Israel na kale e hole Omwene nomwenyo aushe
1 “Ei oyo hano omhango neenghedimhango nomalombwelo Omwene Kalunga keni a lombwela nge ndi i mu longe, opo mu shiive oku i wanifa medu olo tamu i mo, mu li nangale, 2 opo mu shiive okutila Omwene Kalunga keni neenghedimhango daye adishe noipango yaye ei ame handi mu lombwele, mu i diinine, nye vene novana veni novatekulu veni momafiku aeshe omokukalamwenyo kweni; omafiku eni opo a hapupalifwe. 3 Israel, pwilikina hano, u i diinine shili, opo u kale u nelao ndele ove u shiive okuhapupala unene ngaashi Omwene Kalunga kooxo e ku udanekela, medu tali tondoka omashini nomaadi eenyiki.
4 “Pwilikina, Israel, Omwene Kalunga ketu, Oye Omwene aeke. 5 Ndele ove hola Omwene Kalunga koye nomutima woye aushe, nomwenyo woye aushe, neenghono doye adishe. 6 Neendjovo edi ame handi ku lombwele nena, nadi kale momutima woye, 7 ndele ove u noku di findila movana voye noku di tonga fimbo u li omutumba meumbo loye ile fimbo u li mondjila nongeenge to ka nangala nongeenge to penduka. 8 Ove u noku i mangela yo kokwooko i ninge edidiliko, ndele i nokukala omunghapyawa pokati kombaba yoshipala shoye.Ove u noku i mangela yo kokwooko edidiliko, ndee i nokukala koshipala shoye. 9 Ndele ove u noku i shanga koikulo yonhu yeumbo loye nokoivelo yoye.
10 “NOmwene Kalunga koye ngeenge te ku twala mo medu olo Ye a udanekela ooxo Abraham, Isak naJakob, nokwaana oku ku pa, oilando inene naai iwa inai tungwa kwoove, 11 neengulu di yadi oinima i lili nai lili inadi yadifwa kwoove, nomifima da pandwa momamanya inadi pandwa kwoove, oikokola yeemono, inai twikwa kwoove; ndele ove oho li nokukuta. 12 Kala hano wa lungama uha dimbwe Omwene, ou e ku pitifa mo muEgipiti, meumbo loupika. 13 Ove u nokutila Omwene Kalunga koye noku mu kalela. U nokwaana medina laye. 14 Inamu shikula oikalunga imwe, oikalunga yoiwana tai mu dingilile, 15 osheshi Omwene Kalunga koye Oye Kalunga omuladi mokati keni, opo ehandu lOmwene Kalunga koye lihe ku xwamene ndele Ye ote ku kombo po kombada yedu.
16 “Inamu shinda Omwene Kalunga keni ngaashi mwe mu shinda muMassa. 17 Nye omu nokudiinina shili oipango yOmwene Kalunga keni nomahepaululo aye neenghedimhango daye, Ye e di mu lombwela. 18 Ndele ove u nokuninga eshi sha yuka naashi shiwa momesho Omwene, opo u kale u nelao ndele u shiive okuya mo nokunangala edu olo liwa, Omwene e li udanekela ooxo nokwaana, 19 Omwene eshi ta ka taataa ovatondadi voye komesho yoye, Omwene ngaashi a tile.
20 “Omona woye omumati ngeenge te ku pula konima: ‘Omahepaululo neenghedimhango nomalombwelo aa Omwene Kalunga ketu e mu lombwela, otaa ti shike?’ 21 Opo nee ove u nokulombwela omona woye omumati: ‘Fye otwa li ovapika vaFarao muEgipiti, ndelenee Omwene okwe tu pitifa mo muEgipiti neke laye li neenghono. 22 NOmwene okwa ningilile Farao neumbo laye alishe omadidiliko noikumwifa moipafi yetu muEgipiti. 23 Ndele Ye okwe tu pitifa mo, opo e tu twale ko a shiive oku tu pa edu olo Ye e li udanekela nokwaana ootate. 24 NOmwene okwe tu lombwela tu wanife eenghedimhango adishe edi, opo tu tile Omwene Kalunga ketu, opo tu kale alushe tu nelao, ndele tu kale tu nomwenyo ngaashi tu li po nena eli. 25 Ndele eshi tashi ka ninga ouyuki wetu ngeenge hatu diinine shili oipango aishe ei koshipala shOmwene Kalunga ketu, ngaashi Ye e tu lombwela.’
© Oshikwanyama Bible Revised © Bible Society of Namibia, 2008, 2012.
