Oihokolola yOvakriste
1 Umwe womokati keni e neendjovo nomukwao, ota dulu ngahelipi oku mu hokololifa koshipala shaava vehe fi ovayuki? Oshike ita i ko kovayapuki? 2 Kamu shi shii nokutya, ovayapuki itava ka tokola ounyuni? Hano ngeenge tamu ka tokola ounyuni, inamu wana ngeno okutokola oinima inini? 3 Kamu shi shii, fye ohatu ka tokola ovaengeli; mbela oinima yokukalamwenyo kwopaife otai tu nyenge? 4 Hano ngeenge mu noihokolola yoinima yokukalamwenyo kwopaife, otamu i tokolifa ava vehe li nawa meongalo? 5 Ohandi popi eshi ndi mu fife ohoni. Ile mokati keni kamu na nande omunandunge a shiive okutokola mokati kovamwaxe? 6 Ndelenee omumwaxe, nokutya, omwiitaveli mukwao ta hokololifa omumwaxe moipafi yaava vehe neitavelo!
7 Oshiponga nokuli kunye eshi mu noihokolola mokati keni. Oshike itamu liefa mu ningwe nai? Oshike itamu liefa mu nyekwe? 8 Ndelenee nye otamu ningi nai notamu nyeka ovanhu, ovamwaxo nokuli. 9 Mboli kamu shi shii nokutya, ava vehe fi ovayuki itava fyuulula ouhamba waKalunga? Inamu puka, ovahaeli novakaleli voikalunga, novanyoni vohombo nomashenge, novahaeli vomashenge, 10 novalunga novanalwisho, neengholwe novasheki novanyeki ovo itava fyuulula ouhamba waKalunga. 11 Ndele omwa li mu li ngaha, vamwe vomunye; ndelenee nye mwe liyelifa, mwa yapulwa nomwa yukipalifwa medina lOmwene Jesus Kristus nokOmhepo yaKalunga ketu.
Omalutu etu oo oinhimbu yaKristus
12 “Ame inandi dilikwa sha,” ndele haaishe i nekwafo. “Ame inandi dilikwa sha,” ndelenee nghi nokupangelwa kusha. 13 “Oikulya oi li po omolwedimo, nedimo omolwoikulya;” ndele Kalunga ota ka xulifa po eshi ashishe. Ndelenee olutu inali yandjelwa oluhaelo, ndelenee okulongela Omwene. Omwene oye mwene wolutu. 14 Ndele Kalunga ou a nyumuna Omwene, ote tu nyumuna yo okeenghono daye. 15 Kamu shi shii nokutya, omalutu eni oo oinhimbu yaKristus? Otashi dulika ngahelipi oinhimbu yaKristus ame ndi i ninge oinhimbu yombwada yoipala? Nandenande. 16 Ile kamu shi shii nokutya, ou ta kumu ombwada yoipala ota ningi olutu limwe nayo? Osheshi Oye ta ti: “Ava vavali otava ningi omunhu umwe.” 17 Ndele ou ta dame kOmwene, oye omhepo imwe naye. 18 Kukumeni oluhaelo. Omanyono aeshe amwe, keshe eshi omunhu ta nyono, okombada yolutu, ndele omuhaeli ota nyono kolutu laye mwene. 19 Ile kamu shi shii, omalutu eni oo otembeli yOmhepo Iyapuki ei i li munye mwe i pewa kuKalunga, hano kamu fi veni vene? 20 Osheshi nye omwa kulilwa noikulila idjuu. Fimanekeni hano Kalunga nomalutu eni nonomhepo yeni.
© Oshikwanyama Bible Revised © Bible Society of Namibia, 2008, 2012.
