Ovapristeli votembeli ipe
1 Opo nee ye a shuna nge vali koshivelo shopondje shotembeli, sha taalela oushilo. Sho osha li sha patwa. 2 Ndele Omwene okwa lombwela nge: “Oshivelo tuu eshi shi nokukala sha patwa, itashi patululwa nokape na umwe ta pitile mo, osheshi Omwene Kalunga kaIsrael a pitila mo. Onghee hano shi nokukala sha patwa. 3 Ohamba, yo i nokukala omutumba ngaashi ohamba i lye omungome koshipala shOmwene. Yo i nokupitila mo moshivelo shokehale nokupita mo nondjila tuu oyo.”
4 Opo nee ye okwa twala nge koshivelo sha taalela koumbangalanhu koshipala shotembeli. Ame onda tala ko, ndele tala: oshingefimano shOmwene sha yadifa otembeli yOmwene. Opo nee ame nda wila poshi. 5 Ndele Omwene okwa lombwela nge ta ti: “Kaana komunhu, tongolola, u tale nomesho oye, ove u ude nomatwi oye aishe ei Ame handi ke ku lombwela molweenghedimhango dotembeli yOmwene neemhango adishe dayo. Ndele tongolola nhumbi tamu iwa motembeli moshivelo keshe shokuya mo motembeli. 6 Ndele lombwela ovanandubo nokutya, eumbo laIsrael, u tye: Omwene Kalunga osho ta ti: Oixuna yeni ya wana, akutu, oove eumbo laIsrael. 7 Nye eshi mwa eta mo ovanailongo inava pita etanda momitima davo noinava pita etanda mombelela, va kale motembeli yange, vo va shekife otembeli yange. Nosho yo mwa yamba omungome wange nomaadi nohonde, ndele vo va teya po ehangano lange noififahoni yeni aishe. 8 Ndele nye inamu diinina oilonga iyapuki tai longelwa nge, ndelenee mwe va tula ponhele yeni okudiinina oilonga yomotembeli ei tai longelwa nge.”
9 Omwene Kalunga ota ti ngaha: “Hamunailongo, nande umwe, ina pita etanda momutima, noina pita etanda mombelela e nokuuya motembeli yange, omunailongo keshe, ha kala muIsrael, nandenande. 10 Ndelenee Ovalevi ava va ya kokule naame meliteeko laIsrael, vo va puka mo mwaame, va shikula oikalunga yavo, vo nava humbate oulunde wavo. 11 Vo ove nokuninga ovapiya motembeli yange, ngaashi ovakeleli poivelo yotembeli, novayakuli moilonga yomotembeli. Vo nava tomenene ovanhu omaxwikiloyambo nomatomenoyambo, ndele nava kale moipafi yavo oku va yakula. 12 Vo eshi ve va yakulile moipafi yoikalunga yavo nova ningila eumbo laIsrael epundukifo lomoulunde, onghee hano nde va yelulila eke lange, opo vo va kale nokuhumbata etimba lavo, Omwene Kalunga ta ti. 13 Ndele vo itava itavelelwa okweehena kwaame va longele nge moshilonga shoupristeli nokweehena kusha sha yapulilwa nge, nande sha shomoshiyapukielela. Ndelenee vo ve nokuhumbata elengwa lavo noififahoni yavo, ei ve i ninga. 14 Ndele Ame ohandi va tula moilonga yeyakulo motembeli, oshilonga keshe shomuyakuli eshi tashi monika mo, ndele tashi ka diininwa.
15 “Ndelenee ovapristeli ovo Ovalevi, oludalo laSadok, ava va diininine oilonga yomotembeli yange mefimbo leliteeko lOvaisraeli, vo nava ehene kwaame va longele nge ndele va kale ofika koshipala shange va yambele nge omaadi nohonde, Omwene Kalunga ta ti. 16 Vo ohava i motembeli yange, ndele vo hava ehene koshitaafula shange va longele nge nokudiinina oilonga tai longelwa nge. 17 Ndele vo ngeenge tave uya koluumbo lomeni, vo ve nokudjala oikutu yoliina. Ndelenee vaha djale oshikutu sholududi fimbo hava yakula moilonga yavo moivelo yoluumbo lomeni nomeni lotembeli. 18 Komitwe vo ve nokudjala embale loshikutu sholiina nomoiya ve nokudjala oikutu yoliina. Vo vaha djaleke moiya yavo sha, eshi tashi eta oshinhwi. 19 Ndele vo ngeenge tava i moluumbo lopondje, kovanhu vomoluumbo lopondje, ve nokulidula oikutu yavo va kala nayo meyakulolonga lavo. Nave i fiye po momakololo omotembeli ndele nava djale oikutu imwe, vaha yapule ovanhu noikutu yavo.
20 “Ndele vo vaha kulule omitwe davo di yele ile va efe eexwiki dokomutwe di kule dile di endjelele. Vo ve nokukulula omitwe davo, 21 nosho yo omupristeli nande umwe aha nwe omaviinyu, ngeenge ta i moluumbo lomeni. 22 Vaha hombole omufiyekadi ile ou a hengwa, ndelenee va hombole okakadona komoludalo lovana vaIsrael ile omufiyekadi ou a filwa omupristeli.
23 “Ndele vo ve nokulonga ovanhu vange va shiive okutongola pokati koinima iyapuki naai yongaho, nove noku va shiivifila eshi sha nyata, naashi sha koshoka. 24 Ndele moihokolola vo ve nokutokola ndele nava tokole paenghedimhango dange, ndele vo ve nokudiinina eemhango dange neenghedimhango dange momafimbo aeshe oivilo yange nokuyapula omashabata ange.
25 “Ndele vo vaha ye koshimhu vaha nyatekwe, ashike tashi dulika okunyatekwa kuxe nokuina, komona omumati nokakadona, komumwaina omulumenhu, nomumwaina omukainhu, ou ngeenge a li ina hombolwa. 26 Ndelenee ye eshi e lifeta po, oye na valelwe omafiku aheyali. 27 Ndele mefiku tuu olo ye ta i motembeli, moluumbo lomeni, a yakule moilonga yomotembeli, ye e nokweeta etimbayambo laye, Omwene Kalunga ta ti.
28 “Ndele oshitukulwa shavo oshefyuululo osheshi: Aame oshitukulwa shavo shefyuululo. Nye inamu va pa edu lefyuululifo muIsrael: Aame onhele yavo yefyuululifo. 29 Eendjayambo netimbayambo nokuvelombediyambo, vo va itavelelwa okulya. Nakeshe eshi shomuIsrael sha tongolelwa oshidila, oshavo. 30 Nakeshe eshi shotete shokomaludi keshe, sha wapala, sha wapalelela, nokeshe eshi shomayambo, oshomayambo eni aeshe naa ninge ovapristeli. Noufila weni muwa u dule mukwao mu nokuyandja komupristeli, opo enangeko noupuna li kale meumbo loye. 31 Keshe eshi sha fya shoovene sha pombaulwa ngeenge oshidila ile oshimuna, ovapristeli vehe shi lye.”
© Oshikwanyama Bible Revised © Bible Society of Namibia, 2008, 2012.
