Okungumaunwa po kwange kwa shikulafana, Ye ta totele nge ngomukwaita.
15 “Oshipa shange nde shi hondjela oshikutu sheefya, oluvinga lange nde li twa medu. 16 Oshipala shange sha tilyana molwokulila, neefeleisho dange di nomulaulu, 17 momake ange nande muhe noukolokoshi neilikano lange ola yela.
18 “Edu, ino tuvika ohonde yange! Ndele paha monikile onghuwo yange nande onhele yetulumuko. 19 Taleni, nopaife Ondobwedi yange oku li meulu, nOmupopili wange mokombadambada! 20 Ookaume kange hava sheke nge, ndelenee omesho ange e nomahodi taa taalele Kalunga, 21 opo Ye a popile omulumenhu koshipala shaKalunga, a popile omona womunhu moipafi yamukwao. 22 Osheshi omido dange odo di li po natango odinini, opo nee handi i, ndele itandi aluka vali.
© Oshikwanyama Bible Revised © Bible Society of Namibia, 2008, 2012.
