Etokolo loiwana
1 Eheneni oku, onye oiwana amushe, nye mu ude; pwilikineni, onye oiwana yoilongo. Edu nakeshe eshi shi li mo, pwilikina, eembinga dedu naaishe tashi tutuma mo. 2 Osheshi Omwene okwa handukila oiwana aishe, noupyuhandu waye u li kombada yeemhunga dayo adishe; ndele Ye okwe va yapulila efingo nokwe va yandja va tomwe. 3 Ndele oonakudipawa vavo otava ka ekelwashi nedimba lii loimhu yavo otali yeluka pombada, neemhunda otadi kunguluka ohonde yavo. 4 Nomatanga ovakwaita vomeulu otaa loloka, neulu otali tonywa ngaashi omushangwatonywa, nomatanga alo aeshe otaa ngumuka po, ngaashi omafo omuviinyu taa yaumuka nongaashi omukwiyu tau u omangongwa ao. 5 Shaashi eongamukonda lange ola kolwa meulu, tala, otali kulukile kombada yaEdom, nokombada yoshiwana nde shi yapulila ehanauno. 6 Eongamukonda lOmwene ola nyika eehonde, la kuta omaadi, nohonde youdjona noyoikombo nokomakaadi eefiyo deedi. Osheshi Omwene e na etomenoyambo muBosra, omatomeno mahapu medu laEdom. 7 Eemhuulu otadi ka wila mumwe navo, eedi mumwe neemhedi. Edu lavo otali kolwa kohonde, ondwi yedu lavo otai ka nyika omaadi. 8 Osheshi efiku lehandu tali di kOmwene nomudo wonghone molweyukifilo laSion. 9 Ndele oitandomeva yaEdom otai shituka oteya, nedu otali shituka osulfuri, noshilongo shaye otashi ningi omakataa a xwama. 10 Oufiku nomutenya itau ka dima mo, nomwifi otau kala nokuyeluka alushe; okoludalo noludalo otashi kala ombuwa, kape na omunhu ta ende mo fiyo alushe. 11 Ndelenee onyundu newanye otai shi fyuulula, exuvi nekola otaa kala mo; ndele Ye ota mangele ko ongodi yokumbuwaleka nongodi yoholo shi kale hamungaho. 12 Ovanamadina itava ka ifana vali ouhamba nomalenga asho aeshe kae mo vali. 13 Ndele momatungwaumbo asho otamu mene omano, neeshosholo nongwena otai ka mena meehote dasho, ndele tashi ningi onhele yookavandje nonhele yeemho. 14 Ndele omo otamu ka shakena oixwemi noikuwi noikweni yomoixwa, eendemoni domomuulu otadi ka hangafana, nomhepo youfiku oko tai mono ombili netulumuko layo la wana. 15 Eyoka loshikuti oko tali ka mona onhele yalo yokudalela notali dalele mo omai, ndele tali a tendula nouyokwena valo, nalo otali ka kala momudile washo, nomakodi oko taa ka shakena, limwe nalikwao. 16 Konakoneni momushangwa wOmwene, nye mu leshe, kape na nande oshinamwenyo shimwe tashi wile pedu, ndele kape na nande shimwe tashi yepa shikwao, osheshi okanya kange oke shi tonga. Ye okwe shi lombwela nOmhepo yaye Oye i ongela mumwe. 17 Ndele Oye mwene okwe i ekela oshihoololifo, neke laye ola yeleka edu nongodi kuyo tai kala i li kwete fiyo alushe, kepupi fiyo okepupi omo tai kala.
© Oshikwanyama Bible Revised © Bible Society of Namibia, 2008, 2012.
