2 OMAFIMBO 20 - Oshikwanyama Bible (OKYB)

Josafat ta taataa Ovamoab nOvaammoni

1 Konima yoinima ei ovana vaMoab novana vaAmmoni napamwe navo ovanhu vamwe vehe fi Ovaammoni ve uya okulwifa Josafat. 2 Josafat eshi a shiivifilwa oshinima eshi taku tiwa: “Eengudu dihapu tadi di kombinga inya yefuta, kuEdom, tadi uya oku ku lwifa, ndele tala, vo aveshe ve li muHaseson-Tamar, nokutya muEngedi,” 3 Josafat okwa tila nokwe liameka okukonga Omwene nokwa vilikila muJuda ashishe efiku lelidiliko. 4 NOvajuda va ongala va ka konge ekwafo lOmwene; moilando aishe yomuJuda ove uya okukonga Omwene. 5 Opo nee Josafat okwa ya, ta kala ofika mokati koshiongalele shomuJuda noshomuJerusalem, mongulu yOmwene, komesho yolupale lipe, 6 ndele ta ti: “Omwene Kalunga kootate, Oove Kalunga komeulu, ndele Oove omupangeli woilongo aishe yoiwana. Heeno, meke loye omu neenghono nouladi, onghee hano kape na ou ta dulu oku ku kondjifa. 7 Haave Kalunga ketu, wa taataa oonakukalamo medu eli komesho yovanhu voye Ovaisraeli, ndele we li yandja fiyo alushe koludalo laAbraham, kaume koye? 8 Ndele va tula mo mulo, ndele ve ku tungila mo otembeli okefimano ledina loye, tava ti: 9 ‘Ngeenge hatu hangika komupya ile keongamukonda ile kehandukilo ile koudu u nolutapo ile kondjala, opo hatu holoka komesho yongulu ei nokoshipala shoye, osheshi edina loye li li mongulu ei noku ku ifana moudjuu wetu, opo Ove u tu kwafe noku tu xupifa.’ 10 Ndele tala, ovana vaAmmoni novana vaMoab novanhu vokeemhunda daSeir paife ove li apa, monhele yavo Ove ino itavela Ovaisraeli va taulule mo, vo eshi va dja medu laEgipiti. Ndelenee ve va dingilila ndele inave va hanauna po. 11 Heeno, tala, paife tave uya ve tu alulile owii noku tu taataa mo moshilongo shetu, osho twe shi pewa kwOove. 12 Kalunga ketu, ito va tokola? Osheshi mufye kamu neenghono okulwifa ongudu inene tai tu homona. Ndele inatu shiiva eshi tu nokuninga, ndelenee omesho etu taa tale kwoove.”

13 NOvajuda aveshe va kala ofika koshipala shOmwene pamwe nounona vavo novalikadi vavo novana vavo ovamati. 14 Opo nee Omhepo yOmwene ye uya mokati koshiongalele, kuJahasiel yaSakaria yaBenaja yaJeiel yaMattanja, Omulevi, womoludalo laAsaf, 15 ndele ye ta ti: “Pwilikineni amushe nye vomuJuda noonakukalamo muJerusalem, naave yo, ohamba Josafat! Omwene te mu lombwele ngaha: ‘Inamu tila, inamu haluka molwongudu oyo inene, osheshi olwoodi kali fi leni, ndelenee olaKalunga. 16 Mongula indeni mu ke va lwife. Tala, vo tave uya noshikulundu shaSis, ndele tamu ke va shakeneka komunghulo wefilu koushilo wombuwa yaJeruel. 17 Hanye tamu ka lwa. Fikameni, kaleni mu li ofika ndele taleni nhumbi Omwene te mu xupifa, nye Ovajuda noonakukalamo muJerusalem.’ Inamu tila ndele inamu haluka. Mongula fikameni mu va homone, nOmwene ta ka kala pamwe nanye.”

18 Opo nee Josafat e linyongamena oshipala shaye poshi, nOvajuda aveshe noonakukalamo muJerusalem va wila eombe koshipala shOmwene, va ilikana Omwene. 19 NOvalevi vomovana Ovakohati novomovana Ovakora, va kala ofika va hambelele Omwene, Kalunga kaIsrael nondaka inene.

