Omhepo yonghenda tai yandjwa
1 “Ndelenee paife Jakob, omupiya wange, pwilikina, naIsrael, nde ku hoolola. 2 Omwene omushiti woye, omumi woye, fimbo wa li medimo lanyoko, Oye ou he ku kwafa, ota ti: Ino tila, omupiya wange, Jakob, oove Jesurun, nde ku hoolola! 3 Osheshi ohandi ka tila omeva kombada yaau a fya enota nomilonga kombada yedu la kukuta. Ame ohandi ka tilila Omhepo yange kombada yoludalo loye nenangeko noupuna kombada yoitutumine yoye, 4 opo va mene ngaashi omwiidi nongaashi omimbalandongo pomatondokelo omeva. 5 Umwe ta ka tya: ‘Aame owOmwene,’ nomukwao ota ka ifana edina laJakob, nomukwao vali ota ka shangela meke laye nokutya: ‘Aame owOmwene,’ ndele te liluku nedina lefimano laIsrael.”
6 Omwene, ohamba yaIsrael nOmukulili waye, Omwene Kalunga komatanga ovakwaita ota ti: “Aame ou, omutete nomuxuuninwa, Aame andike Kalunga, kape na vali umwe. 7 Ndele olyelye ngaashi Aame? Ne shi udife, ne shi shiivife, ye ne shi ulikile nge, okudja kefiku linya nda shita oshiwana shonale. Na shiivife ei yokomesho naai tai ka shikula. 8 Inamu kala mwa haluka, nye inamu tila! Inandi shi ku shiivifila noku ku udifila nalenale? Ndele onye eendobwedi dange! Ope na tuu Kalunga kamwe kehe fi Aame? Ahowe, kape na emanya limwe lexupifo, kandi mu shii nande umwe.”
Oulai wokulongela oikalunga
9 Ovahongi vomafanohongwa aveshe ovongaho, noiholike yavo kai na oshilonga; neendobwedi davo kadi wete ko, noinadi shiiva sha, nosho ngaha tava fifwa ohoni. 10 Olyelye ta hongo kalunga nolyelye ta teleke efano, lo itali eta ouwa washa? 11 Taleni, ovashikuli valo aveshe otava ka fifwa ohoni, novanongo ovo ovanhu! Nava ongale aveshe, nava holoke, nava haluke, nava fifwe ohoni mumwe
12 Omuhambwidi woivela ota longo nonghwato moupyu wediko, ote li hambula nohamala ndele te li longo neenghono domaoko aye; mokulonga kwaye e udite ondjala, neenghono da pwa mo, iha nu nande omeva, ndele ta loloka. 13 Omuhongi woipilangi ota shili ongodi; ta findi omifinda nomya; ote shi shate noshato ndele te shi yeleke noshiyelekifo ndele te shi hongo efano lomulumenhu, pawapalo lomunhu, shi kale meumbo.
14 Umwe ota i a ka tete omisederi, ndele ta kufa omufyati ile omwoonde, ote likulifile omuti umwe mokati komiti domofuka, ta twike omusederi nodula otai u kulike. 15 Opo nee omuti ou owa wapalela oikuni yovanhu yokutema omundilo, ndele ta tyava po imwe a xuxumukwe; imwe te i kufa po a pakife po omungome, imwe te i hongo kalunga ndele te li linyongamene; ta hongo oshihongwafano ndele te shi twile eengolo. 16 Hano imwe ote i temifa omundilo, imwe ote i pakifa po ombelela, ta li ombelela ya telekwa, ndele ta kuta, ta kala po ta xuxumukwa, ta ti: “Iyaloo, onda xuxumukwa nonda mona omundilo.” 17 Ndele eshi sha xupa po ote shi hongo kalunga, oshihongwafano shaye, te shi twile eengolo, ndele te shi linyongamene, ndele ta ti: “Xupife nge, osheshi oove kalunga kange!” 18 Vo kave shi shii, ndele kave udite ko, osheshi omesho avo okwa fifikinifwa, vaha mone ko, nomitima davo opo va kale vehe udite ko; 19 ndele vo ihava diladila sha, kape neshiivo ile eendunge dokutya: “Imwe onde i xwika po momundilo, nomakala onde a pakifa po omungome, nde liyofela ombelela ndele nde i lya po; noshixupe shayo ondi shi ninge ngeno oixuna yongaho? Ondi nokutwila oshitetela shomuti eengolo hamba?” 20 Oye ou a hokwa omute, okwa hongaulwa komutima wa pukifwa, ye ita xupifa omwenyo waye, ndele ita ti: “Meke lange lokolulyo kamu na nande oipupulu?”
Israel ta filwa onghenda ndele ta kulilwa
21 Akutu Jakob naave Israel, dimbulukwa oinima ei, osheshi oove omupiya wange; Ame onde ku ma, oove omupiya wange, ihandi ku dimbwa, Israel. 22 Ame ohandi dimi po omatauluko oye ngaashi omudidimbe nomatimba oye ongaashi oshilemo. Alukile nge, osheshi Ame onde ku kulila. 23 Akutu nye omaulu, nyakukweni, osheshi Omwene okwe shi ninga, kuwilileni pombada, onye eembwili domedu, hafeni pombada, onye eemhunda nomifitu nomiti adishe di li mo. Osheshi Omwene okwa kulila Jakob ndele te ke lifimanekifila Israel.
24 Omwene Omukulili woye, ou e ku ma fimbo wa li medimo lanyoko, ota ti: “Aame Omwene ou handi wanifa aishe, onda valela eulu. Aame andike, nda yala edu, olyelye a kala pwaame? 25 Ou, handi hanauna po omadidiliko ovaxunganeki voipupulu, ndele handi shimike eemhulile, handi shunifa ovanamayele konima, ndele handi shitukifa ounongo wavo oulai. 26 Aame ou, handi wanifa ondjovo yomupiya wange ndele handi wanifa eenghundafana dovatumwa vange. Aame ou, handi lombwele Jerusalem: Ou na okunangekwa! Noilando yaJuda: Omu na okutungululwa! Ndele Ame handi ka tungulula omakulukuma asho. 27 Aame ou, handi lombwele oule womeni: ‘Pwinina, nomilonga doye ohandi ke di pwininika.’ 28 Aame ou, handi lombwele Kores: ‘Omufita wange! Ndele ye ota fikifa ehalo lange la wana’, eshi ta ti kuJerusalem: ‘Ove tungwa!’ Nokotembeli: ‘Omakanghameno oye naa dikwe!’ ”
© Oshikwanyama Bible Revised © Bible Society of Namibia, 2008, 2012.
