Ovajuda tave lilongekida okushuna
1 Ndele momudo wotete waKores, ohamba yaPersia opo ondjovo yOmwene e i lombwela Jeremia, i wanifwe Omwene okwa pendula omhepo yaKores, ohamba yaPersia, i shiivifile oshilongo shayo ashishe ndele ye shi shanga yo monhumwafo nokutya: 2 “Kores, ohamba yaPersia, tai ti ngaha: Omwene, Kalunga komeulu, okwa yandja mepangelo lange oilongo aishe yokombada yedu, nokwa lombwela nge ndi mu tungile ongulu muJerusalem osho shi li muJuda. 3 Keshe umwe womoshiwana shaye, Omwene Kalunga kaye na kale naye ndele na ye kuJerusalem shomuJuda, ndele na tunge ongulu yOmwene, Kalunga kaIsrael. Oye Kalunga, ou e li muJerusalem. 4 Ndele keshe umwe ou a xupa, monhele oyo ta kala ngaashi omunailongo, ye e nokupewa kovalumenhu vomonhele oyo oshisiliveli noshingoldo noinima noimuna neeshali dehalo liwa dongulu yaKalunga muJerusalem.”
5 Opo nee ovakulunhu vomapata omuJuda naBenjamin va fikama, novapristeli nOvalevi, keshe umwe omhepo yaye ya pendulwa kuKalunga a fikama, a ka tunge ongulu yOmwene, oyo i li muJerusalem. 6 Novashiinda aveshe vavo va kwafa oinima yoisiliveli noshingoldo noimuna neeshali di nondilo, ponho yaaishe ei ova eta eeshali dehalo liwa. 7 Nohamba Kores ya yandja oinima yongulu yOmwene oyo ya kufwa kuNebukadnesar muJerusalem, ndele e i tula mongulu yaKalunga kaye. 8 Ndele Kores ohamba yaPersia, ye i yandja kuMitridat, elenga lomamona. Ndele lo ole i vala moku i yandja kuSesbassar, omukulunhu wOvajuda. 9 Nomuvalu wayo wa li: oiyaxa omilongo nhatu yoshingoldo, oiyaxa eyovi yoshisiliveli, eembele omilongo mbali nomugoi, 10 omakopi omilongo nhatu oshingoldo, omakopi omafele ane nomulongo oshisiliveli noinima imwe eyovi. 11 Oinima aishe yoshingoldo noyoshisiliveli ya li omayovi atano nomafele ane. Oinima ei aishe Sesbassar okwe i eta, eenghwate eshi da dja kuBabilon ndele tadi i kuJerusalem.
© Oshikwanyama Bible Revised © Bible Society of Namibia, 2008, 2012.