20 Va fikama ongula inene ndele va ya mombuwa yaTekoa. Ndele fimbo tava fikama Josafat a kala ofika ndele ta ti: “Pwilikinei nge, nye Ovajuda noonakukala muJerusalem! Itaveleni Omwene, Kalunga keni, opo nee tamu ka kala mwa pama. Itaveleni ovaxunganeki vaye, opo nee tamu ka kala nelao.” 21 Ndele ye okwa kundafana novanhu nokwa tula ovaimbi okuhambelela Omwene, va djala omidjalo diyapuki ndele tava piti komesho yovakwaita tava imbi tava ti: “Hambeleleni Omwene, osheshi onghenda yaye tai kalelele fiyo alushe!” 22 Ndele eshi va hovela okunyakukwa nokwiimba eimbilo lehambelelo, Omwene okwa tula ovanhu va ninge ekulwila konima yovana vaAmmoni novaMoab novovanhu vokeemhunda daSeir, ava ve uya okulwifa Ovajuda, ndele va tewa po. 23 Shaashi ovana vaAmmoni novaMoab va hovela okulwifa ovanhu vokeemhunda daSeir, ve va hanaunune po noku va mana po. Ndele eshi va mana po ovanhu vokeemhunda daSeir, ove lipilukila mokulidipaa. 24 NOvajuda eshi ve uya monhele omo va dula okutala ombuwa, ndele eshi va tala ongudu, va mona oimhu ya nangala pedu, ndele kapa li nande umwe a xupa po. 25 Opo nee Josafat novakwaita vaye ve uya okutinha oixuulwa, ndele va mona oinima ihapu, oikutu noinima i nondilo. Ndele va tinha ihapu unene, va nyengwa oku i humbata. Nomafiku atatu va ongela oixuulwa, oyo ya li ihapu. 26 Ndele mefiku etine va ongala mEfilu lehambelelo, osheshi oko va hambelela Omwene, onghee hano va ifana onhele oyo Efilu lEhambelelo fiyo onena eli. 27 Opo nee ovalumenhu aveshe vomuJuda novomuJerusalem naJosafat komesho yavo va shuna nehafo kuJerusalem. Osheshi Omwene e va hafifa molwovatondadi vavo. 28 Ndele ve uya kongulu yOmwene muJerusalem nokushika ouxumbafeta neenyalilo nomanghuma. 29 Ehaluko linene okutila Kalunga la li kombada yoilongo aishe yoiwana, eshi va uda nokutya, Omwene okwa lwifa ovatondadi vaIsrael. 30 Opo nee oshilongo shaJosafat sha mona ombili, naKalunga kaye e mu pa etulumuko keembinga adishe.

Ehangano laJosafat naAhasia

31 Ndele Josafat okwa pangela Juda. Omido daye da li omilongo nhatu nanhano eshi a ninga ohamba, nokwa pangela omido omilongo mbali nanhano muJerusalem. Nedina laina la li Asuba yaSilhi. 32 Ndele ye okwa enda nondjila yaxe Asa, ndele ina yapuka mo nande nokwa ninga eshi sha yuka moipafi yOmwene. 33 Noikulundu yokuyambela ye ine i hanauna po. Ovanhu inava ameka natango omitima davo kuKalunga kooxe. 34 Noinima imwe tai hepaulula Josafat, inya yotete naai yaxuuninwa, tala, yo oya shangwa mehepaululo laJehu yaHanani, lo la tulwa membo leehamba daIsrael.

35 Ndelenee konima yoinima ei Josafat, ohamba yaJuda, ya ninga ehangano naAhasia, ohamba yaIsrael, yo ya li ihe na Kalunga mokukala kwayo. 36 Vo ova udafana va pangele eeskepa di ye kuTarsis. Ndele va pangela eeskepa muEsion-Geber. 37 Ndelenee Elieser yaDodava womuMaresa a xunganekela Josafat te mu popi ta ti: “Ove eshi wa ninga ehangano naAhasia, Omwene ota teya po oshilonga shoye.” Neeskepa oda nyonauka, onghee da nyengwa okuya kuTarsis.