Ematulo loshipatifo oshitiheyali
1 Ndele Odjona eshi ya matula oshipatifo oshitiheyali, meulu omwa mwena filu oule wetata lotundi. 2 Ndele onda mona ovaengeli venya vaheyali va kala ofika koshipala shaKalunga, ova pewa omanghuma aheyali.
3 Nomweengeli umwe okwe uya po ta ehene koaltari e noshitwiminifo shoshingoldo, ndele ta pewa oimbodi ihapu yokutwimifa, e i tule momailikano ovayapuki aveshe koaltari yoshingoldo i li komesho yolukalwapangelo. 4 Omwifi womatwiminino wa yeluka pamwe nomailikano ovayapuki wa dja meke lomweengeli tau yuka koshipala shaKalunga. 5 Ndele omweengeli okwa kufa oshitwiminifo, ndele te shi yada nomundilo womoaltari ndele te shi tile kombada yedu, nopa ningwa engungumo lodula neendaka nomaluvadi nekakamo ledu.
6 Novaengeli venya vaheyali ava ve kwete omanghuma aheyali ove lilongekidila okushika omanghuma.
Eshiko lomanghuma ane
7 Nomweengeli wotete okwa shika enghuma, ndele tamu di eemhawe nomundilo wa lumbakanifwa nohonde, ndele wa tilwa kombada yedu, oshititatu shedu osha lungwina po; noshititatu shomiti osha xwikwa po, nomwiidi aushe utalala owa pya po.
8 Ndele omweengeli omutivali okwa shika enghuma, ndele shimwe sha fa omhunda inene ya xwama omundilo osha kupulwa mefuta, ndele oshititatu shefuta osha shituka ohonde, 9 ndele oshititatu shomoikwameva yomefuta ei i nomwenyo osha fya, noshititatu shomeeskepa osha hanauka po.
10 Ndele omweengeli omutitatu okwa shika enghuma, opo nee keulu okwa wa onyofi inene ya xwama ya fa onyika, ndele ya wila koshititatu shomilonga nosheefifiya domeva. 11 Nedina lonyofi ei ola ifanwa oudiyo, ndele oshititatu shomeva osha shituka oudiyo, ndele ovanhu vahapu ova fya po komeva aa, osheshi oo okwa lula.
12 Ndele omweengeli omutine okwa shika enghuma, opo nee oshititatu shetango noshititatu shohani noshititatu sheenyofi osha dengwa, oshititatu shado opo sha laulikwa, noshititatu shomutenya inashi yela vali, noufiku osho yo.
13 Ndele ame onda mona ndele nda uda onhwa ya tuka pokati keulu ndele ya popya mokule ya tya: “Woo, Woo, Woo, oonakukala kombada yedu, omolweendaka dikwao domanghuma oo ovaengeli vatatu va xupa po, tave ke a shika natango.”
© Oshikwanyama Bible Revised © Bible Society of Namibia, 2008, 2012.
