EXODUS 15 - Oshikwanyama Bible (OKYB)

Epanduloimbilo lOvaisraeli

1 Opo nee Moses nOvaisraeli ova imba nokufimaneka Omwene eimbilo eli; ndele vo ova tya ngaha:

“Ame nda hala okwiimbila efimano lOmwene,

osheshi Ye omufimanekwa pombada.

Onghambe nomulondi wayo Ye okwe mu undwila mefuta.

2 “Omwene Ye eenghono dange neimbilo lepandulo lange,

Muye mwa dja exupifo lange!

Oye Kalunga kange, onghee nda hala oku mu hambelela.

Oye Kalunga katate, onghee handi mu fimaneke

3 Omwene Ye omukwanyati.

Edina laye Omwene.

4 “Omatemba oita yaFarao

neenghono daye domatanga ovakwaita Ye okwe di undaula mefuta,

nokwa ninginifa mEfuta Litilyana ovakwaita vaye va hoololwa.

5 Omakungulukilo omeva e va tuvika.

Vo va ya fiyo oposhi ngaashi emanya.

6 “Akutu Omwene, eke loye la fimana molweenghono.

Eke loye lokolulyo, akutu Omwene, lo tali teyaula omutondadi.

7 Nomepangelonghono loye ove to denge poshi ovatondi voye.

Ove to pitifa mo oupyuhandu woye;

wo tau va lungwinifa ngaashi omwiidi.

8 Nokomufudo womayulu oye

omeva a kala ofika a fa ekuma,

heeno, omakungulukilo omeva a kanghama

a kala ofika ngaashi ekuma,

omeva a tondoka a kukuta mokati kefuta.

9 Omutondadi okwa tile: ‘Ame ohandi ka shikula nokukwata,

nokutukula oixuulwa, olwisho lange tali ka kutifwa muvo;

ame ohandi ka pweya mo eongamukonda lange,

eke lange tali ke va halakanifa po.’

10 Omufudo woye we u fudila mo, efuta le va tuvika.

Ngaashi oshumbu vo ova ningina mo momeva manene.

11 “Akutu Omwene, olyelye e li ngaashi Ove mokati koikalunga?

Olyelye e li ngaashi Ove omufimanekwa mouyapuki,

onakutilika moilonga ya fimana, Ove ho longo oikumwifa.

12 Ove eshi wa nana eke loye lokolulyo,

edu le va pona po.

13 Ndele mouwanghenda woye ove wa endifa

oshiwana shoye we shi kulila;

neenghono doye we va fikifa konhele yoye iyapuki.

14 Oiwana ye shi kundana, yo oya kakama,

etyololoko la kwata oonakukala muFilistia.

15 Eehamba domuEdom da haluka,

ovakulunhu vaMoab va kwatwa kekakamo;

oonakukala aveshe muKaanan ova dekweta.

16 Ehaluko netilo ole va kwata;

omolwounene wokwooko kwoye

va mwena filu ngaashi emanya,

fimbo oshiwana shoye tashi ende nokufika kefikilo,

oshiwana we shi likongela tashi fiki kefikilo.

17 Ove to va fikifa ndele to va twike medu leemhunda lefyuululifo loye,

konhele, Ove mwene we i lilongekidila, Ove u kalelele mo

kotembeli, omake oye a tunga, Omwene.

18 Omwene ta ka kala nokupangela

fiyo alushe fiyo ndongolondongo.”

19 Osheshi eenghambe daFarao nomatemba aye oita novalondi, eshi va ya mefuta, Omwene okwa shunifa omeva efuta kombada yavo. Ndelenee Ovaisraeli va enda poukukutu mokati kefuta. 20 NaMirjam omuxunganeki omumwaina waAron, okwa kufa ko okangoma meke laye. Novakainhu aveshe va enda naye ve noungoma. 21 NaMirjam okwa ya mo, te va tumbulile, ndele ta ti:

“Imbileni nokufimaneka Omwene,

osheshi Ye omufimanekwa pombada

Eenghambe novalondi vado Ye e va undaula mefuta.”

Omeva muMara

22 Opo nee Moses okwa fikamifa Ovaisraeli kEfuta Litilyana; vo ova enda nokweehena kombuwa yaSur. Vo ova enda omafiku atatu mombuwa ndele inava mona omeva. 23 Ndele vo ova fika kuMara, ndelenee inava dula okunwa omeva omuMara, osheshi a lula. Onghee hano onhele ei tai ifanwa Mara. 24 Opo nee ovanhu va tangunina Moses, ndele tava ti: “Ohatu nu shike?” 25 Ndele ye okwa kuwa kOmwene, nOmwene e mu ulikila omuti wonhumba. Okwe u ekela momeva, opo nee omeva a ninga mawa. Oko Ye okwe va pa onghedimhango nelombwelo noko Ye e va yeleka, 26 ndele ta ti: “Ove ngeenge to pwilikine nokudiinina ondaka yOmwene Kalunga koye ndele to longo eshi sha yuka momesho aye, ndele to dulika koipango yaye nokeenghedimhango daye, opo nee itandi ku undulile oshiponga nande shimwe sha fa oyo Ame nda undwila kombada yoshilongo shOvaegipiti. Osheshi Aame Omwene ou te ku velula.” 27 Ndele vo ova fika kuElim, oko kwa li eefifiya omilongo mbali nomilunga omilongo heyali. Ndele oko va onga onhanda pomeva.