Joram ohamba yaJuda
1 Ndele Josafat okwa ka nangala pooxe nokwa pakwa pooxe moshilando shaDavid. Nomona waye Jehoram okwa ninga ohamba ponhele yaye. 2 Nokwa li e novamwaina ovalumenhu, ovana ovamati vaJosafat: Asaria naJehiel naSakaria naAsariahu naMikael naSefatja. Vo aveshe va li ovana ovamati vaJosafat, ohamba yaIsrael. 3 Ndele xe yavo e va pa eeshali dihapu doingoldo nodoisiliveli noinima i nondilo pamwe noilando i neehotekuma yomuJuda. Ndelenee epangelo louhamba okwe li pa Jehoram, eshi oye oshiveli.
4 Ndelenee Jehoram eshi a mona epangelo louhamba waxe ndele e lipameka, ye okwa dipaa neongamukonda ovamwaina ovalumenhu aveshe nosho yo vamwe vomovakulunhu vaIsrael. 5 Omido daJehoram da li omilongo nhatu nambali eshi a ninga ohamba, nokwa pangela omido hetatu muJerusalem. 6 Nokwa enda nondjila yeehamba daIsrael ngaashi epata laAhab la ninga, shaashi omwalikadi waye okwa li omona okakadona kaAhab, nokwa ninga osho shii moipafi yOmwene. 7 Ndelenee Omwene ina hala okuhanauna po epata laDavid omolwehangano e li ninga naDavid, omaudaneko okuyandja kuye nokovana vaye ovamati olamba i kale yavo alushe.
Ovaedom tava amuka kuJuda
8 Pomafiku aye Ovaedom va amuka kuJuda ndele ve lihoololela ohamba. 9 Onghee hano Jehoram a ya pamwe novakulunhu vovakwaita nomatemba oita. Nokwa fikama oufiku ndele a taataa Ovaedom, ovo ve mu dingilila novakulunhu vomatemba oita. 10 Osho ngaha Ovaedom va amuka kuJuda fiyo onena eli. Mefimbo tuu limwe alike oshilando shaLibna yo she likufa mo mepangelo laye, osheshi Jehoram a ekelashi Omwene Kalunga kooxe. 11 Nokwa ninga yo oikulundu yokuyambela keemhunda domuJuda nokwa twala oonakukalamo muJerusalem mokuhaela nokwa pukifa Juda.
Onhumwafo yaElia
12 Opo nee a tuminwa komuxunganeki Elia onhumwafo tai ti: “Omwene Kalunga kaxo David ta ti ngaha: ‘Shaashi ino enda neendjila daxo Josafat noneendjila daAsa, ohamba yaJuda, 13 ndelenee wa twala Ovajuda noonakukala muJerusalem mondjila yeehamba daIsrael nomoluhaelo ngaashi epata laAhab le va twala moluhaelo, ndele wa dipaa ovamwaxo, ovo va li vawa ve ku dule; 14 tala, Omwene ta ka tuma oshiponga shinene mokati kovanhu voye nokovana voye ovamati nokovalikadi voye naaishe u i kwete, 15 naave mwene to ka vela oudu mudjuu, oudu wendjadja, fiyo pa pita omudo umwe ile omido mbali, omandjadja oye taa tika mo koudu ou.’ ”
Efyo laJoram
16 Opo nee Omwene a pendula mOvafilisti nomOvaarabi, ovo va li ovashiinda vOvaetiopia, omhepo yokukondjifa Jehoram, 17 ndele va homona Juda, ve shi teya, ndele va kufa oinima aishe ya li meumbo lohamba oixuulwa nosho yo ovana vayo ovamati novalikadi vayo. Onghee inapa fyaala puye nande omona waye omumati, Joahas aeke, onghelo yaye. 18 Ndele konima yoinima ei aishe, Omwene okwe mu handukila noudu wendjadja, noudu inau velulwa kusha. 19 Ngeno eshi pa pita omido mbali nokutya, pexulilo lomudo omutivali, omandjadja aye a tokauka mo molwoudu waye, onghee okwa fya e li mouyehame unene. Noshiwana shaye inashi mu xwikila oixwikomwa yoku mu fimanekifa ngaashi ooxe va ningilwa. 20 Omido daJehoram da li omilongo nhatu nambali, eshi a ninga ohamba, nokwa pangela omido hetatu muJerusalem. Nokwa fya, ndele kape na ou e mu pongola. Nokwa pakwa moshilando shaDavid, ndelenee hameembila deehamba.
© Oshikwanyama Bible Revised © Bible Society of Namibia, 2008, 2012.
