Onghenda nai tambulwe shili
1 Ndelenee ofye ovalongi pamwe naye ohatu mu kumaida yo, efilonghenda laKalunga muhe li tambule oshimha, 2 osheshi ota ti:
“Efimbo la wapala onde ku uda,
nefiku lexupifo onde ku kwafa.”
Tala, efimbo la wapala opaife, tala, efiku lexupifo opaife.
3 Fye itatu pe omunhu omhito okudina moshinima nande oshimwe, oshilongayakulo shetu shiha shekwe, 4 ndelenee moinima aishe ohatu liholola ofye ovayakuli vaKalunga: melididimiko linene, momahepeko, momaluhepo, momafininiko, 5 mokudengwa, modolongo, momapiyaano, moilonga idjuu, omokukala oupafi, mokulidilika oikulya; 6 moukoshoki, mokushiiva, moutalanheni, mokukala nombili, mOmhepo Iyapuki, mohole yashili ihe neliningifo, 7 meendjovo doshili, meenghono daKalunga, noilwifo youyuki meke lokolulyo nolokolumosho; 8 mokufimanekwa nomokudinwa, mokupopilwa mouwa nomowii, ngaashi ovapukifi, nande fye ovanashili, 9 ngaashi ovo inava shiivika, ndelenee otwa shiivika nawa; ngaashi ovo ve li pokufya, ndele tala, otu nomwenyo, ngaashi oonakuhandukilwa, fye inatu dipawa po, 10 ngaashi ava ve nomahodi, ndele otu nehafo alushe, ngaashi eehepele, ndele ohatu punapalifa vahapu, ngaashi ovo vehe na nande sha, ndele otu noinima aishe.
Ovaitaveli naava vehe neitavelo
11 Omakanya etu otwe e mu makulila onye Ovakorinto, omitima detu oda mbwalangadja. 12 Onye kamu nofina mufye, omu nofina momitima deni vene. 13 Ndelenee yandjeni ngaashi mwa pewa. Ohandi mu lombwele ngaashi ounona: Nanye yo mbwalangadjeni.
14 Inamu humbata ondjoko imwe pamwe naava vehe neitavelo; osheshi ouyuki ou noukumwe washike nouhenouyuki? Ile ouyelele ou nekwatafano lashike nomulaulu? 15 Ndele Kristus naBelial otava udafana ngahelipi? Ile omwiitaveli e noshitukulwa shashike naau ehe fi omwiitaveli? 16 Otembeli yaKalunga oi nekwatafano lashike noikalunga? Osheshi fye otembeli yaKalunga omunamwenyo, Kalunga ngaashi a tonga:
“Ame onda hala okukala muvo,
nokweenda mokati kavo,
Ame ohandi kala Kalunga kavo,
ovo notava ningi oshiwana shange.”
17 Onghee:
“Djeni mo mokati kavo nye mu liyoolole
mo muvo, Omwene osho ta ti,
nye inamu kuma eshi sha nyata;
opo Ame ohandi mu tambula,
18 nohandi ningi Xo yeni,
onye notamu ningi ovamwange ovamati noukadona,
Omwene Omunaenghono adishe osho ta ti.”
© Oshikwanyama Bible Revised © Bible Society of Namibia, 2008, 2012.
