Etungululo lotembeli tali xulifwa
1 Opo nee ohamba Darius ye va lombwela ndele va konakona melimba lomambo makula, omo hava ongele mo omamona muBabilon. 2 Ndele mohotengulu yaAhmeta yomomukunda waMedia, va mona omushangwatonywa, omo mwa shangelwa:Ohamba Darius ye va lombwela ndele va konakona melimba lomambo makula, omo hava ongele mo omamona muBabilon.
3 “Aa omadimbulukoshangwa: momudo wotete wohamba Kores, ohamba Kores ya yandja elombwelo: Ongulu yaKalunga yomuJerusalem, ongulu oyo i nokutungululwa i ninge onhele yokuyambela; nomakanghameno ayo e nokutungwa. Oule wayo wopombada eemeta omilongo hamano, nounene wayo eemeta omilongo hamano; 4 momutameno wayo mu nokukala omamanya manene momikweyo nhatu, nomiti dipe omukweyo umwe. Neefuto tadi ka futwa kongulu yohamba. 5 Nosho yo oinima oingoldo noisiliveli yotembeli yaKalunga, oyo ya kufwa kuNebukadnesar motembeli yomuJerusalem nokwe i twala kuBabilon, i nokushunifwa i kale meenhele dayo motembeli yomuJerusalem, ndele mu noku i tula mongulu yaKalunga.”
6 “Hano, Tattenai, ove omupangeli wombinga yokouninginino waEufrat, naSetar-Bosenai novakwanepangelo vakwao vokouninginino waEufrat: nye paife kaleni kokule noshilonga osho. 7 Efeni okukelela oshilonga shetungululo longulu yaKalunga. Omupangeli wOvajuda novakulunhu vOvajuda nava tunge ongulu yaKalunga ponhele yayo. 8 Naame ohandi mu lombwele, osho mu noku shi ningila ovakulunhu vOvajuda fimbo tava tungu ongulu yaKalunga, nokutya: Moimaliwa yefendelo lohamba moshilongo shokouninginino waEufrat namu dje diva ofuto yovanhu venya paha xupe sha nande, nokweendelela. 9 Ndele osho tashi pumbiwa keshe efiku paindilo lovapristeli vomuJerusalem nave shi pewe vaha lumbulwe nande sha: eengobe deemhedi eenhumba needi deemhedi noudjona omolwomaxwikiloyambo aKalunga komeulu, ndele mu noku va twaalela oilya, omongwa, omaviinyu nomaadi, inamu ongaonga, 10 opo va yambele Kalunga komeulu omayambo mawa ndele va ilikanene omwenyo wohamba novana vaye ovalumenhu. 11 Ndele pashipango shange, keshe umwe, te shi tauluka, omuti nau kandulwe mo mongulu yaye, ndele ye e nokweendjelelifwa muwo ndele ta ka valelwa mo, neumbo laye nali ninge oshala. 12 Ndele Kalunga ou a tula mo edina laye, na hanaune po ohamba keshe noshiwana keshe osho tashi nane eke lasho oku shi tauluka, nokutya okuhanauna po ongulu ei yaKalunga muJerusalem. Ame Darius nde shi tya. Nashi wanifwe shili!” 13 Opo nee Tattenai, omupangeli wombinga yokouninginino waEufrat, Setar-Bosenai naava va ama kuvo, va longa naanaa ngaashi ohamba Darius ye va shiivifila. 14 Novakulunhu vOvajuda va tunga ndele va ehenifa etungo nawa komesho omolweyakulo lomaxunganeko ovaxunganeki Haggai naSakaria yaIddo. Ndele va tunga ndele etungo ve li xulifa kelombwelo laKalunga kaIsrael nokelombwelo laKores nolaDarius nolaArtasasta, ohamba yaPersia. 15 Nongulu ei oya pwa okutungwa mefiku etitatu mohani yaAdar, momudo omutihamano wepangelo lohamba Darius.
Eyapulo lotembeli noshivilo shaPaasa
16 Novana vaIsrael, ovapristeli nOvalevi novakwao ava va dja moukwatwa, va dana nehafo oshivilo sheyapulo longulu yaKalunga. 17 Ndele moshivilo sheyapulo longulu ei yaKalunga va yamba: eengobe efele limwe deemhedi, eedi omafele avali deemhedi oudjona omafele ane, ndele etimbayambo oikombo omulongo naivali omolwOvaisraeli aveshe pamuvalo womapata aIsrael. 18 Ndele va tula po ovapristeli paengudu davo nOvalevi paengudu davo va longele Kalunga muJerusalem ngaashi sha shangwa membo laMoses.
19 Neenghwate da dana Opaasa mefiku etimulongo netine mohani yotete. 20 Osheshi ovapristeli nOvalevi ve liyapula ngaashi omunhu umwe. Vo aveshe va yela. Ndele va dipaela eenghwate adishe novapristeli vakwao navo vene odi yaPaasa. 21 Novana vaIsrael ava va aluka va dja moukwatwa, ove i lya, nosho yo aveshe ovo ve liyelifa keenyata doiwana yomoshilongo, va konge Omwene Kalunga kaIsrael pamwe navo. 22 Vo ova dana yo nehafo omafiku aheyali oshivilo shomingome dihe nonhafi. Osheshi Omwene e va hafifa nokwa pungululila omutima wohamba yaAsiria kuvo, ya pameka omake avo moshilonga shongulu yaKalunga, Kalunga kaIsrael.
© Oshikwanyama Bible Revised © Bible Society of Namibia, 2008, 2012.
