Eenghedi domOukriste
1 Osho nee ovamwatate, ame ohandi mu kumaidifa efilonghenda laKalunga, yandjeni omalutu eni eyambo liyapuki li nomwenyo, la wapalela Kalunga; olo elongelokalunga leni lopandunge. 2 Ndele nye inamu faafana nounyuni ou, ndelenee shitukeni vape momadiladilo eni, opo mu shiive okukonakona ehalo laKalunga olilipi, naashi shiwa, sha wapalela nosha wana.
3 Osheshi kefilonghenda olo nde li pewa ohandi mu lombwele, keshe umwe mokati keni muhe lidiladilile kombada yaashi she mu yeleka, ndele kendabaleni okudiladila pandjele, keshe tuu ou pauhapu weitavelo laye, olo Kalunga e li mu pa. 4 Osheshi ngaashi tu kwete molutu limwe tu na oinhimbu ihapu, ndele oinhimbu aishe kai na oshilonga shimwe ashike, 5 osho yo nafye nande tu li po vahapu, ofye olutu limwe muKristus, ndele mokukalafana kwetu ofye oinhimbu; 6 ndele otu na eeshalinghenda di lili nadi lili pafilonghenda olo twe li pewa: ngeenge ku na ou e noshili youxunganeki, ne i longife paitavelo, 7 ngeenge e na oshilongayakulo, ne shi diinine, ou ta longo ovanhu, na kale omudiinini mokulonga; 8 ngeenge omukumaidi, na kumaide; ou ta yandje, na yandje nomutima muwa; ou omukwatelikomesho, na kwatele komesho nouladi; ou ta longo eyakulo longhenda, na yakule nehafo.
9 Ohole inai kala noihelele, tileni owii, dameni ouwa. 10 Mokuhola ovamwaxo filafaneni olukeno, mokufimanekafana paafaneni oshihopaelelwa. 11 Mokulalakana kweni inamu fya ounye; kaleni mwa xwama momhepo; kaleleni Omwene. 12 Hafeleni meteelelo, lididimikeni moudjuu, diinineni mokwiilikana. 13 Yakuleni ovayapuki meemhumbwe davo; idilileni ovaendanandjila.
14 Nangekeni noupuna ava tave mu taataa. Nangekeni noupuna, nye inamu finga. 15 Hafeni novahafi, lileni naava hava lili. 16 Kaleni mu nediladilo limwe, inamu lovelela ei oinenenima, kaleni mwa wana naai ixupi. Inamu litala onye ovanaendunge. 17 Inamu alulila nande omunhu owii waye. Lalakaneneni ei ya wapalela ovanhu aveshe. 18 Ngeenge tashi dulika, kombinga yeni kaleni nombili novanhu aveshe. 19 Ovaholike, nye vene inamu alulila omunhu owii, ndelenee peni ehandu laKalunga omhito. Shaashi opa shangwa: “Ehandu olange, Aame handi futu, Omwene osho ta ti.” 20 Ndelenee: “Omutondi woye ngeenge e nondjala, mu pakela po nongeenge e nenota, mu nwefa, osheshi ngeenge to ningi ngaha, oto mu ongelele omakala a xwama komutwe waye.” 21 Ino findwa kowii, dula owii onouwa.
© Oshikwanyama Bible Revised © Bible Society of Namibia, 2008, 2012.
