Okulya kwombelela yeyambo
Okukala noingone meitavelo
1 Ndelenee okupopya ombelela yeyambo otu shi shii, atusheni otu neshiivo. Okushiiva otaku nenepekifa, ndele ohole otai tungu. 2 Ngeenge umwe e shii a shiiva sha, ina shiiva natango ngaashi e nokushiiva; 3 ndelenee ou e hole Kalunga, oye a shiivika kuye. 4 Mokupopya hano okulya kwombelela yeyambo, fye otu shi shii, mounyuni kamu na nande oikalunga, ndele ngaashi kaku na Kalunga umwe e lili, Oye tuu ou umwe aeke. 5 Osheshi nande oku kale ei haku tiwa oikalunga, ngee omeulu ile opedu, ngaashi ku noikalunga noovene vahapu, 6 ndele fye otu na Kalunga umwe, oTate, omwaau mwa dja aishe, nefikilo letu omuye, nOmwene umwe, Jesus Kristus, omolwaau aishe i li po, nafye yo omolwaye.
7 Haaveshe ve neshiivo eli, osheshi vamwe otava diladila oikalunga ngaashi va ika, naashi tava li ombelela yeyambo, otave i tale ya yambelwa oikalunga, ndele omaliudo avo a nyika oungone otaa nyatekwa kuyo. 8 Ndelenee oikulya itai tu ehenifa kuKalunga; ngeenge itatu li, ihatu kanifa sha, ngeenge hatu li, ihatu likola sha. 9 Ndelenee taleni nawa, elipangelo eli leni liha ninge epundukifo loingone, 10 osheshi ngeenge ope na ou te ku mono, ove ou neshiivo eli, u li omutumba poshililo motembeli yoikalunga, eliudo laye, eshi oye oshingone meitavelo, itali tuwa nee mbela ouladi okulya ombelela ya yambelwa oikalunga? 11 Ndele eshiivo eli loye otali kanifa ou oshingone, omumwaxe ou a filwa kuKristus. 12 Ndele eshi tamu nyono ngaha kovamwaxo ndele tamu yehameke omaliudo avo a ngonopala, otamu nyono kuKristus. 13 Onghee hano oikulya ngeenge tai pukifa omumwatate, itandi li vali ombelela fiyo alushe, opo ndiha hongaule omumwatate.
© Oshikwanyama Bible Revised © Bible Society of Namibia, 2008, 2012.
