Jakob ta i onhapo kuLaban
1 Opo nee Isak okwa ifana Jakob ndele te mu nangeke noupuna. Ndele okwe mu lombwela eendjovo edi ta ti: “Ino hombola omwalikadi womovana vaKaanan. 2 Lilongekida, inda kuPaddan-Aram, keumbo laBetuel, xe yanyoko, ndele likongela ko omwalikadi movana oukadona vaLaban, mumwaina wanyoko. 3 Ndele Kalunga Omunaenghono adishe ne ku nangeke noupuna, ne ku pe oludalo noku ku hapupalifa, opo mwoove mu dje oiwana. 4 Ndele Ye ne ku pe enangeko noupuna laAbraham, ove noludalo loye pamwe naave, opo u shiive okunangala oshilongo shoukwailongo woye, Kalunga e shi pele Abraham.” 5 Osho ngaha Isak okwa lekela Jakob ndele ye okwa ya kuPaddan-Aram, kuLaban, omona waBetuel, Omuaram, mumwaina waRebeka, ina yaEsau naJakob.
Esau ta hombolulula
6 Esau eshi a mona nokutya, Isak okwa nangeka noupuna Jakob nokwe mu tuma kuPaddan-Aram opo e ke likongele ko omwalikadi, naashi e mu nangeka noupuna noku mu lombwela eendjovo edi: “Ino hombola omukainhu womovana oukadona vomuKaanan;” 7 naashi Jakob a pwilikina xe naina ndele okwa ya kuPaddan-Aram, 8 naashi Esau a mona nokutya, oukadona vomuKaanan ova li vai momesho axe Isak, 9 Esau okwa ya kuIsmael ndele ta hombola Mahalat, omona okakadona kaIsmael, omona waAbraham, mumwaina waNebajot, e mu weda po povalikadi vaye vonale.
Mondjodi Jakob ta mono omhani ya twa meulu
10 Ndele Jakob okwa dja muBerseba ndee okwa ya kuHaran. 11 Opo nee ye okwe uya konhele apa a nangala, osheshi etango ola ningina. Ndele okwa kufa emanya lomomamanya enya nokwe li nangeka koshi yomutwe waye, ndele okwa nangala ko. 12 Ndele ye okwa twa ondjodi: vati kombada yedu ku na omhani, oxulo yayo ya twa keulu, novaengeli vaKalunga tava londele ko vo tava londolokele ko. 13 Ndele tala, Omwene okwa kala ofika pombada koxulo yayo ndele ta ti: “Aame Omwene Kalunga kooxo Abraham naKalunga kaIsak. Edu eli wa nangala, Ame ohandi li ku pe, ove mwene noludalo loye. 14 Noludalo loye otali ka kala ngaashi ondwi yedu, ndele to ka tandavela kouninginino nokoushilo, koumbangalanhu nokoumbuwanhu. Nomwoove nomoludalo loye omapata aeshe okombada yedu otaa ka nangekwa noupuna. 15 Ndele tala, Ame ondi li pamwe naave, ndele Ame ohandi ke ku amena apeshe apa to i, ndele Ame ohandi ke ku alulila moshilongo eshi. Osheshi Ame itandi ke ku efa, fimbo inandi wanifa eshi nde ku lombwela.” 16 Opo nee Jakob okwa papuduka meemhofi daye ndele ta ti: “Oshili, Omwene opo e li apa, ame inandi shi shiiva.” 17 Ndele ye okwa tila ndele ta ti: “Onhele ei oitilifa! Heeno, oyo ongulu yaKalunga noshivelo sheulu.”
Jakob te liudanekele eudaneko
18 Opo nee Jakob okwa penduka ongula inene nokwa kufa emanya olo kwa li a wilika omutwe waye, ndele okwe li dika edimbulukifomanya, ndele okwa tila ko omaadi. 19 Ndele ye okwa luka onhele ei Betel, ndele edina loshilando eshi nale ola li Lus.
20 Ndele Jakob okwe liudanekela eudaneko ndele ta ti: “Kalunga ngeenge ta kala pamwe naame ndele ta amene nge mondjila tuu ei handi ende nayo, ndele ta pe nge okulya omungome noikutu yokudjala, 21 nongeenge nda ka alukila nombili meumbo latate, opo nee Omwene ota ka kala Kalunga kange. 22 Ndele emanya tuu eli nde li dika edimbulukifomanya otali ka kala ongulu yaKalunga nomwaashishe Ove to pe nge, ame ohandi ke ku pa shili oshitimulongo.”
© Oshikwanyama Bible Revised © Bible Society of Namibia, 2008, 2012.
